“ብቲ ፄቤቡኽ አብትዌና”

ደመላሽ መለሰ

አሜሪካዊ አብት ዌና ኢሎን መስክ 400 ቢሊዮን ዶላርዴሰ ጃላ አብቶ ኩፕፅጝስ ካሉኽ ቢዲሪ አኽ::

አሌምዳ አግሰታንኩ አብት ዌንካዴስ ቢዲሬኽ እስታማ ዙሚስታው ኢሎን መስክ ጝሺዳ 400 ቢሊዮን ዶላርዴስ ጀላ አብቶ ኩፕፅጝ አሌሞ ዙሚትጝፃማጊ አግስቴ::

ብሉምበርግ ዜጌብኹስታ አሌምዳ 400 ቢሊዮን ዶላር ዌና አብታሚ እላቲው አኽⶓ አቕፃ::

ኢሎን መስክ አብቱ ሜቴን እምፕላኒስ 20 ቢሊዮን ዶላሮ ናቔው ጌንዜብሾ ኬፍ ንጙ ስርኩኒ ስፔስኤክስ ኩባንያው ግምት 350 ቢሊዮን ዶላሮ ታምብጙ አምኽጚ አኽⶓ ብሉምበርግ ዜጌባ::

ዲጊስ ካስጙኽ አሜሪካውሳ ጉላሌ ሲፋማ ኢሎን መስኩ አብት ኬፍ ናማጊ አኽጝ ቶኬምስታ::

ኢሎን መስክ 2024 አሜሪካው ፕሪዝዳንት ያኻማ ጐሌልስትኹ ትራምፕሊ ዝኩኽ ታምትጚ ኩባንያው ዋይሚ ኬፍ ናታ ፄዋ::

ኢሎን መስክ ቴስላ ስታ ስፔስኤክሶ ዴሜካማ ሜንችካ ኩባንያው እንፅኻ ፊፂምፂስታ X ዌናኽ::

ኢሎን መስክ ብቲዳ ያኻማ አብቶ ኩፕፅጝዴስ ሴጋ ፕላኔትሾ ካሳማ ዝኩⶓ ጄሜርⶓ ታክስጝ ዴሜካ እን አብትዌና ሜንቾ ካንትፃው  አኽጝ አቕስታ::

ኢሎን መስክ ደቡብ አፍሪካ ፕሪቶሪያ ኔልስን ማንዴላት አጌራዳ ካሜንስትኹ አኽጝ ዴሜካ ሜንችካ አፍሪካዊያንካ ኩራንታ ፄዋ::

ኢሎን መስክ እሊኩ ፉችካ ደቡብ አፍሪካዊያንካታጊ እንፃኺቱውሳ ጊዞ አንጚዳ ፌይፃ::

ኢሎን መስክ  ፅክራ ላጛ አሚቲ ስር ዝኮዋማ ፅላ ኮምፒውተርትሳ ጌማዋ ፌቴርጝስ 500 ዶላርስ ዋይጝ ሚንችካዋ ዙሚትጝፃሺኹ አኽጝ ዴሜካ ናካ ዝኩኽዳ ሳኪትጚዳ ታምባታ ፄዋ::

ኢሎን መስክ እሊኩ ስራስሪ ሌጌሳኒሰ ፄዋኑውስታጊ ጚኪላ ጝንጝናሳ ኩፋኩፍጝስ ቸኮሌቶ ዋያማ ሌጌሱኽ አኽⶓ ዴሜካ ቢቢሲ ዜጌባ::

ኢሎን መስክ ፉቺ ደቡብ አፍሪካዊ ፂምርኩዌ ፍሻው ጊፂኒ ታብሊዴስ ካናዳት ሞዴላ ጚቹዴስ ካሜንስትጝ እንፅኼ እንፃኺታስ ጄሜራማ ቴጌባርሾ ኪሳታ ፄዋ::

ኢሎን መስክ ጚቹስታ ጚታላ እንፃኺታስ ኬውጛኒ ጚዴስ እንፃትካ ጚቹሾ ካሳኒስ ጚ ዴሜካ ቱብሊሊ እጂⶓ አቕፃ:: ያኼስጉ መስክ ታብሊሊ አምኽጜ አቲጝስ 17 አሜቲ ዝኩዋማ ጚቹሾ ካናዳዋ ካስኾ::

እንጚ ጉዝማ ጚታላ ዴሜካ ሹኻ አርፋስ ዙርታ ዙርታታ ቲንቴ አኹኪ ዙርቱስ ቲጉዌ ናውሳ ማቔቾ ፌያፌይጝፁኒውላ ኢሎን መስክ ዴሜካ ታክሱኹሳ ሳኪትጝፅጝስ ታምባው እላቲው አኽጝስ ጝሺሱ አችዳ ታምባ::

ኢሎን መስክ ፊዚክሱውስታ ቢዝነሱው ዲግሪ ዌናኽ:: ላንጊጊ ዲግርካ ዴሜካ ፃምርትስ ኢሎን መስኮ ሲፋና:: ፊዚክሱ ካሌቕትስ አይኪ ታምባቲው ፌቴርጙሳ አኺኔ ካንትፄ:: ቢዝነስስ ዴሜካ ጊፂውሳ ዴሶ ኬሽጝፅጝስ አይኪ ታምባቲው አብትዳ ታምባ ኑስ  ቢቢሲ ሚንችዴስ ልቓስ ዜጌባ::