ሙሲሲኒ እታቲታ

እምፕላ አጌራው ፖለቲካዊ፣ ኢኮኖሚያዊ፣ ማቤራዊስታ ቴክኖሎጂያዊ ልግስስ ኩልፍ ሜሳሪያኽ ክንቲ፡፡ እምፕላ አጌራው ልግሱስታ ፍንሾስ ኪላ አጌራው ሙሲሲኒ አኽጝኪላ ድኹስቴ፡፡ እን ሙሲሲኒኪላ ዜሜሙስ አኹኪ እቱስ አጌራ ጉዲስትጝ ይጉዋላኪ፡፡ እንሳ ታክስካያስኩ አይልካ ኩፅኒ እንሳ ሙሲሲኔ ድርብጝስ ልቕልቕፃኒስ ሼውስታና፡፡ ያቓኑውላስኪ ያኻ ታክስካማ እስጜ ሙሲሲኔ ድርብጝስ ልቕልቕፃንኩ ክንቲውሳ ዜርፎ እሌትስ ይጉፁኑሳ ፄጌሩኒኪላ ውን ኩፅኒ አጌራዋ ቤዴልጝስ ፄውስታው እምፕል ካስጚያኽ፡፡ አማኻሪ ክልልዳ አግስታንኩ ዙራሙርካዳ አሜትዴስ ጃላ ልምትካማ እጂንኩ ክንቲጝንካው አብጅሊ ብስስታውላ አጂጝ እጄማጊ ካሳኒ አጌሮ ዋይሜ ኬይፅጝ ይጉዋላኪ፡፡

ክንቲ ቢሩው ንባር ቶኬማውስታጊ አማኻሪ ክልልታ 2017 ም/አ 3ሻይ 736 ክንቲ ጝንካ ክንትጝ ክንትፅጝዴስ ሴጋ ያኼካማ እጂጝ ዴሜካ ክልል እሊኩ ክልልካሊ ዝኩኽሳ ልኺትጛንታ አኽⶓ አቲፃዊያኽ፡፡

2017 ም/አ ክንትፅጝስ አሜቱ ጂሚሪዳ ምዝጋቢው ቴርት ካስጙኽ ያኹኒኪላ ጌቴማው ሰላሙ ዳንጉዊኒስ ውላጊ ክንቲ ጝንካ እንፅኺሾ ቱዌካያ አኽጝስ ጝሺኪላ ብስስትካያስኩ ክንቲ ጝንካዋ እንፅኼ ጄሜርፅጝስ ሹኻንቲ ጊዝስ ምዝጋቢ ካስጛማጊያኽ፡፡ እስጜ ቴግባሮ ዴሜካ ውላጊ አላፍቶ ካፃማ ጐንዳ ቲሪጝስ ክንቲስ ታንቡንኩስጊ ክንቲሾ እንፃኽጝ ፋይፄ፡፡

ድኬ ፂዌ ፌፄማንኩ ቤንካ ክንቲ ጝንካው ንብሬትዳ ታምፁኑሳ ጉዳቶኪላ ያኹኒ እምፕልታቖ ምንግስቱ ጐንዳ አኽጝስ ካሊስታው አክምስጊ እርዳትጝስ ክንትፄ ቤኖ፣ ክንትፃንትካውሳ ዝኩፄ ጝኖ እንቲታኪ ክንቲው ሜሳርካዋጊ ዋኽትጝፅጝስ ክንታንትካ ክንቲሾ ዙራንታ ፍሼ ፄውጝ ቱስቴ፡፡

ክንቲ ጝንካ ኬውጝጝስ ክንትፅጙ ዜርፍዳ እሺንኩ ክንትፃንትካኪላ እንፅኺሾ ቱዌካያስኩ አኽጝስ ዝኩዊኔ ጉስጝስ ችግር ጌቴምጝ ይጉዋላኪ፡፡ እስጜጊ ክችስጝስ ካሊስታው ኪላ ክንቲ ኬውጛታ ፄዋንኩ ቤንካዋ ሊሊትጙንኩ ኩስጚኩ ሴልካስ ኩስጝፅጝስ ስራስሪ ናፌኩኑሳ ክንቲ ጝናሳ ካስካማ ክንቴ አግፃንታ ፄውጝኪላ ውላውጊ አላፍት አኽጝስ ቱስቲስ ፊትጝጝ ፋይፄ፡፡