አሜሪካ ቴክሳስ ላጛንቲ አች ክንቲጝናዳ ልኩ ኩታ ኬቹ ሴሌቴንፃንቲ ክንታንትካዋ ፉራ ጋቲታ እምፕሎ ሳቶ ፑሽአፖ እንፃኽስታንታ ጌዴድፅጝስ ታምብኹ ቲኑ ኬሴትስ /ጉዳትስ/ ክንታንትካ ሆስፒታልሾ ቱⶓ ኦዲቲ ሴንትራሉ ታምትጝፂው ፍንዳ አንቤብፃ::
ሮክ ዋልሄዝ ላጛንቲ አች ክንቲ ጝና “ጁኒየር ቫርስቲ” ልኩ ኩታ ኬቹ ቤዴራሱ ሴሌቴንፃንቲ ጆን ሃረልስታ እርዳታንቲ ሴሌቴንፃንቲ 50 ደኪካው እንክራንትካ ስልታኒዳ “ፑሽአፖ” ፍራጊቲታስታ አኾ ዝቓኑ ጊዝ እይስታውላስ እንፃኽስትጝስ ሆስፒታላ ቱጝ ድኹስታ::
ቑንዚስ ፂኪስትኹ እምፕል እንክራንቲው ታብሊ ዲግሱኑ ክስዳ እምፕል እንክራንቲ እንፃኽስትኹ ኬርትስ 16 ፑሽአፖ እንፃኽስታንታ ጌዴድስትጝ ዎንጄል አኽጝስ ሴለቴንፃንቲ ኪፂስታታ ፍርድ ጝናስ አቤቱቴ ዲግሳ::
ስልታኒው ዎክትዳ 23 ኬርቶ እንፃኽስቱንኩ 26 እንክራንትካ ጛራጛራ 368 ፑሽአፖ እንፃኽስታንታ ፄዋ ሴሌቴንፃንቲ::
አኽጝስኪላ አዜዝስቱኑ ስፖርቱ ልቕልቕቲ 26 እንክራንትካዳ ፄውስትኹ ምርማሪስ “ራሃአብዶም ዮሊሲስ” እስታው ቱንቺው እንኪቲኒ ፌኔድጝስታ ብሪ ክቢጙ ምልኻትካ ካንትስትካ::
እንክራንትካ ፌፄምካ እስቱንኩ ኬርትካ ክቻዴስ ቱስታ ጋቲው ሴይጚ፣ ሴሌቴንፃንቲሊስታ ዳኝካሊ ፄውስታው ጉዳጋቲው ታምትጚ፣ ጉዳ ጋቲው ታክስጚስታ ፄጌርጙንኩ ቶኬምስትካ:: ክንታንትካዳ ቲኑ ሲፋሲፍጚ ፄውስታውላስ ይጉኒጊ እንኩላሊቲውስታ ሼው ቑንዛስ እምስትጝስ ክርጝስ ታምብጝስ ካላና ኑስ ታምትጝፂው ፍንዳ ቶኬምስታ::