አሊቤ ሳቢጝ

ታደለ አጋጄ

ይቶፒያ ሲፍታው ግብርኒ ፖሊሲው ቹዋ አላሚ ምግብስ ጛርቶ ካሊጝስ፣ አጌራኻሱ ኢንዱስትሪስ ያኻውሳ ምርቶ ዲግስጝስስታ አጌራው ግብርኒውሳ ምርቶ አሌሙ ጌቤልዳ ልኺትጛንታ ያኻታ ፄውጝያኽ:: እንሳ ሳኪትጝፅጝስ ዴሜካ አሬሳቻንትካ እስካዌ ቴክኖሎጄ ቴኬምስትጝስ ባይሉ አሬስጙ ሴልዴስ ፌካማ ዝቤናዊ አሬስጙ ሴልስ ኪስስታኒስታ ኬሽጙኽሳ ጉልሌ ዜሮ ቴኬምስትካማ ኬሽኹሳ ምርቶ አሜሬታኒያኽ::

አሬሳቻንትካ ሊሊትጙንኩ ጊዝካዳ ችኹሳ እሬ ሳኑዳ ዴሜካ አኾቴ ቴኬምስትካማ ሴብሎ አሜሬታና:: አሜሬቱኑሳ ሴብሎ ፃንኩቶ ማንዱኽስ ዎክትስ ጉሊንቲሾ ቱዋታ ፄውስቴ:: ያኼስጉ ዎክቶ ማንዳያሱ እሪስስታ ዝቤናዌ ቴክኖሎጄ ቴኬምስታኑላስ ይጉጝስ ሚንች ምርት ባኬናውስታ ፅናትስ እንፃኽስስቱንኩ ንባርካ ቶኬማና:: ፅናትኩ ንባርካ ቶኬማኑውስታ ሴብል አፄድስታማ  ጉሊንቲሾ ታምብምባ ኺስታ ሊኽዴስ 35 ታፋ ያኻው ሴብል ባኬኔ:: እንስ ምክኒያትታ ቶኬምስታዉ ፍትሬቱ ኬሴትስታ ዝቤናዌ ቴክኖሎጄ ቴኬምስታኑላስ ይጉጜያኽ:: ፌይኹ ትክምቲስታ ዳር አርፊዳ ጄሜራማ አሬሳቻንትካ ችኽዳ አሜሬቱኑሳ ሴብሎ ኩፕፃና:: ኩፕፁኒዴስ ፋሌንጋ ዴሜካ ኪዴካማ ጉሊንቲሾ ሚፃና:: እንሱ ካስትዳ ምርት ኪዲስቱስ ባኬናቲታ ፄውጝስ እንፃኽስቱኑሳ ካስቶ አሬሳቻንትካዋ ስልኪስ ዙሚትጝፅንኹሳ ንባሮ እንቶጂስ አንቤብፅጝስ ፋኑኻ::

አሬሳቻንቲ አለነ በላይ አዩ ጉዋጉሲ ወረዳ ሹኻ ሹማቲ ኬቤሊው ዝኩዋንትካኽ:: 2016/17 ምርቱ ዝቤንዳ ሹኻ ብቲዳ ሊሊትጙንኩ ሴብልኩሳ አይኔትካዋ ሊሚፅካ:: ሊሚፁኑ ሴብል ኬሽኹሳ ምርትስታ ምርታምት ዴሜካታ 16 ኩንታልዴስ ጃላ ግባቶ ቴኬምስትካ:: ቹዋስ ሊሚፃንኩ ሴብልካ ሹምቢ፣ ዳጉፂ፣ ስንዳይስታ ቤርቤሩሳ ሴብሎ እሳንስ ሊሚፅⶓ ቶኬሙንኩ አሬሳቻንቲ ንጙዊኒ ዎክት ጉድ አይሩ አኺኒ እሺኹ አኽጝስስታ ፍትሬቱ ኬሴት ጌቴማያሱ አኽጝስ ኬሽኹሳ ምርቶ አግፅⶓ ዲብስካ:: ፌይኹ ምርቱ ዝቤን ዎክትስ  ዲጋማ ኬሽኹሳ ምርቶ አሜሬትካ:: ሴብሎ ኩፕፅጝስስታ ኪዲጝስኪላ እሊኩሊ እምፕልታ ቲቢቢርጚስ ዎፌልስ እንፃኽስቱንኩ አኽⶓ ዙሜካ::

አሜሬቱኑ ሴብልዴስ ስንዳዮ፣ ሹምቤስታ እሊኩሳ ሴብልካዋ ኪዲጝስ ጉሊንቲሾ ሚፅካ:: ዳጉፄ ዴሜካ ኪዴካማጊ አግስታንኩ አኽⶓ እርዳትፅካ:: ሹምቤስታ ስንዳዩ ዝቤናዊ ኮምባይነሮ ቴኬምስትጝስ ኪዲⶓ ጌሌፁንኩ አሬሳቻንቲ አሬሳቻንትካ ሚንቺትስ አሜሬታኑ ዳጉፂ ኪዲስቱስ ሚንችካ ቤራዋ ፋያው አኽⶓ ዙሜካ::

ምርት ባኬናቲታኪላ ትንካኪስ ኪዲጝስ ፃንኩቶ ሚንዱኽሳ ሴብሎ ጉሊንቲሾ ሚፅⶓ ድኹዌካ::

ምርት ቱስታ ጋቲው ዳድስ ባኬናቲታ፣ ዎክቶ ማንዳያሱ እሪ ሴብሎ አቤሌሻቲታ አሬሳቻንትካ እምቢቴካማ ኪዲጝስ ጉሊንቲሾ ሚፅⶓ ቶኬምካ:: አሬሳቻንቲ ኪዲስቱስ ምርት ባኬናቲታ ትንካኪስ ኪዳንታ ግብርኒኩ ዉማይቴንካ እርዳቲ ጉዋልንኹ እሺⶓ ዙሜካ:: ይንታው ምርቱ ዝቤንዳ አሬሳቻንትካ ኬሽኹሳ ምርቶ አሜሬታንታ ፌይኹ አሜትዳ ዲግኹስታ ምርት ጉልሊ ዜሩስታ ግባት ዎክትስ አሬሳቻንትካስ ዲጋያታ ካሲካ::

እሊው ስልኪስ ዙሚትጝፅንኹ ሹኻ ጃቢሊ ኬቤሊው ዝኩዋንቲ አቶ አስረስ አሸናፊ 2016/17 ምርቱ ዝቤንዳ ጉዶ ምርቶ አሜሬትጝስ ካሊⶓ እንክርፄካ:: ጛኪላ ሹምቤ፣ ዳጉፄ፣ ታፌ፣ ቤርቤሮስታ እሊኩሳ ሴብልካዋ አሜሬታና:: ግብርኒኩ ውማይቴንካው ኩስጝጚስ ግባቶ ቱስቲስ ቴኬምስትካማ ኬሽኹሳ ምርቶ አሜሬትጝስ ካሊⶓ ዙሜካ::

ውላ ሴብልኩሳ አይኔትካ ኪዲጝስ ጉሊንቲሾ ሚፅⶓ ዙሙንኩ አሬሳቻንቲ አስራት ሴብል ቱስታ ጋቲው ዳድስ ባኬናቲታ ትንካኪስ ኪዴካማ  ሚፅⶓ ዲበስካ::

ውዳኔ ቱስቲስ ሌሌክጝስስታ፣ ስንዳይስታ ሹምቢስ ዴሜካ ዝቤናዌ ኮምባይነሮ ቴኬምስትጝስ ሴብሎ ኪዲⶓ እንክርፅካ:: ፌይኹ አሜትዳ ስንዳዩ ሴብልዳ ቑንዚ ኬሴትስታማ ክሳሪዳ ታምፅⶓ ዲብስካማ ንጙዊኒ አሜትዳ ኩፅኒ ሹምቢውሳ ሴብሎ እሳንስ አሜሬትⶓ ድኹዌካ:: ናካዳ አሬሳቻንትካ እንሴስካስ ያኻውሳ ሹምቤ ኩፕፅካማጊ አግስታንኩ አኽⶓ ዙሜካ::

አሬሳቻንትካ አሜሬቱኑ ሴብልዴስ ኬሽኹሳ ምርቶ አግፃንታ ዴሜካ ግብርኒኩ ውማይቴንካው እርዳቲስ አኽⶓኪላ ድኹዌካ:: ኬቤሊው ግብርኒኩ ውማይቴንካ ኮምፖሰቶ እንፅኺስ አኾቲው ልማትስስታ ተፋሰሱ እንፅኽካስ ሙሬኺስታ ካስጝስ እርዳቴ ፄዌካማጊ አኽⶓ ዙሜካ::

አዮ ጉዋጉሲ ወረዳ ግብርኒ ፅፌት ጝናዳ ሴብል ልማቱ ኬቹ ጉሳንቲ  አበበ አንተነህ ወረዳታጊ ፌይኹ አሜቱ ግብርኒው እንፅኺስ ኬሽኹሳ ሴብሎ አሜሬትስትⶓ ድኹዌካ::

2016/17 ምርት ዝቤንዳ አሜሬትጝስ አኬድስትኹ 42 ሻይ 729 ሄክታር ብቴ አሬስጝስ አኬድስታማ እክድዴስ ጃላ ፌፄምⶓ ቶኬምካ:: አሬሳቻንትካ አሬሱኑሳ ማሴ ቱስታው ዳድስ አንኬባንኬብጝስ ምርትስ ታምፅካማ ምርቶ ኩፕፅካማጊ አግስታንኩ አኽⶓ እርዳትፅካ:: ሚንቺትስ አሜሬትስትኹ ሴብል ጐታሪሾ ቱⶓኪላ ጌሌፅካ:: ወረዳታጊ ሴብልስ ሾፌንስትኹ ብቲዴስ ሊኽዴስ 60 ታፋሳ ሾፌናው ሹምቢ አኽⶓ ቶኬሙንኩ አቶ አበበ እሊኩ ሴብልካጊ ኬሽኹስ አሜሬትስትⶓ እርዳትፅካ::

2016/17 ምርቱ ዝቤንዳ አሬስስትኹ 42 ሻይ 729 ሄክታርዴስ ጃላ ብቲዴስ 2 ሚሊዮን ኩንታል ምርት አግስታው እስታማ ጌሜትስትⶓ ጌሌፅካ::

እን ሴብል አሜሬትስታታኪላ ሰላሙስታ ፄትቲው ችግር ዜሩስታ አሪሚው ዎክትዳ ቼጌርፁኒውላ ኬሽኹ ግባት ዲግኹ አሜት አኽⶓ እርዳትፅካ:: ጉልሊ ዜሩ ዲግስጝጚ ፋይስታው አችስ ዲጋውላ ይጉኒውላ አሬሳቻንትካ ጛጂሱሳ ዜሮ ዜርⶓ ጌሌፅካ::

ሴብሎ ኩፕፅጝስ ያኻው ኮምባይነሩ ችግር ዝኩⶓ ቶኬሙንኩ አቶ አበበ አሬሳቻንትካ ጛጂሱ ግርብሰ ምርት ባኬናቲታ ፄውጝስ ሴብሎ ኩፕፅⶓ እርዳትፅካ::

ይንታው ምርቱ ዝቤንስ አኬድካማ እንፅኺሾ ቱጝስ ቤዴራ ቴርቱሳ እንፅኼ አኮሜችካማጊ አኽⶓ ጌሌፅካ::

አሬሳቻንትካ ሴብሎ ኩፕፅካማ ዊዱንኩ አኽጝስ ሳኑሳ እርሼ አሬሴካማጊ አግስታንኩ አኽⶓ እርዳትፅካ::