ልቕልቓንቲ ስቱዲዮ /ኦቢቫን/

አለሚቱ የኔት

ቴክኖሎጂ ዶት ኦርግዳ አግፅንኹ ንባር ቶኬማውስታጊ ልቕልቓንቲ ስቱዲዩ ዋሺኔኪ አኺኔ ስፍሪዳ ያኻማ ውላጊ አሌምዳ አግስታንኩ ካንታንትካስ ታምፅጝስ ካሊፃዊያኽ:: ውላጊ አኺኔ ታምፅጝስ ዴሜካ ውላዋጊ ዲቦ አኽዳ እሚኹ አኽጝስ ፌያፌይጛውሳ ኬውጝጝዴስ ይጉፅጝዴስ ጃላ ዴስስትኹ ዳድስ ኩታ ፌያፌይጝፅⶓ ካስጝፅጝስ ፋውሳ ኬፍቲኔ አብቶ  ይጉፄ:: እን ቴክኖሎጂውሳ ፍሼ ጉሽጝስ ኪላ “ሚንችካ ታምትጝፂው እንፅኺዳ ቤዴራፍኒ” ኑስ ጌሌፃ:: ኦቢቫኖ አኹኪ ልቕልቓንቴ ስቱዲዩዋ ድረገፅ አንቤብፁኽስታጊ ጂሚሪው ልቕልቓንቲ ስቱዲዩ ቴግባራዋ ፄውስቱኽ እንግሊዙ ድንጉሊ ሚዲያው ኾት ቢቢሲዳ ያኹስ ዝቤን ዴሜካ አዝቼ ዳር አርፊ 1936ሲያኽ::

ናካ 30 አሜትዴስ ቤዴራ ላጜትስ ቼፍስታንኩ ጋዜቴንካስ በኩር ጋዚቲስ እንፅኼ ጄሜርኹ ናኪኒ አሚኮ ናካዳ በኩር ስስታ ሹኻ ብሄረሰብካው ኮንኪው ጋዜትካስ እንቲታኪ 12 ኮንክካስ ቴርትካዋ ታምፃማጊ አግስቴ:: ጊዝዴስ ጊዞ ኬሽጛማጊ ይንቱኽሳ ቴክኖሎጄ ቴኬምስትጙ አክምስታ ፋይ ዴሜካማጊ አንትጝስኪላ ሚንችካ ታምትጝፅካው ታሪክስ አሌም ታምቡኽሳ ልቕልቓንቴ ስቲዲዩዋ አጌልጝስ ካላ::

እን ልቕልቓንቲ ስቱዲዩ አኹኪ ኦቢቫን ዌና አኽጝ ዴሜካ ቤዴራ ሊሊትጙንኩ ፕሮግራምካዋ ኩቲስ ኩታ ካንታንትካስ ታምፅጝስ ጌቴማው እሺኹሳ ችግሬ ጌጌዋውያኽ:: ፃንኩቶ ማንዱኽስታ ዳሊጝት ዝኩኽሳ ምስሎ ካንታንትካስ ታምፅጝስ ዝኩኽ ፍሺኪላ ጉዋልንኹዊያኽ::

ኦቪቫን አኽዳ እሜኩ

ፕሮዳክሽኖ ቼፍጝጝስ፣ ድምፁሳ ቼፍጝጜስታ ሴንትራል አፓራተስ እስታንኩ ቤንካዋ ፃያ

ሊሊትጙንኩ አኼንካዋ ቼፍጝጛው ማስኮት ዝኩኼኽ::

ክችጙኽ አይሩ አኺኒ ዝኩዋታ ፄዋው ኤርኮንዲሽነሩ ቴርት ዝኩኼኽ::

ድምፆ ቼፍጝጚው ቤን ድምፆ ቼፍጝጝስ ካሊፃው ሚክስር፣ ስፒከርካስታ እሊኩኪላ ዝቤናውካ አክኽካዋ እሚኹዊያኽ::

8 ማልጜ ዝቤናውካ ቢዲዮው ካሜራ ዝኩኑዌኽ

ዳላው ኤሌክትሪክ አይሎ አግፃው ጚጛርትጛሱ ጄኔሬተር ዝኩኺያኽ ኑስ አሚኮ ኦንላይ ንባሮ ፍሻ::