ክንቲ ፃንኩታ ይማሊዳ

አለሚቱ የኔት

እምፕል አጌሩ ልማትስታ ልግስስ ሰላም ኬፍንኹ ፍሺ ዝኩኼኽ:: ሰላም ዋይሚስ አሴልስታላኬኽ:: ቴሜንኪ ያኻ ሲፊርፂኪላ እላኬኽ ሰላምሲ:: ጛርትስ እንፃኽስታማ ኪስስትጝዴስ ጄሜራማ አጌራዋኺስታ ሰላም  ድሱኒዴስ ዋሺኔኪ ኮውሳ ራዬስታ ግቦ ሳኪትጝፅጝስ ካሊስታላኪ::

ሊሊትኑስኪ ሰላም ክንትጝ ክንትፅጙ ቴግባርስኪላ ዝኩኽ ፍሺ ጉዋልንኹ አኽጝስ አማኻሪ ክልልዳ አሜትዴስ ጃላ እጂኹ ሰላሙ ዳንጉዊኒስ ኪላ ሚንችካ ክንቴ ፋያንትካ ፋይታ ክንትጝስ ካሌካያኪ:: አኽጝስኪ አክምስታ እርዳታንቲ ዝኩክኪላ ዙራሙሬ ባይፅካማ ሰላም ዝኩኽ ዙራሙሪሾ ካስጝስ ክንታና:: ይማሊ እምፕላንቲስታ ክቻክቺ አች ክንቲ ጝና ኩፅኒ ዙራሙሪው ሰላም አምንፃንቲ አኽጝስ ክንትጝ ክንትፅጙ ካስት ጉድጛ ካስጛማጊ አኽⶓ 8ንቲ ቤኑ ክንታንቲ ደመከ ባንቴ አውጚው ቴሌቪዥንስ ስልኪስ ዙማ:: ክንትፃንኩ ክንትፃንትካ ክንታካስ ታክሳንኩስታ ክንቲው ፃንኩትስ ቼኔክስታንኩ አኽጝስ ፕሮግራሞ ፍሽካማ አንቤባንታ ፄውጝስስታ ክንቲ ጝናዳኪላ ፊቴ ጊዞ ቴኬምስትካማ እርዳታንኩ አኽⶓኪላ ክንታንቲ ደመከ ዲብሳ:: ክንቲ ጝናዳ እሺኹ ቤኑ ፄቤብጝኪላ እምፕልታቑ ቴሳትፉስ ድምክኒ ቤን ግቢትሰትጝስ ኽይስትⶓስታ ሼውታ ቹኒትጜካማ ክንትጝስ ካሊፁክ አኽⶓ እንክርፃ::

ፌይኹ አሜትዳ ፌቴንስቱንኩ 8ንቲስታ 6ንቲ ቤኑ ክንታንትካኪላ ክንትፃንትካው እርዳቲስስታ ጛጂሱ ፂኒስጙ ፅሬትስ ውላጊ ሲፋው ቤንሾ ፌያፌይጝⶓኪላ ክንታንቲ ደመከ ዙማ:: እኒ ክንታንትካው ወይሚ ይስጝፃው አኽጝ ዴሜካ ጛጂኪላ ይስካማ ክንታንታ ጉሽጝፁክ አኽⶓኪላ ቶኬማ::

አቶ ሀይሉ መለስ ይማሊ ኬቤሊው ዝኩዋንቲ ያኻኒስ ክንታንትካ ክንቲዳ ዋይሚስታ ያኼካማ ሲፋው ቤንሾ ፌያንታ ፄውጝስ ክንትፃንትካው እንፃኽስትጚ ይሴን አኽⶓ ዙሜካ:: እሊው ዙራሙሪዳ ክንቲ እይስትጝ ኬውጙስውላ ጛጂሱ ዙራሙሪው ሰላም ማንዲስታታ እምፕልታቕሊ ኩስጝጝስ ላንቢሳኺታ ኬውጛ ያቓያሱ አኽⶓ ድኹዌካ:: ቹዋ ታብል ክንቲ ጝናሾ ካስጝስ ጄርካውሳ ክንቴ ሲፍጝጙሳ አኺኔ ካሲጝስ ጝንዳኪላ እርዳታንኩ አኽⶓስታ ክንትፃንትካኪላ ኩስጜ ፄዋንኩ አኽⶓኪላ አቶ ሀይሉ እንክርፄካ:: ክንትፃንትካሊ ካሳማ ኩስጝጝስ አሜቻቲው አኺኒ ዝኩኒውላ ስልኪስኪላ ያኹኒ ታምትጝጝስ ጄርካዳ እይስታውሳ ካንቴ ቻቤልካማ ክችስጝስ ክንትጝ ክንትፅጙ ካስት ኬሽጙኽ አኺኒስ ካስጛታ ፄዋንኩ አኽⶓኪላ ድኹዌካ:: እምፕልታቕ ካስጝፁኒ ኩስጚስኪላ ክንቲጝናዳ ቤኑ ፄቬቭጝ እሺኹሳ ችግር ኽይጝስ ጌንዜቦ ፍሽጝፅጝስስታ ግርብስ እንፃኽስትጝስ ሶኼታ ድምክኔ ቤኖ ግቢትⶓኪላ አቶ ሀይሉ ዲብስካ::

አቶ ሀብተማርያም ታከለ ይማሊ እምፕላንቲስታ ክቻክቺ አች ክንቲ ጝናሱ ክንትፃንቲያኽ:: ክንቲውሳ ፃንኩቶ ማንዲፅጝስስታ ክንታንትካ ክርፄ ዋይሜ ሜዜጌብፃንታ ሜዴብስትኹሳ ጊዞ ቱስቲስ ቴኬምስትካማ ክንትፃንኩ አኽⶓ ዲብስካ:: ውላ ክንታንትካው ካሊጝት ክቻክቻ ጋው ያኻኒ ዴሜካ ፊቴ ጊዞ ቴኬምስትካማ ክንትፅጝስ ክንታንትካዋ እርዳታንኩ አኽⶓኪላ ክንትፃንቲ ዙሜካ:: ካንታ ግቢቲ ፋይፃንኩ ሳይንሱ ክንትካዋኪላ ቴግባርስ ሙኪሪስ ክንትፃንኩ አኽⶓ ድኹዌካ:: ፍታኒውሳ እይጜኪላ ውላጊ ክንታንትካዋ ጛው ካሌቕትስ ዜሬቕቲኒ፣ ክቻክቺስታ ኬፍቲኒ ንካማ ቤንጝስ ፌቴናንኩ አኽⶓኪላ ቶኬምካ:: እንሳ ፄውጝ ዴሜካ ዜሬቕቲኔ ዋይሜ ያጋንኩሳ ጛርትስ እርዳትካማ ክቻክቺሾ ቱዋንታ ፄውጝስ እርዳቱኽ አኽⶓኪላ እንክርፄካ::

ይማሊ ዙራሙሪው እምፕልታቕ ሰላሞ ፋያንቲስታ ዙራሙሬ ማንዳንኩ አኽጝስ ቲን ዌና ክንትጝ ክንትፅጙ ቴርት ካስጛማጊ አኽⶓ ጌሌፁንኩ ዴሜካ ክንቲ ጝናሱ ጛሪ አምባው አምሳያኽ:: ክንታንትካ ቢካንታ ፄውጝዳኪላ ክንትፃንትካሊ ቱትጝጚስ ክንትፅጙሳ እንፅኼ ቱስቲስ አኮሜችካማጊ አኽⶓኪላ እርዳትፅካ::

ዋሌንካ ወረድካዴስ ሰላሙ ችግር ምክንያታስ ፌኔኬልጜካማ ይንታንኩ ክንታንትካዋኪላ ቻቤልካማ ክንትፅካማ አኽⶓ ጌሌፅካ:: ክንትፃንትካ ካስጝፃኑ ይሴን ክንትጝ ክንትፅጙ ቴግባርስ ፌይኹ አሜትዳ 6ንቲስታ 8ንቲ ቤንዳ ፌቴንስቱንኩ ውላጊ ክንታንትካ ሲፋው ቤንሾ ፊይⶓኪላ አቶ አምባው ቶኬምካ:: ይንታውስኪላ አግስትኹሳ ዋይሜ ሲፍፅጝስ ዜሬቕቲኔ ዋይሜ ሜዜጌብፃንኩ ክንትንትካዋ እርዳትጝስ ውላስጊ አክምስ ልኺትጛንትካ ያኹንኩ ክንታንትካዋ አፌርጝስ እክዶ እሚⶓኪላ ጌሌፅካ:: ክንቲ ጝናዳ ክንቴ ቴግባርሊ እምትጝፃማ ክንትፅጝስ ካሊስታታ ፅኻራዋ ስኹፃንኩ፣ 1ሻይዴስ ጃላ ቡኑሳ ችግኞ ቴኬልካማ ካንታ ግቢቲስ ክንትፅካማጊ አኽⶓኪላ አቶ አምባው እርዳትፅካ::

ዙራሙሪው እምፕልትቕ ክንቲስ ዝኩኽ ትኩትስኪላ ጌንዜቦ ፍሽጝፅጝስስታ ግርብስ እርዳትጝስ ክንቲጝናዳ እሺኹሳ ቤኑ ፄቬቭጙሳ ችግሮ ጌጌውጝስ ሲዚ ሌኻ ዚንⶓ ኮርኮሮ ሶኼታ ቤኖ ግቢትጝስ ካሊⶓ ጌሌፅካ:: ጉዋንጉዊ ወረዳዳ አግስታንኩ 69 ክንቲ ጝንካዳ ሰላምስ ክንቲ እይስታማጊ አኽⶓ ጌሌፁንኩ ዴሜካ ወረዳው ክንቲ ፅ/ጝናሱ አላፊ ኤፍሬም አለምረዊያኽ:: ወረዳዳ አግስታንኩ ክንቲ ጝንካዳጊ አጌር አቩቑ አችስ ልኺትጛንትካ አኽጝስ ካላንኩ ክንታንትካዋ አፌርጝስኪላ ትኩት እይስታማ እንፃኽስስታማጊ አኽⶓ ቶኬምካ::