ብቲው እጁ

ታደለ አጋጄ

ዊዳፊ ፍትሬት አብቱስታ ተፋስስ ልማቱ እንፅኺ እምፕልታቖ ቴኬምስታንታ ፄውጝስ፣ ጌፄሩ ግብርኒውሳ እንፅኼ ስራ ፄውኽ ልማቱሳ ስትራቴጄ ሲፍጝስ፣ እንግራ ይጉዊ አሬስጙሳ ሴሎ ኪስጝስ፣ ኬፍቲኒ አችስ ጉዲስትኹሳ ብቴ እሺኹሾ ዙራታ ፄውጝስ ኬሽኹ ዳብዚ እንኩርስታማ ቴግባርሾ ቱስታ::

ፌዩንኩ አሜትካዳ እንፃኽስስቱንኩ ኽብፄስታ አኾ ማንዲጙ እንፅኽካ ኩሪስ ሺሽርስትኹሳ ብቴ ዙራታ ፄውጝዴስ ድምክና ፍትሬት አብቱስታ ተፋስስ ልማቱ እንፅኺ አብቱ አግፅፃ አኽጝስ ጌፄሩ ዙራሙሪዳ እንፅኺው ድል ፌቴርስታታ ፄውጝዳ ኬፍቲኒ ትክም ዝኩኽያኽ::

ፍትሬት አብቱስታ ቴፋስስ ልማት እንፃኽስስቱንኩ ስፍርካዳ እንሴስካዋ ሌፍፅጝ ቴክልካዋስታ ኩፓኩፕካዋ ሊሚፅጝ፣ ፅኻራዋ ስኹፅጝ፣ ዴኑሳ ልማቶ ሊሚፅጝስ እምፕልታቕ ዜርፋ ሚንቼ ትክሞ አግፄካማጊያኽ::

ፍትሬት አብቱስታ ልማቱሳ እንፅኼ ዝማቺስ እንፃኽስትጝዴስ ፌይኹስ ጌርክ ቺፋሱ እንፅኺ ፄዋማ እንፃኽስትጝስ ቱስቴ:: አሜት ቺፋ ትር አርፊዳ አሬሳቻንትካ ፍትሬት አብቱሳ ማንዲጜስታ ተፋሰሱሳ እንፅኼ ዝማቺስ እንፃኽስታና:: ኽብፂ ኩሪስ ሺሽርስታማ ካቲታ እርኬኖ ግቢትና:: ችኹ ዎክትዳ ዴሜካ ፍትሬት አብቱስታ ተፋሰሱ ልማትዳ እንፃኽስትኹ ስፍሪዳ ቴክልካዋ ቴኬላና::

2017 ም/አታሱ ፍትሬት አብት ማንዲጚውስታ ተፋሰሰ ልማቱሳ እንፅኼ እንፃኽስትጝስ ቤዴራ ቴርቶ ፄዌካማጊ አግስታና::

ፍትሬት አብት ማንዲጚውስ እንፅኺስ ኬሽኹሳ እንፃኽስትጝስ ቴኬምስታንታ ያኹንኩ ዙራሙርካዴስ ዚቕ ጐመርቲ ኬቤሊ ቶኬምስቴ::አሬሳቻንቲ ጌታሁን አለም ዚቕ ጐመርቲ ኬቤሊው ዝኩዋንትካኽ:: ፍትሬት አብቱሳስታ ተፋሰሱሳ እንፅኼ  ጄሜሩኒዴስ ሚንች ጊዝ አኽⶓ ድኹንኩ አሬሳቻንቲ ብራፂ እስታው ካንዳ እርኬኖ ግቢትጝስ ጉድጛ ያኻማ ሴብል ዋግⶓ ዙሜካ::

እንዴስ ቤዴራ ብቴ አሬስጝስ ስቤት ሴባቲው እሺኾ:: እሪ እሉዋው ጊዝዳ አሬስጝስ ታክሳኒውላ እንዳርማኪ ኽብፂ እላቲው ካጊ ብቲ እሺⶓ ቶኬሙንኩ አሬሳቻንቲ እርኬኖ ግቢትⶓ ጄሜሩኒዴስ ፋሌንጋ ኽብፂው አሉምት ዙራማ ሴብልስታ ክይ ጉድጛ ዋግጝስ እሊውሳ ዙራሙሬ ፄጌሩኽ አኽⶓ ዙሜካ::

ተፋሰስ እንፃኽስስትኹ ዙራሙርካዳ ክምካ ቱዋቲንታ ክፃቶ እንኩርፅጝስ  ፍትሬት አብት ማንዲጚው እንፅኺ ጉድጛ እንፃኽስስታማጊ አኽⶓ ዲብስካ::

ፍትሬት አብት ማንዲጚው እንፅኺ እንፃኽስስትኹ ሰፍሪዳ ዲከረንስ ችግኞ ቴኬልጝስ ኽብፂ ኩሪስ ሺሽርስታማ ካሳቲታ ፄውጝዴስ ድምክና ቴኬልስትኹ ችግኝ ታምባኒ ዋይስታማ ሚፄ አግፃንታ ፄውኽ አኽⶓ እንክርፄካ::

ናካ እንፃኽስስታው ተፋሰሱ እንፅኺስ ግብርኒኩ ውማይቴንካ ብሽታንዳ አዌጅⶓ ዙሙንኩ አሬሳቻንቲ ትር 15ዴስ ጄሜርካማ እንፃኽስታንኩ አኽⶓ ድኹዌካ::

“ቤዴራ ብራፂ ካዌንስ ሾፌንስታሺኹ ዙራሙሪ አቕ ካኔ ኮቻኒስ ብቲ ካጋማ ዝባትኹሳ እንዴስ ፍና እሺኹስታ ዙርፅንስ ንጝስ ኩስጝናናጊያኽ” ንካ::

አሬሳቻንቲ አበበ አልማውኪላ እን ኬቤሊው ዝኩዋንቲ ያኻኒስ ጛ ዝኩዋኑ ዙራሙሪው ብቲ ትክሞ እያቲውስታ ማልጛ ጉዲስትኹ እሺⶓ ቶኬምካማ ፍትሬት አብት ማንዲጙ እንፅኺ ጄሜሩኒዴስ ፋሌንጋ እምፕልታቕ ቴክሎ ቴኬልጝስ፣ ኬሽኹሳ ሴብሎ አሜሬትጝስ ቴኬምስታንታ ያኼካማጊ አኽⶓ ዙሜካ::

እንዴስ ቤዴራ ዜሩኑ ሴብል ጉድጛ ዋጋቲው እሺⶓ ዲብሱንኩ አሬሳቻንቲ አበበ ፍትሬት አብቱሳ እንፅኼ ጄሜሩኒዴስ ናቴ ሴብል ጉድጛ ያኻማ ዋግⶓ እንክርፄካ::

ካጊ እሺኹ ብቲ ዙራማ ሴብል ጉድጛ ዋጋማ እምፕልታቕ ቴኬምስታንታ አኽⶓ ቶኬምካ:: አሬሳቻንቲ አበበ ፍትሬት አብቱ ልማት ጄሜራው ጊዝዳ እምፕልታቕ አምኔካማ ቻቤልጝዳ ችግር እሺⶓኪላ ጉሽካ::አሬሳቻንትካ ትክሞ አግፅⶓ ጄሜሩኒዴስ ፋሌንጋ ኩፅኒ ፋይስ እንፃኽስትካማጊ አኽⶓ ዲብስካ::

ትር 11ስ ጄሜራው ፍትሬት አብቱ እንፅኺስ እንፃኽስታውሳ ዙራሙሬ ጎሌልጝዳ እሺⶓ ጉሹንኩ አሬሳቻንቲ ሴብል እሺኹሳ ብቴ ሴብሎ አፄድካማ ጉሽካማጊ አኽⶓ ዙሜካ::

ተፋሰሱ ልማት እንፃኽስስትኹ ዙራሙሪዳ ክምካ ቱዋቲንታ ፄውስትⶓ ጉሹንኩ አሬሳቻንቲ አበበ ግብርኒኩ ውማይቴንካ ጉዶ ኩስጜ ቤንጝፄካማጊ አኽⶓኪላ እንክርፄካ::

“ዋሺኒኪ ኩሪስ ሺሽርስትኹ ብቲ ዙራው አኽጝስ ውላ ዙራሙርካ ፍትሬት አብት ማንዲጙሳ እንፅኼ እንፃኽስትጝ ቱስቴ” ንካ::

2017 ም/አታሱ ተፋሰስ ልማቱ ልቕልቕቲውሳ ሜድሬኾ ካስጝፁኑ ጊዝዳ ባንጂ ወረዳ ግብርኒ ፅፌት ጝናሱ አላፊ ወርክነህ ዳኛው ዙሙኑውስታጊ እምፕልታቕ ተፋሰስ ልማቱ እንፅኺዳ ኬሽኹሳ ሼውቴ ፌቴርጝስ ጊዝዴስ ጊዝሾ ኬሽጛማጊስታ ምርትስታ ምርታምት ዴሜክⶓ ጌሌፅካ::

ቴፋሰስ ልማቱሳ እንፅኼ እሳንስ እንፃኽስትጝስ ቤዴራ ቴርቱ እንፅኺ አቒው አይልስ ስፍሬ ጐሌልጝ፣ ክያሴ እንፃኽስትጝስታ እሊኩ ፍትሬት አብት ማንዲጙ እንፅኽካዋ እንፃኽስትጝዴስ ፌይኹስ አሬሳቻንትካስ ሼውቴ ፌቴርጙ እንፅኺ እንፃኽስትኹ አኽⶓ እርዳትፅካ::

አዊ ብሄረሰብ ቺፅጝፂው ግብርኒ ሜምሪው ትክትሊ አላፊ አዲሱ ስማቸው ብሄረሰቡ ቺፅጝፂው ፍትሬት አብት ማንዲጚው እንፅኺ ኬሽኹ አችዳ አግስታው አኽⶓ ቶኬምካማ እምፕልታቕ ጊዝቺፋ እንፃኽስታኑ ፍትሬት አብት ማንዲጚው እንፅኺስ ዊዳፊስ ቴኬምስታንታ ፄውጝስ እንፃኽስስታማጊ አኽⶓ ጌሌፅካ::

2017 ም/አታዳ 471 ተፋሰስካ እንፃኽስትጝስ 231 ሻይ አቒው አይል ጐሌልስትⶓ ጌሌፅካማ እን አሜትስ ተፋሰስ ልማቱሳ እንፅኼ እንፃኽስትጝስ ቤዴራ ቴርት አሌድስትⶓ እርዳትፅካ::