ውላውሳጊ አላፍቶ ፋያው

አለሚቱ የኔት

ክትባቲ እምፕል ወሴንስትኹሳ ቑንዜ ካላካልጝጙሳ አክም አድርፅጝስ እርዳታው ባዮሎጂያዊ ቴርቲያኽ:: ክትባቲ አይስታው ጊዝስ ቑንዝካው ካላካልጚው ቴርት ቑንዜ ያጋንኩ እንኪቴንካዋ ያቓታስታ ፍንሾስ ጌቴሙኒጊ ካላካልጛታ ይስጝፃዌኽ::

ክትባቲ ቹዋስ ፅልካ ስራስሪስ ፋይፃንቲ ያኹኽ ምክንያቲኪላ ቑንዝካዋ ካላካልጝጝስ፣ ይጋሪው ቑንዜ ካላካልጚውሳ አክሞስታ ዋይሚስቲስታ ዴክት ማንዲስቱክ ያኼካማ ሌጌሳንታ ካሊፅጝሴኽ ኑስ ቲኑ ሚኒስቴር ፍሽኹ ንባርዳ ቶኬማ::

ፅልካ ስራስሪስ ክትባቲ ኢንፌክሽንስ ፂኪስታቲንታስታ ሊጊ ድሚስ ቑንዚ ይ ዝኩትስ ወሴናንቲያኽ::

ክትባቲ ቑንዜ ካላካልጙሳ አክሞ አድርፄ፣ ማሊስታቲንኩ ቑንዝካዋ ካላካልጝጝስ ይሴንካስታ ካላካልጙ አክም ዝኩዋታ ቴርትካ ሌጌሳንታ ፄዌ::

ክትባቲው ፕሮግራም ፍሼ ክቭሳንኩ ቲንዳ ትልካ ቱዋንኩዴስ እምፕል ያኹስ ልቓ እክምኒው ታምብስታንት ዝኩክስታ ፂኪስታንትካ ያኹንኩ አቖ ቼሜትጙንኩ ሴልካዋ እርዳቴ::

አፍሪካዴስ አሜት ቺፊ 2 ትኩሚ 9 ሚሊየን ስራስሪዴስ ጃላ ካሜንስቱኑውስ እምፕል ሶኼትስ ክራናኑስ አሌም አቩቑ ቲን አችትስታ ዩኒሴፍ ፍሽኹ ንባር ቶኬሜ:: እንጚዴስ ዴሜካ 100ዴስ 40 ታፋ ያኻንኩ አፍሪካኩ አጌርካ ሰሀራዴስ ኩክራ አግስታንኩዌኽ::

አሜትቺፋኪላ ሰሀራዴስ ኩክራ ያኹንኩ አጌርካዴስ አርፊስ 1 ትኩማ 6 ሚሊየን ዴስ ጃላ ያኻንኩ ስራስሪ ክትባቴ አግፃኑውላስ ይጉዋና::

አማኻሪ ክልልዳኪላ አሜትቺፋ ክትባቲ እይስቴ:: እይስታውሳ ክትባቴ ዴሜካ ውላስጊ ታንብስታንታ ፄውጝስ ዙራሙሪ ሰላማ አኽጝ ፋይፃንቲያኽ:: ክልልታ አሜትዴስ ጃላ እጂኹ ሰላሙ ዳንጉዊኒኪላ ክትባቴ አግፅጝ ቱስታኩ ስራስሪ አግፃቲንታ ፅንጋኻ ያኻማጌኽ::

አዊ ብሄረሰቡ ቺፅጝፂ አንኪሺ ጉዋጉሲ ወረዳ ጊዊኒ ኬቤሊው ዝኩዋንታ ቸኮለች ቢሻው ስልኪስ ዙሙኑውስታጊ ሴዛ ጄርካዋ ካሜንካ:: ውላጊ ጄርካዋኪላ ክትባቲውሳ ጊዞ ሲፍካማ ኬቴብፁንኩ አኽⶓ እንክርፄካ:: ኬቴብፅጝስ ዴሜካ ቤዴርኑስ ጌቴማንኩ ሚንች አይኔትካ ስራስሬ ፂካንኩ ቑንዝካዴስ ካላካልጙኽ አኽⶓ ዊዛሮ ቸኮለች ድኹዌካ:: ዲጊስ አይስትኹሳ ፖሊዩውሳ ክትባቴኪላ ጌርኮ ማንዴካማ ጝንዳ ዝኪት ፅላ ጄራዋ ኪቲብስቴታ ፄውⶓኪላ ዲብስካ:: ጛ ዝኩኑ ዙራሙሪ ሰላም አኽጝስ ኬቴብፅⶓ ቶኬምካማ ስላም እላቲው ዙራሙሪዳ አግስታንኩ ቹትካ ኩፅኒ ስራስሬ ኬቴብፅጝስ ቼጌርስታንኩ አኽⶓኪላ ድኹዌካ:: ሼውታ ጝንዴስ ፋማ ክትባቴ እይፂ ስፍሪሾ ካስጝስኪላ ሰላም ቤዴራንቲ አኽⶓ ዊዛሮ ቸኮለች ዲብስካ::

አማኻሪ ክልሉ ቲኑ ቢሩ ፍሽኹ ንባርታጊ ክልልዳ ሊሊትጙንኩ ምክንያትካስ ክትባቴ ካፅካያስኩ ስራስሪው ቼፍ 605 ሻይዴስ ጃላ ታምብⶓስታ ክትባቴ አግፁንኩ ዴሜካ 15 ፐርሰንት ይቪቻ አኽⶓ ቶኬማ::

ክትባቲ ቲኑ ኾት እያኩ አግልግሎትካዴስጊ ስራስሪውስታ ቹትካው ክትባቲ ኽሳንቲ ዲብያኽ:: እን አጌራዳ ይቪቻ ያኻውላ አሌምዳጊ ትኩት እይስትኹ እንፅኺኪላኽ ክትባቲ አውጚ ቴሌቭዥንሊ እጂጜ ፄውንኩ ቲኑ ውማይቲኒ አቶ ቦጋለ ደመም ጌሌፁኒውስታጊ ክትባቲ ስራስሪ ቹዋዴስ ፍትሬትስ አግፃኑ ቑንዜ ካላካልጝጙ አክምዴስ ድምክና ሊሊትጙንኩ ቑንዝካዋ ካላካልጝጙ አክም ዝኩዋታ ካሊፃዊያኽ:: ክትባቲ ኹፕኹፕፂው ቲቪስ፣ ሳንብታሳስ፣ እውራስስታ እሊኩጊ ሊሊትጙንኩ ቑንዝካስ ሳሴርስ ፂኪስትካማ ክሪስ ታንባቲንታ አክም ዝኩክ ያኻንታ ካሊፃው አኽጝስ ክትባቲ ፋይፃንቲ አኽⶓ አቶ ቦጋለ እርዳትፅካ::

አቶ ቦጋለውስታ ጊሊፂታጊ ክትባቲው እይስታው  እሜ ካሜንስቱንታ ጄሜራማኽ:: እምፕል አሜትዴስ ኩክራያኹኽ ጊዝዳ አሌዳኑዊያኽ:: ኽታዋ ዋልታ አይኔቶ ቑንዜ ካላካልጝጝስ እርዳታንኩ ክትባቲው አይኔትካ እምፕልትካማ እይስታኒስ እሺንኩ ናካዳ ኩፅኒ 10 አይኔትሾ ኬሽጛማ አንትጝስ እይስታማጊ አኽⶓኪላ አቶ ቦጋለ ጌሌፅካ::

ቹትካስ እይስታው ክትባቲው አይኔትኪላ ምንጋጌ ኮሌፋውሳስታ ካንሰሩሳ ቑንዜ ቤዴራማ ካላካልጝጝስ ካሊስታው አኽⶓኪላ እንክርፄካ:: እንሳ ክትባቴ አግፅጝስኪላ ሚንችትስ ቲኑ ኾትዳ ይቪቺዳ ያኻውላስ ዝኩኑ ዙራሙሪዳ ዙሬካማጊ ውማይቴንካ እያንኩ አኽⶓኪላ አቶ ቦጋለ ድኹዌካ::

ክልልታ ፌቴርስትኹ ሰላሙ ችግር ወክቶ ማንዴካማ እይስታንኩ ክትባትካስ ፅንጋኻ ያኻማጊያኽ:: ክትባቴ እይጝስ ጝን ጝናዴስ ፌካማ ክትባቴ ካፃንኩ ስራስሪ አግስታላኪ  ቲንኩ ውማይቴንካኪላ ዙራሙሪ ሰላማ ያኺትየስጊ ፌካማ ካስጝስ ቼጌርስታና እንሱ ምክንያቲስኪላ ክትባቲው ጊዝ ፌየ:: ክትባቲ ዴሜካ ጌርክ ፌያኒ እይስትጝስ ካሊስታላኪ:: እን ዴሜካ ፍንሾስ ሌጌሴካማ አጌራዋ አሬኬብስታንኩ ቲን ዌና ጋንኩስታ አክምኪላ እላቲኩ ያኻንታ ፄዋው አኽⶓ አቶ ቦጋለ እንክርፄካ::

ስራስሬስታ ቹትካዋ እንካናቲው እላ አኽጝስ ውላዴስጊ ጃላ ቲኑ ጉዳይስ ቤዴርቶ እይጝስ ካሊስቱኒኪ ሰላም ይንታታ ያኺትየስኪ ክትባቲው ጉዳይ ኬርታቲታ ፄውጝስ ውላጊ አሬባሬብጝጝ ቱስታው አኽⶓኪላ አቶ ቦጋለ ሼውፅካ::

አማኻሪ ክልልዳ ቤዴራ ክትባቲ ቱስቲስ እይስታውላ ይጉጝስ ድስካሺንኩ ቑንዝካዴስ አንከሊሳው ቑንዚ እቺት ኑንኩ ጌፄርኩ ዙራሙርካዳ ወረርሽኝታ ያኻ ኬሴትስትⶓኪላ አቶ ቦጋለ እርዳትፅካ::

ጛ ቲኑ ቢሩዳ ውማይቴና እሺኑጊዝዳ 80 ስታ 90 ፐርሰንታሳ ታንባሺኹ ክትባቲው ታንብሰታንት ናካዳ ዙሚጝስ ሴሜርፃው አኺኒስ 15 ፐርሰንትሾ ጌምⶓኪላ አቶ ቦጋለ ጌሌፅካ:: እን ቴግባር ዴሜካ ቲንሾስ እንግራ 40 አሜትሾ ካናታ ፄዋው አኽⶓኪላ ታክስፅካ::

ስራስሬ አንኩዋ አሜትሳኺስታ ዝኩኽ ድሚው አችዳ ቱስቲስ ክትባቴ አግፃንታ ፄውስትየስጊ ቑንዚ ዴሜካማጊ አንትጝስ ክሪ ሚንቼ:: አጌራኪላ እጁስ ያኻውሳ ኬፍንኹሳ ጌንዜቦ ፍሽጝስ ጊዲድስቴት አኽጝስ ሰላም ይንታታ ቲን ዌና ክምንት ፌቴርስታታ ታምቦጊ ፊትጝጝ ቱስቴ::

ጐቤዝካስታ እሊኩ ዙራሙሪኩ ክንታንትካሊ ልኺትጛንታ ያኻንኩ ስራስሪዋ አፌርጝስኪላ ክትባቲ ቹዋስ ፋይፃንቲያኽ:: አጌራ ድኻ አኽጝታጊ እይስታንኩ ክትባትካኪላ ይምስትካማ ይንታንኩ አኽጝስ ቱስቲስ ቴኬምስትጝ ፋይፃንቲ አኽⶓኪላ አቶ ቦጋለ ጌሌፅካ:: እይስታው ክትባቲ ጉዳዊያኽ ናንኩስ ዴሜካ ክትባቲ ያኻማ ጉዳው እላቲው አኽⶓስታ አንቤባማ እርዳትስትጝ ቱስታው አኽⶓኪላ ታክስፅካ::