እምፕልሳው ትርክት ( ጉዶ እምፅጝ )

ታደለ አጋጄ

ሙእዘ ትበባት ዲያኮን ዳንኤል ክብረት “የትርክት ዕዳና በረከት” ናው ጛሪስ አቴምፁኑ ሜፃፍዳ ትርክት እሞይ እስታማ አኹ ዴስስ አላሚስ ቴርታው ዙሚ አኽⶓ ጌሌፅካ:: ሜፃፍዳ ፃፊስትኹስታ ትርክት ሚንቾ ጊዞ ታሪኮ፣ እምኔቶ፣ ባይሎስታ ካንቴ እሜው ያኹስ ዙሚስታው ምክንያቲ ዝኩኽያኽ:: ቴርትኹ አላሚስ አብርታ ካሳንኩ አሳብካዋስታ ታሪክካዋ እሚ::

ሚንቾ ጊዞ ትርክቱ ጉዳ አኽጝስታ ጉዳ ጋቲው አኽጝ ትርክቶ ኬሬፃንትካው ታፍዳ አኽⶓ ጌሌፃው ፁፍ ትርክት ጉድ አላሚስ ቴርቱኒ እምፕል አጌርዳ አግስታንኩ እዝብካ ክችዳ ቱትጚስታ እምፕልት ፌቴርስቴ:: እሊውሾስ ዴሜካ ትርክት ኬርትኹ ዳድስ ቴርታኒ ኩፂ እምፕልታቕ ክቻዳ ጋቻ ፌቴርስታታ ፄውጝስ ቱትጜስታ እምፕልቶ አቲሳው አኽⶓ ካንትፄ::

እምፕል ዎጌኑ አላሚስ ኬሬፅስትኹ፣ ሊሊትቶስታ ሚንቺቶ ቻቤላቲው ዲግጝጚስታ ቱትጚ አላማ ያኻያሱ፣ ህብረ ብሄራውቶ ፌቴራቲው ትርክት ፌዩንኩ ዝቤንካዳ ይቶፒያ ሚንቺትስ ፌቴና:: ሚንቾ ዋይሜኪላ ኬይፃ::

ይቶፒያው ትክላይ ሚኒስቴር አቢይ አህመድ (ዶ/ር) ሊሊትጙንኩ ሜድሬኽካዳ ፄውኑ ዙሚትጚስ ይቶፒያስ ኽሳንቴ ትርክቶ ቴርስጝ ቱስታው አኽⶓ ጌሌፅካ:: እምፕልሳው ትርክቱ ጊሊፅፂኪላ ህብረ ብሄራዊ እምፕልት፣ ፍታዊ እዝቡ ቴኬምስታንትስታ እምፕልት አኽⶓ ካቢትጝፄካማ ዙማኒስ እንኮኽስቴ::

ይቶፒያው ህብረ ብሄራዊ እምፕልት ኬፍናታ ጚጛርትጛዴስ ፌይኹስ እሊኩስ ታክስጝ፣ አይጚኒስታ ቻሱሳ ይጋሬ አጀንዴ ኩፕፅጝስታ አርቤና አኽጝ ቱስታው አኽⶓ ጉሽካ::

አውጚው ኦንላይሊ እጂጜ ፄውንኩ ሀዋሳ ዩኒቨርሲቲው ታሪኩ ክንትፃንቲ ምስክር ትላሁን ሚንችካ ዝቤንካስ አገው እዝብስ እይስትኹ ኬርትኹ ትርክት ኮንኪዳስታ አይትዳ ቻኒስቶ ፌቴርኹ አኽⶓ ዙሜካ::

አገው እዝብ አክሱሙ ምንግስትዴስ ቤዴራስታ ፋሌንጋ አገረ ምንግስቱ ግንባቲዳ ኽሳንቴ ፍሼ ፊትጙኽ እዝብ አኽⶓ ቶኬሙንኩ ታሪኩ ክንትፃንቲ አገው እዝብ ዛጉዌው ምንግስትዳ አጌራዋ 330 አሜትካዋ ቺፅጝፅጝስ ኽሳንቴ ታሪኮ እንፃኽስትኹ እዝብ አኽⶓ ጌሌፅካ::

አገው እዝብ ኪነ ህንፃው ትቤብስ አሌምዳ ጌሬምፃውሳ ላሊበላ ብሽታንካዋ አምፕዴስ ብቲሾ ግቢትጝስ አቕቶስታ ካሌቕቶ አሌምስ ካንትፅኹ እዝብያኽ ኑንኩ ክንትፃንቲ ይቶፒያንካው አይቱ ጉሽፂ ያኹኽ እዝብ ሚንችካ ዝቤንካስ አገው እዝብካስ አይስትኹ ኬርትኹ ትርክት ኮንኪዳስታ አይትዳ ቻኒስት ፌቴርስታታ ፄውⶓ ዲብስካ::

አገው እዝቡሳ ታሪኮ እንፂስጝስ ሚንችካ ፅሬትካ ፄውስትⶓ ቶኬሙንኩ ታሪኩ ክንትፃንቲ 330 አሜቱ ታሪክ ዝኮስኩስ 120 አሜትካ ይቪቻ እስታማ ሚንችካ ምሁራንካስ ኬርትኹ ዳድስ ፃፊስትⶓ እርዳትፅካ::

ኬርትኹ ዳድስ ኮንኪስ እይስትኹ ካንቲ ኮንኪ ሌጌሳቲታ ፄውጝዴስ ድምክና ዙሚጝስ ሴሜራንታስታ አውጚው ኮንኪ እሊኩ ኮንክካዴስ እንፁኺ ያኻማ ካንትስቱስ እጂⶓ ኽይትጝፄካ::

ኮንኪዳ ፄውስትኹ ኬርትኹ ትርክትዴስ ድምክና አይትዳ ዙሚስታኒስ እጂንኩ ሴጙንኩ ኬርቱንኩ ትርክትካ እዝብ አይትስ ኩራቲታ ፄውጝዴስ ፌይኹስ እዝብካ አደባባይዳ ጛሬ ጉሽካማ እንዜጛቲንታ ቻኒስቶ ፌቴርⶓ እርዳትፅካ::

“ኬርቱንኩ ትርክትካ ክቼንታ ውላ አገው እዝብ ታምቦ ፊትጝጝ ቱስቴ” ኑንኩ ክንትፃንቲ ጛው ኮንኪስ ሴሜራኑላስ ዋዳኪ ስፍሪዳ ዙሚጝስታ ኮንኪስ ኩሪጝ ቱስታው አኽⶓኪላ ቶኬምካ::

ክንቲኩ ኾትካኪላ ኮንኪው ልግስስ ጛውሳ ፍሼ ፄውጝ ቱስታው አኽⶓ ጌሌፁንኩ ክንትፃንቲ ምሁራንካ ዴሜካ እዝቦ ቤንጝፃንኩ ጉዳይካዋ ባይጝስ እምፕልሳንኩ ጉዳይካዳ ትኩቶ ፄውጝ ቱስታው አኽⶓ ጉሽካ::

አገው እዝብ አብርቱ ጉዳይካዳስታ ትክምካው ዙሪዳ ኩስጚ ፄውስታው ሜድሬኽ ቴርታማጊ እምፕልትዳ እንፃኽስትጝ ፋይፃው አኽⶓ ቶኬምካ:: ክርፂ ዳድስ ኬቤርስታንኩ አገው ፌሬስቴንካውሳ ባሎስታ እሊኩሳ እዝብኩ ባልካዋ እዝቡ እምፕልትስ ቴኬምስትጝ ፋይፃው አኽⶓ እርዳትፅካ::

ዲጊ ጊዝዴስ ናቴ ብልፅግኒ ፓርቲስ እዝብካስታ ብሄርካ ክቻዳ ቤንጝጜስታ ጋቻዋ ፌቴራንኩ ትርክትካ ይጉዌካማ እምፕልሳንኩ ትርክትካ ሜሴሬትስታንታ ፅሬት ፄውሰታማጊ አኽⶓ ጉሽካ:: እምፕልሳው ትርክት አጌራ ምንግስቶ ፌቴርጝዴስ ድምክና አገረ አቕ ፋይንታ ልቕልቕናንታ ኬፍንኹሳ ፍሼ ፊትጛው አኽⶓ ጌሌፅካ::

“እንዴስ ቤዴራ ይቶፒያዋ ቺፅጝፁንኩ ምንግስትካ አጌራዋ ሌጌፃውሳ ትርክቶ ፌቴርጝዴስ ኪቻ ጛውሳ ትክሞ ይቪቼ ኬቤርፃውሳ ትርክቶ ፌቴርጝስ አጌራ እንግርግራ ቲጉዋታ ፄዋ” ንካ:: ፅንፌንትስታ ፅንፌንካ አይልካስታ ጛውሳ ትክሞ ይቪቼ ማንዲፃንኩ ኬችካ ፌቴርስትጝ አጌራ ካቢትጝጚስ ጋቻሾስታ አሬጌግጜ አቲጝሾ ትያታ ፄውኽ አኽⶓ ጉሽካ::

ክንትፃንቲ ምስክር አጌርታ ፅንፌንቱ ታክስጝጚ ቺጊርፂ ዎክትዳ ታምቡኽ ጊዝዳ ብልፅግኒ ፓርቲ እምፕልሳውሳ ትርክቶ ፌቴርስታታ ፄዋማጊ ዝኩኽ ፅሬት ይስጝፃው አኽⶓ ቶኬምካ:: አብርቱ አኹኪ እምፕልቱ ትርክት አጌርታ ፌቴርስትጝ አጌር አቕ ችግራ ጋቲታ እምፕል ስፍሪዴስ እሊው ስፍሪሾ ልቕልቕንካማ ኔፃኔትስ እንፃኽስታንታ ፄዋው አኽⶓ ጌሌፅካ::

እምፕልሳው ትርክት እዝብካ ክቻዳ ታራታርጚ ይጉዋታ፣ ብሄርካ ክቻዳ ኪቪቪርጚ ይንታታ፣ ቲቪቪርጚስታ እርዳትጚ ይስጛታ፣ አጌራዳ ይሴን ምንግስት ፌቴርስታታስታ ሊሊትጙንኩ ባይልካ ሌጌሳንታ እንቲታኪ እምፕል አጌራዌ ኢኮኖሜ አድርፅጝስ ኬፍንኹ ትክም ዝኩኽ አኽⶓ ጌሌፁንኩ ክንትፃንቲ እምፕልሳው ትርክት ዋይሚስታ ያኻታ ውላ እዝብ አሴቴፍጝጝ ቱስታው አኽⶓ እርዳትፅካ::