ደመላሽ መለሰ
አካላታ ፋፊፂ /ስፖርቱ/ ክንቲ እምፕል ክንቲው አይኔትታ ያኻማ ክንቲጝናዳ ክንታትካስ እይስቴ:: እን ክንቲውሳ አይኔቶ ሊሊታ ፄዋው ክንታትካ ክርፂ ምግባር ፅንታሳ ጋምቢጝስ፣ አካሉሳ ዳሌጝቶስታ አንኩሊውሳ ልግሶ ኬሽጝፅጝስ ቴኬማንኩ ክንቲኩ አይነትካዴስ እምፕል አኽጝሴኽ::
ኣካላታ ፋፊፂውሳ ክንቴ ቴግባርስ እያንኩ ክንቲ ጝንካዴስ እምፕል ዴሜካ ዶ/ር ጌትነት ታደለ አዚኒ እምፕላንቲ አች ክንቲ ጝናኽ::
ዶ/ር ጌትነት ታደለው ክንቲ ጝናዳ ላጜታንቲ ቤንቲ ክንታንታ ፂዬን ደሳለኝ አካላታ ፋፊፂውሳ ክንቴ ቤዴርካማ ቤንዳ ክንትጝስ ቤኑሳ ቴግባርሾ ኪስጝስ ክንቴካማጊ አኽⶓ ዙሜ::
ክንቲ ጝና ቴግባርስ ያኻውሳ ውታኼ ቴርስጝዴስ ጄሜራማ ውላ ሜሳርካዋ ዋኽትጝፅⶓ ድኹኽ 7ንቲ ቤኑ ክንታንቲ ገብሬ አበባው ክንፅፅጙ ካስት እንዴስ ቤዴራ እይስታውዴስ ሊሊታው አኽⶓ ድኹዋ::
አካላታ ፋፊፂ /ስፖርቲ/ ክንቲው አይኔት ቤዴራሱ ጊዝዳ ክንቲው አይኔትታ ቼፍስታቲው እሺኹ አኽⶓ ጊሊፂት ዴሜካ ዶ/ር ጌትነት አዚኒ እምፕላንቲ አች ክንቲ ጝናሱ ክንትፃንታ አለምፀሃይ ትላሁን ናካሱ ጊዝዳ ሜፃፎ ዋኽትጝፅጝዴስ ጄሜራማ ክንቲስ ትኩት እይስትⶓ እንክርፄካ::
ክንትፃንታ አለም ፀሃይ ትላሁን እን አጌራዋ ሊሊትጙኽ አትሌቲክሱ ሜንድሬኽዳ አጌራዋ እቑፃንኩ እንሳ ክንቴ ቴግባርሾ ኪሱንኩ እምፕልታቕኩ ቤንካ አኽⶓ ድኹዌካ::
ዶ/ር ጌትነት ታደለ አዚኒ እምፕላንቲ አች ክንቲ ጝናሱ ጛሪ ገናናው አይናለም አካላታ ፋፊፂውሳ ክንቴ እንዴስ ኬሹኽ ፄውጝስ ሊሊትጙንኩ ስፖርትስ ያኻንኩ ሜሳርካ ዋኽትጝፄካማጊ አኽⶓ ጌሌፅካ::
እሊኩ ክንቲ ጝንካ አካላታ ፋፊፂ ቴግባሩ ክንቲ አይ ጚውሳ ዴሶ ቤንጝስ ካሊⶓ ቶኬምካ:: ክንቲጝናሱ ጛሪ እንሳ ድሎ አግፄካያስኩ ክንቲ ጝንካ እንዴስ ጌናኪላ እኑው ክንቲጝናሾ አንትጝስ ዴሶ ቤንጝጝ ቱስቴ ናኒስ አማኮ ህብር አውጚው ቴርት ቤናስ ስልኪስ ንባሮ ታምፅካ::