ፍትሬት አብት ማንዲጙ እንፅኺ ፍትሬቱሳ ሚንዛኖ ማንዲጝስስታ አይር እግልታው ኪሲስ ኬፍንኹ ትክም ዝኩኺያኽ::
ፍትሬት አብት ማንዲጙ እንፅኺ ዝባትቱንኩ ብትካ ዙርካማ ሊማንታ ኽብፂው አሉምት ዴሜካታስታ ምርትስት ምርታምት ዴሜካታ ፄውጙ አክምኪላ ኬፍንኹያኽ::
ፍትሬት አብት ማንዲጙ እንፅኺ ኽብፂ ሺሽርስትⶓ ካላካልጝጝሊ ቴርቴራ ወታትካስ እንፅኺ ድላስ ፊቴርፃ አኽⶓስታ ይኮኖሚያዊ ትክም ዝኩክሳ ትክልቴስታ ኩፓኩፔ አሜሬታንታ እርዳታውያኽ:: እንሳ እርዳትስትጝስኪላ ውላጊ ጉሸጝፃንታ ጋቲታ አሜትቺፋ እንፃኽስስታው ፍትሬት አብት ልማት እንፅኻሳ እንፃኽስትጝስ እንግርግራ ንጝ ቱስታላኪ:: ክልልታ ፌቴርስትኹ ሰላሙ ችግር ምክንያታስ ሚንችካ ግብርኒ ልማት እንፅኽካዳ ፅንጋኺ ጌቴምጝ አቕስትኹ ያኹኒኪላ ምስሊስ ዝኩዊኒው ክብርናቲኪላ እዝብ ዝኩጝስ ካላውዴስ ጃላ አኽጝ ማሊስቴ:: እስጜ ችግሮ ጌጌውጝስ ካሊስታው ዴሜካ ፍትሬት አብት ማንዲጙሳ እንፅኼ ይሳማ እንፃኽስትጝስ ምርቶስታ ምርታምቶ ዴሜካማ ጌቤልሰ ሚንቾ ምርቶ ዲግስጝሲያኽ::
ዙራሙሪው ኽብፂው አሉምት እሌትዴስ እሌቶ ኔኬታማጊ አንትጝስ አሬሳቻንቲ አግፃው ምርትኪላ ኽታዋ አሜሬትስታውዴስ ኪቻ ኔኬታማጊ አንትጙሳ እንፅኼ ይሳማ ይዌኽናው እንኮኽስትስ እንፃኽስትጝሲያኽ:: ቲኪስታንትካ ጄርካሰ ዝባትትኹሳ ብቴ አሬኬብፅጝስ እኖጂ ፌንኹሳ ችግሮ ካንታንታ ፄውጝ ቱስታላኪ:: ብቲው አሉምት ዙራታኪላ ካሊስታው አክምስጊ እንፃኽስትጝስ ናካዴሰ ኬሻንቴ ብቴ ጄርኪስ አሬኬብፅጝ ፋይፄ::
ፍትሬት አብት ማንዲጙ እንፅኺ ቴግባራዋ አኽⶓ ጄሜሩኒዴስ 15 አሜትዴስ ጃላ ያኹኒኪላ ውላጊ ዙራሙሪ ቱስቲስ ቴግባራዋ ፄዋቲው አኽጝስኪላ አግፅጝ ቱስታውሳ አግፅናቲታ ፄዋ:: ትክም ዋኽስዋኾ አግፅጝስ ካሊስታያላኪ:: ጉሽጝፃንቴ ፋይጝ፣ እንፃኽስስትኹሳ እንግራ ፌሬስፅጝስታ እንፃኽስቱንኩዳ ፌቴርስቱንኩ ልማትካዋ ቱስቲስ ቴኬምሰታውላ ይጉጝጊ ምክንያትታ ቶኬምስታ:: እኒጊ ዳንጉዊንካዋ ኩፅኒ ውላጊ ትኩትስ ካንታማ ክችሰጝስ ምርታምቶ ዴሜክጝሰታ ይኮኖሚስኪላ ቴኬምስታንታ አኽጝስ እንፃኽስትጝ ቱስቴ::