ታደለ አጋጄ
አኾቲ ልማቱ እንፅኺስ ትክሞ አግፄካማጊ አኽⶓ ባንጂ ወረዳ ፂንኪሲ ኬቤሊው አሬሳቻንትካ ዙሙና፡፡
ዲጊ ጊዝዴስ ናቴ አኾቲ ልማቱ እንፅኺው ልቕልቕቲ ኬሽኹሳ ኪሴ ካንትፃማጊስታ አሬሳቻንትካኪላ ትክሞ አግፄካማጊ አኽⶓ ዲብስካ፡፡
ባንጂ ወረዳ ፂንኪሲ ኬቤሊው ዝኩዋንቲ አሬሳቻንቲ አለምከረ ይሁን አኾቲስ ሊሊትጙንኩ ሴብልካዋ ሊሚፅካማ ቴኬምስታንታ አኽⶓ ዲብስካ፡፡ እንዴስ ቤዴራ ጄሜርካማ አኾቲስ ሊሚፅጙ ዴስ ዝኩኒውላ አግፃሺኑ ትክም ኩፅኒ ልቓ እሺኾ፡፡
ናካዳ ግባቶስታ ጉልሌ ዜሮ ቱስቲስ ቴኬምሰትካማ ሊሚፅጝስ እንዴስ ቤዴራ አግፃሺኑዴስ ኬሽኹሳ ሴብሎ አሜሬትካማጊ አኽⶓ ድኹዌካ፡፡ አሬሳቻንቲ አለምከረ ኪንዲ ሄክታር ብቲዳ ስንዳዬስታ ቢራውሳ ስምኬ ዜሬካ፡፡ ናካዳ ኬሽኹስ ዋጋማ ካንትⶓ ቶኬምካማ እንዴስኪላ ጉዶ ምርቶ አግፅጝስ አኬድⶓ ዙሜካ፡፡
ፌይኹ አሜትዳ ኪንዲ ሄክታር ብቲዴሰ 22 ኩንታል ምርቶ አግፅⶓ ቶኬምካማ ንጙዊኒ አሜትዳ ኩፅኒ ዎክትስ ግባትስታ ጉልሊ ዜር ዲጋማ ዜርጝስ እንኮጚኒዴስ ኽሳውሳ ምርቶ ማንዳንኩ አኽⶓ ዲብስካ፡፡
አምፕል ብቲዳ ሊሊትጙንኩ አይኔትካ ሴብልካዋ ዜርጝ ቑንዚ ኬሴትስታማጊ ክሳሪዳ ታምፃሺⶓ ቶኬሙንኩ አሬሳቻንቲ ግብርኒው ውማይቴንካውሳ ኩስጜ ቻቤልጝስ ምስሌ ሴብሎ ክላስተርስ ሊሚፅⶓ ዙሜካ፡፡
ዜሩኑሳ ሴብሎ እሌቱ ምግብስ እሽፅጝዴስ ፌይኹስ ጌቤልስ ዲግስጝስ ፃንኩቶ ማንዱኽ ዳድስ አሜሬትጝ ቱስታው አኽⶓኪላ ድኹዌካ፡፡
እሊት ፂንኪሲ ኬቤሊው ዝኩዋንታ አሬሳቻንታ ዊዛሩ አማረች አለማየሁ ዎክትስ ግባት ዲግጝስ ስንዳዬስታ እሊኩ ቴጋንኩ ቴክልካዋ ሊሚፅጝስ ቴኬምስታንታ አኽⶓ ዙሜካ፡፡ ግብርኒኩ ውማይቴንካውሳ ኩስጜ ቻቤልጝስ ስንዳዬስታ ሊሊትጙንኩ ቴጋንኩ ቴክልካዋ ሊሚፅጝስ ኬሽኹሳ ምርቶ አግፄካማጊ አኽⶓ ዲብስካ፡፡ ስንዳይ እሌት ምግብስ እሼውስታ ኬሽኹ ምርት አግስታው አኽⶓ ቶኬምጝስ ዝኩዊኒዳኪላ ኪሴ አግⶓ እንክርፄካ፡፡
ፂንኪሲ ኬቤሊዳ አኾቲ ልማቱ ግብርኒው ውማይቲኒ መሰረት ብሩ ኬቤሊዳ አኾቲ ልማትስ ጉድ ልቕልቕቲ ዝኩⶓ እርዳትካ፡፡ ናካዳ ዜርስትኹ ሴብልዳ አሬሳቻንትካ አሪሜ አሬምጝስታ ግባቶ ፄውጝስ ሴብሎ አንኬባኬብካማጊ አኽⶓ ጌሌፅካ፡፡
ኬቤሊዳ 275 ሄክታር ብቴ አኾቲስ ሊሚፅካማጊ አግስታንኩ አኽⶓ ጌሌፁንኩ ግብርኒው ውማይቲኒ እምፕል ሄክታር ብቲዴስ 35-45 ኩንታሎ ኺስታ ምርት አግስታው እስታማ ማንዲስታው አኽⶓ እርዳትፅካ፡፡
ንጙዊኒ አሜትዳ አሬሳቻንትካ ፋያኑሳ ላካሳ ግባቶ ቴኬምስትጝስ ዜሮ ዜርጝስ ኬሽኹ ምርት ማንዲስታው አኽⶓ ቶኬምካ፡፡ አሬሳቻንትካ እንዴስ ቤዴራ እምፕል አይኔት ሴብሎ ዜራቲንኩ እሺⶓ ቶኬምካማ ናካ ኩፅኒ ምስሌ ሴብሎ ክላስተርስ ሊሚፃንታ ፄውስትⶓ እርዳትፅካ፡፡
አሬሳቻንትካ ኬሽኹሳ ምርቶ አሜሬታንታ ሙሬኺስታ ካስጝስ ውማዩሳ እርዳቴ ፄዌካማጊ አኽⶓ ቶክምካ፡፡
ባንጂ ወረዳው ግብርኒ ፅፌት ጝናዳ አኾቲ ልማቱ ውማይቲኒ አምሳሉ አንተነህ ወረዳታጊ 3ሻይ792 ሄክታር ብቴ ሊሚፅጝስ አኬድካማ እንፃኽስትካማጊ አኽⶓ ጌሌፅካ፡፡
ንጙዊኒ አሜትዳ አኾቲ ልማቱ እንፅኺዴስ 401 ሻይ 935 ኩንታል ምርቶ አሜሬትጝስ አኬድⶓ ጌሌፅካ፡፡ አባላምቲ ዙሪ አኾቲ ልማቱ እንፅኺ እንፃኽስትⶓ እርዳትፅካ፡፡ ላጛንቲ ዙሪ አኾቲው እንፅኺስ ቤዴራ ቴርቶ ፄዌካማጊ አኽⶓኪላ ቶኬምካ፡፡
ላጛንቲ ዙሪ አኾቲው እንፅኺስ አኹ እንፂጝ ጌቴማቲታስታ ፋይፃውሳ ግባቶ ዋኽትጝፅጝስ አሬሳቻንትካስ ዲጋታ ፄዌካማጊ አኽⶓ ጉሽካ፡፡
ወረዳታ 7 ኬቤልካዳ አኾቲ ልማቱ እንፅኺስ ግብርኒኩ ውማይቴንካ እርዳቲ ፄዌካማጊ አኽⶓ ጉሽካ፡፡ እሊኩ 13 ኬቤልካዳ ኩፅኒ ፄትቲው ችግርስ እርዳቲ እላቲው አኽⶓ ጌሌፅካ፡፡
አሬሳቻንትካ አኾ ቱስቲስ ቴኬምስትካማ ኬሽኹሳ ሴብሎ አሜሬታንታ እንፅኼንቶ ፌያፌይጝፄካ፡፡