አገው ፌሬስቴንካው ባል ኬቤርስትጝ ኢኮኖሚው አግፅፃ ያኻማጊያኽ

ታደለ አጋጄ

አገው ፌሬስቴንካው ባል ኬቤርስትጝ ሊሊትጙንኩ እንፅኺው ዜርፍዳ አሴሜርጙንኩ ጛርት አቕስ ኢኮኖሚው አግፃ ያኻማጊያኽ እስትኾ::

እንጃቢሪ ኬቴምዳ ባይሉሳ ስዮ ግቢታማ ዋይጝዳ አሴሜርጙኽ አቶ መንግስቱ ምትኩ አገው ፌሬስቴንካው ባል ኬቤርስትጝ አሜት ቺፋ ባሉሳ ስዬ ፋያንትካው ቼፍ ዴሜካማጊ አንትⶓ ጌሌፅካማ እንዴሰ ቤዴራ ኬቤርስትኹ ጊዝዳስታ ናካዳ ባሉሳ ስዮ ፋያንትካ ሚንቺጝ ኢኮኖሚውሳ ሚፄ አግፃንታ እርዳትኹ አኽⶓ ዙሜካ::

ቤዴራሱ ጊዝዳ ባይሉሳ ስዩ ጄዋንትካዉ ፋይ ማልጛ ኔኬትኹ አኽⶓ ቶኬምካማ ናካ ኩፅኒ ፌሬስቴንካው ማቢሪው ባልስ ሴያኑሳ ስዩ አዜዙንኩ ዎታትካው ቼፍ ሚንቺⶓ ድኹዋካ::

እንጃቢሪ ኬቴምኩ ዝኩዋንትካ ይቢችካ ያኺትየስ እሊኩ ዙራሙሪዳ ዝኩንኩ እምፕልታቕኪላ ጃኑሳ ስዮ ግቢትፅካማጊ አኽⶓ ቶኬምካማ ባይሉሳ ስዮ ዋያንትካው ሚፂ ዴሜካታ ፄውኽ አኽⶓ ዙሜካ::

አቶ መንግስቱ ባይሉ ስይ ኹንስስታ ጝርጃስ እንቲታኪላ ስራስሪስ ያኻውሳ ግቢታማጊ ዋዬ:: ፌሬስቴንካው ማቢሪውሳ ባሎ ምክኒያታ ፄውጝስኪላ ስዬ ፋያንትካስ ሜቴቴንጙኽ ዋይሚስ ዋይካማጊ አግስታንኩ አኽⶓ እንክርፄካ::

ባይሉ ስይ ሴይስታኒ ማልጛ እንካንስታው አኽጝስ ስዮ ጄዋንትካ ዴሴንካማ ጄውጝስ ሴያኑ አኽⶓ ቶኬምካ:: ፌሬስቴንካውሳ ባሎ ኬቤርፅጝ ቱስታውኪላ ባሉሳ ስዮ ሴይጝስ ብሩኽ አኺኒስ ኬቤርፅጝ ቱስታው አኽⶓ ጉሽካ::

እሊው እንጃቢሪ ኬቴምዳ ሆቴልስታ ቱሪዝሙ ዜርፍስ አሴሜርጜካማ እንፃኽስታንኩ አቶ እሱባለው መስፍን አገው ፌሬስቴንካው ባል አሜት ቺፋ ኬቤርስትጝ ኬፍቲኒ ኢኮኖሚውሳ ልቕልቕቴ ፌቴራማጊ አኽⶓ ዙሜካ::

ፌሬስቴንካውሳ ባሎ ኬቤርፅጛ ሊሊትጙንኩ ዙራሙርካዴስ ይንታንኩ እምፕልታቕ ቻሞ ስንካዉ ሊስትሩዴስ ጄሜራማ ኽሳንትካ እንፅኺኩ ዜርፍካዋኺስታ ኢኮኖሚው አግፅፂ ያኻማጊ አንትⶓ ቶኬምካ::

ጋያኪ ሆቴሉስታ ቱሪዝሙ ዜርፍዳ አሴሜርጙንኩስ ኬሽኹ ሚፂ ዝኩⶓ ቶኬምካማ ፌሬስቴንካውሳ ባሎ ኬቤርፅጝስ ይንታንኩ እምፕልታቕስ አሜቻታ ፄውጝስ ቤዴራ ቴርቶ ፄዌካማጊ አኽⶓ ዙሜካ::

ፌሬስቴንካው ባል ኬቤርስትጝ ኢኮኖሚስ እያው ትክምዴስ ፌይኹስ እምፕልታቑሳ ታምትጜ  ይስጝፅጝስስታ ባይሎስታ ዎጎ አቕትጝፅጝስ ኬፍንኹ ትክም ዝኩኽ አኽጝስ ባይሉሳ ስዮ ሴይጝስ ባሎ ኬቤርፅጝ ቱስታው አኽⶓ ዲብስካ::

አገው ፌሬስቴንካው ባል ኬቤርስታው ትር 21 ዴስ ጄሜራማ ትር 23 ኺስታ አኽጝታጊ አዊው እዝብ ሊንጊዴ ቻቤልጝስ አቕስታውስታ  ሌንጌድ ፋያኑሳ ምግቦ ያኻ እሊውሳ ዲቦ ሜቴቴንጙኽ ዋይሚስ ዋይጝ ፋይፃው አኽⶓ ዙሜካ::

ባል ሰላማዊ ዳድስ ኬቤርስታታ ሆቴሉስታ ቱሪዝሙ ዜርፍዳ አሴሜርጙንኩ ጛርት አቕ ፄትቲው ዜርፍሊ ቲቢቢርጚስ እንፃኽስትጝስ ቴርትⶓኪላ ጉሽካ::

እንጃቢሪ ኬቴምኩ ዝኩዋንትካ ባሎ ኬቤርፅጛ ይንታንኩሳ ሌንጌድካዋ ፋያኑሳ አግልግሎቶ እይጝስ ይንታው አሜትዳ ይንታንታ ፄውጝስ ጉድ ሌንጌዶ ኬቤርፅጙሳ ባይሉ ሲፍጝ ቱስቴ ንካ::

አዊ ብሄረሰቡ ቺፅጝፂው ባይሉስታ ቱሪዝሙ ሜምሪዳ ባይሉስታ እሴትካው ኬቹ ጉሳንቲ አቶ ወለሊ ጌቴ አገው ፌሬስቴንካው ባል ኬቤርስታታ ሊሊትጙንኩ ቤዴራ ቴርትካዋ ፄዌካማጊ አኽⶓ ቶኬምካ::

ፌሬስቴንካው ባል ኬቤርስትጝ ባይልስ ሊሊቲ ትኩት እይስታታ ፄውስታማ ጃኖ ሴይጝስ ባሎ ኬቤርፅጝዳ ባይሉሳ ስዮ እንፃኽስታንኩ ወረፊስ እንፃኽስትካማጊ አኽⶓ ጌሌፅካ::

ባይሉስታ ቱሪዝሙ ሜምሪዳ ባይሉስታ እሴትካው ኬቹ ጉሳንቲ አቶ ወለሊ ባይሉሳ ስዮ ዋያንትካ እንዴስ ቤዴራ እሺኹ ዋይሚዴስ ዜሬቕንጝስ ዋይካማጊ አኽⶓ እርዳትፅካ:: ሆቴልስታ ቱሪዝሙ ዜርፍዳ አሴሜርጙንክ ጛርት አቕ ሌንጌድካዋ ቻቤልጝስ ቤዴራ ቴርቶ ፄዌካማጊ አኽⶓ ጉሽካ::

አገው ፌሬስቴንካው ባል ኬቤርስትጝ እምፕልታቕስ ሚፂው አግፂ ያኻማጊ አንትⶓ ጌሌፅካማ እንዴስ ቤዴራ እንጃቢሪ ኬቴም ቱሪዝሙ ኮንፈረንስ ኬቴማ እስቴታ ጎሌልስቲት አኽⶓ ቶኬምካ:: ኢኮኖሚውሳ ሚፄ አግፅጝዴስ ፌይኹስ እምፕልታቑሳ ታምትጜ ይስጝፃው ባል አኽⶓኪላ እርዳትፅካ::