ቲን ሜድኑ አግልግሎቲ እምፕልታቖ ቴኬምስታንታ ፄዋማጊያኽ

አለሚቱ የኔት

እምፕልታቕ አቩቑ ቲን ሜድኑ አግልግሎቲስ ቴኬምስታንታ አኽጝስ ካሊⶓ ባንጂ ወረዳው ዝኩዋንትካ ዙሙና::

ቲን ሜድኑ አግልግሎቲ ቤዴራማ ፄውስታው ዜሬቕቲኒ ሜዋቹስ አባል ያኹኽ አቒዳ ቲን አዌክስትጛ ጌቴማኒ እክምኒው ፍሺ ሾፌንስታያው ሴልያኽ::

ባንጂ ወረዳ አርሲ ጌምቤኽ ኬቤሊው ዝኩዋንቲ አቶ ባይነሳኝ አለሙ 2010 ም/አሜታዴስ ጄሜራማ ቲን ሜድኑ አባላ አኽጝስ ቴኬምስትካማጊ አኽⶓ ዙሜካ::

ቤዴራ ቲንዳ ጌቴማውሳ ችግሮ እምቢትንካማ ጌጌዋቲንኩስታ ቑንዜ ሴሜትካማ ክርጝስጊ ታንባኒስ እሺⶓ ታክስፅካ::

ቲን ሜድኑ አባላ ያኹኒዴስ ናቴ ኩፅኒ ውላጊ ጝናቕዳ ቑንዚው እንኮኽስት ካንትስቱታ ጄሜርካማ ቲኑ ኾትሾ ካስጝስ ክችክቼ አግልግሎቴ አግፅጝስ ቴኬምስታንታ አኽⶓ አቶ ባይነሳኝ እንክርፄካ::

ቑንዳስትካማ ቲኑ ኾትሾ ካሳኒስ አግፃኑሳ አግልግሎቴ ዋኻ ፄዋቲንኩ ጉዳይካ ክቻዴስ አዜዝስታውሳ እጆ ምንግስቱ ኾትዴስ አቲⶓኪላ ዳንጉዊኒታ ቶኬምካ::

ቲን ሜድኑ አግልግሎቲስ ቴኬምስታንታ  ያኼካያስኩ ሙሪኩ ዝኩዋንትካዋጊ ጁትጝፄካማ አባላ ያኻንታ ፄውⶓኪላ አቶ ባይነሳኝ ዲብስካ:: እምስትኹ አሜትስኪላ አግልግሎቴ አግፅጝስ ካሊፃውሳ ሜዋቾ ቤዴርካማ ኬይጝስ አዴስፁንኩ አኽⶓ ድኹዌካ::

ዊዛሩ አቡኔ አለነ ኪላ እን ኬቤሊው ዝኩዋንታ ያኻኒስ ቲን ሜድኑ አግልግሎቲ እሜ ይንቱታ ጄሜርካማ አባላ አኽጝስ ቴኬምስትካማጊ አኽⶓ እንክርፄካ:: ቤዴራ ቑንዳስታኒስ አኬምፅጝስ ካሊፃውሳ ጌንዜቦ ፋይጝፂንምባኺስታ ቑንዜ ዴሬፃማጊ አካላትዴስ ሴጋ ያኻንኩ ናማኪ ክርጝስጊ ታንባንኩ እሺⶓ ቶኬምካ:: ቲን ሜድኑ አባላ ያኹኒዴስ ናቴ ኩፅኒ ቤዴራ ሳሴርታ ካንትጝስ ጝናኻዳ ፌይፃሺኑሳ አባላ ያኹኒዴስ ናቴ ኩፅኒ ቤዴራ ሳሴርታ ካንትጝስ ጝናኻዳ ፌይፃሺኑሳ ቑንዜጊ እሜ ካስጝስ አኬምስታንኩ አኽⶓ ዲብስካ:: ቲን ሜድኑ አግልግሎቲ አክማ ጋንኩሳ እርዳትጝስ ካሊፃው እክምኒው ሴል አኽⶓኪላ ዊዛሮ አቡኔ ቶኬምካ:: አግልግሎቴ እይጜ ካንትኹስኪላ ውላጊ አባልካ ዋኽስ ዋኾ አግልግሎቴ አግፃና ንጝስ ቼጌርፃውስታ እጆ ሼውታ አግፃቲንኩ አኽⶓኪላ ዲብስካ:: ፌያፌያማኪላ አንጌሌታንኩ ቲንኩ ውማይቴንካ ኪላ ዝኩⶓ እሊኩ አባልካጊ ጉሻኑ አሳብ ዝኩጝስ ክቺጝ ቱስታው አኽⶓ ዊዛሮ አቡኔ ካንቴ እይካ::

ቲን ሜድኑ አባልቱሳ ጌንዜቦ ኬያማ አዴስጙ ቴርት ካስጝⶓ ጄሜራው ቴሳስ 1 ዴስ 30ዋኺሰታ አኽጝስ ብሄረሰቡ ቺፅጝፂዳ ዝኩንኩ አባልካኪላ አባልቱሳ እድሳቴ ካስጝፅካ:: ስንብቶኪላ ቲን ሜድኑሳ አግልግሎቴ ካንትኹስ ግምጋሚ ካስጝጛ::

ካስጙኽ ግምጋሚዳኪላ 261 ሻይዴስ ጃላ ጝን አቕ እምፕልታቕ አቩቑ ንኑ ሜድኑ አግልግሎቲው ቴኬምስታንታ ፄውጝስ አኬድስትጝ ጌሌፅስታ::

ፌይኹ ቴሳስ አርፊዴሰ ጄሜራማ እንፃኽስስትኹ እንፅኺስኪላ ቺፅጝፂዳ 111ሻይዴስ ጃላ ቹዋታብል አግልግሎቲስ ቴኬምስታንትካ አኽⶓኪላ ቲን ሜምሪው ንባር ቶኬማ::

ብሄረሰብ ቺፅጝፂው ቲን ሜምሪው አላፊ አየለ አልማው ግምጋሚዳ ጌሌፁኑውስታጊ ፌይኹ አሜትዳ እሺንኩ ዳንጉዌንካዋ ካሲጝስ ካሊፃው ጁትጚስ እንፅኺሾ ቱስትጝስ ዴዴጝ ጊዛኻዳ እክዱሳ 42 ትኩሚ 4 ታፋ ሳኪትጝፅጝስ ካሊስታ::

ቲንኾትካው አግልግሎቲው እይጚሊ እምትጙኽስ ጁዋንኩ ክሬትካዋ ኽይጝስ ቲኑ ኾትካዋ አቒው አይልስስታ እከምኒው ግባትካስ አችትጝፅጙሳ እንፅኼ አኮሜችካማጊ አኽⶓ አላፊ ጉሽካ::

ባጀት አሜትዳ አባልካው ፍሺዴስ 273 ሚሊዩን ብርዴስ ጃላ ሚፄ ኩፕፅጝስ አኬድስትⶓ ሜምሪዴስ አግስትኹ ንባር ቶኬማ::