ሰላሞ ማንዲፅጝስ እዝብሊ ቱትጝጚ ፋይፃንቲያኽ

አለሚቱ የኔት

ብሄረሰብ ቺፅጝፂውሳ ሰላሞ ማንዲፅጝስ እዝብሊ ቱትጝጚስ እንፃኽስትጝ ፋይፃንቲ አኽⶓ ቹዋ ቺፅጝፃንቲ ቴዎድሮስ እንዳለው ጌሌፁና::

ፋግቲ፣ ጉዋንጉዊስታ ባንጂ ወረዳዴስ ፊትጙንኩ እምፕልታቕኪላ ሰላም ይንታታ ይጋሪስ እንፃኽስታንኩ አኽⶓ ዙሜካ::

አንያኽ ኽሳኻ ናው ታክስጚ እዝብዳ ታምፃማጊ ዝኩኽሳ ችግሮ እዝብ ማላማ ካላካልጝጝ ቱስታው አኽⶓ ብሄረሰብ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው አውጚው ቴሌቨዥንስ ስልኪስ ጌሌፅካ::

እምፕልታቑሳ ሰላም አዌክጝስ እዝብ ችግርሾ ቱዋታ ፄዋንኩ ሰላሙ ፄራ ያኹንኩሳ ካላካልጚስ ካሊስታታኪላ ካስጛንኩ ኩስጚው ሜንድሬኽካዳጊ እዝብሊ ቱትጚ ቹዋ ዲብ አኽⶓ እርዳትፅካ:: ሰላሞ ማንዲፅጝስ ዴሜካ አይሎ ኩፕፅጝ፣ ኩፑኽሳ አይሎ ዴንብስ ፄዋማ ሼው ፅንታሳ አድርፃማ እሚጝ ፋይፃው አኽⶓኪላ ቶኬምካ::

ሰላሙ ፅንጋኻ ያኻንኩ አካልካ ቱዋኑ ፋኑ ዋሻስ አኽⶓ ማሊጝኪላ ቱስቴ ኻራ ጌርካ ማንዲጝ ኪላ ፋይፄ::

ካላካልጝጝዴስ ፌያማኪ ሰላሙ ፄራ ያኹንኩ ቤንካዋ ትንክፋ ካሳማ ዙራሙሬ ባይፃንታ እንፃኽስትጝ ፋይፄ::

አክምዴስ ጃላ ያኻማ መንግስቱ አችትጚዴስ ሴጋ ያኹኽ አይልስ ክምስቱንኩ ዙራሙርካዳ ዝኩዋንኩ እዝብካኪላ ያኹኒ ናካዳ ሰላሞ አቲፃው አይልስ ቼጌርስትካማጊ አኽⶓ ጌሌፅካ:: እንሳ ሰላሞ አቲፃንኩ ኩፅኒ ዋዴስኪ ይንቴካያስኩ አኽጝስ ጄሮኪ ያኻ ሴኖ ኩስጝፃማ ሰላምሾ ዙራንታ ፄውጙ ቴግባር እንፃኽስስታማጊ አኽⶓኪላ አቶ ቴዎድሮስ እርዳትፅካ::

ዙራሙሪ ቺፋ ፄውስታው ኩስጚስኪላ ኪሲ ካንትስታማጊ ያኹኒኪላ ይጉዋው እንፅኺ ዝኩⶓ ቶኬምካ:: ኩስጚዳ አግስቱንኩ ፋግቲ ለኮማ ወረዳው ትክትሊ ቺፅጝፃንቲ አቶ ታገለ እጅጉ ፋግቲ፣ ጉዋንጊስታ ባንጂ ወረዳው ዎሌን ኬቤልካዳ ዝኩንኩሳ እምፕልታቖ አችትጝፅጝስ ዙራሙሪውሳ ሰላሞ ጛው አክምስ ማንዳንታ ፄውስታማ ኪሲ ካንትስታማጊ አኽⶓ ዲብስካ:: እዝብኪላ ሰላሞ ማንዲፅጝስ ኩርፂኒ አኽⶓ ቶኬምካ::

ስንብቶ ሰላሞ ማንዲፅⶓ ካንትኹስ ካስጙኽ ኩስጚዳኪላ ፋግቲ ለኮማ፣ ጉዋንጉዊስታ ባንጂ ወረዳዴስ ዎሌንካ ኬቤልካው ዝኩዋንትካዴስ አይማኖቱ ታብል፣ አጌር ሹማጌልስታ ቹኒትስታንትካ አግስቴካ::

ኩስጚዳ አሴቴፍጙንኩ እምፕልታቖኪላ ሰላም እላ ያኹኒጊ ልማት ዝኩዋቲው፣ እዝብ ምርኪስ ቼጌርስታው፣ ቑንዚ እሳናማጊ ካሳውስታ አጌርኪላ ቤቴንስትጝዳ ታንባው አኽⶓ ጉሽካ:: ዊዳፊስ ሰላም ቼሜትጛታኪላ ዝኩንኩ አጌር ሹማጌልካ አላፍቶ ፊትጛንኩ አኽⶓኪላ ኩስጚዳ ቶኬምካ:: ችግርካዋ ሰላማዊ ዳድስ ኽይጝስ ፅሬቶ ፄዋንኩ አኽⶓኪላ ታብል ዲብስካ::