አድዋዳ ኹኑ ፍሺ

አለሚቱ የኔት

አድዋው ድል ይቶፒያው ብሄራዊ ክብሩ ማይቴም፣ ፃርክካ እዝብካው ነፃኔቱ ቡንካው ካንትፂያኽ::

ትክምቲ ኪንዲዳ ወረ-ኢሉሾ ኬቴታታ እይስትኹሳ እቑስቴ ቻቤላማ ዜሜችኹ አቒው ቼፍ ልቓ ጋው እሺኾ:: ሚንች ዜሜቻንቲ አብቶ ንብሬቶ ናውላ ጄሮስታ ኹና ቲጉዋውላ ሲፍፃማ እሺኾ ዜሜችኹዊ:: አድዋው ዝማቺዳ 20 ሻይዴስ-30ሻዬኺስታ ጌሜትስታው ቼፍ ዝኩክ ኹን ዜሜችⶓኪላ ንባርካ ቶኬማና:: እን አጌራው ወግስታ ባይል ስሬታስ ወሬሙ ውታኺ እስቱስ ጝርጃው ይቪቻ ያኻማ ታክስስቴ::

ይቶፒያውሳ ታሪኮ ሼው እኑስኪላ ውላጊ ወሬምካው እንግርዳ ይሴንካስታ ጄግንካ ኹን ዝኩና:: በእውከቱ ስዮም ፃፉኽ ፁፍዳኪላ ኹን ካሜንፅጝዴስ እንፂትጛቲውሳ ፍሼ ፄውⶓ ቶኬማ:: ኹን ወሬሙ ወክትስ ሜሳሬ ዲግስጝስ፣ ምግቦ ቴርስጝስ፣ አሳቦ እይጝስ፣ ወኔስታ ዴስቴ ፌቴርጝስ ኪላ ጉዋል ንኹሳ ፍሼ ፄዌካ::

አድዋው ወሬምዳ ኹኑ ቴሳትፉስ ኽሳንቴ ታምቦ ካፄት እቴጌ ታይቱ ብቱል እምፕልካኽ:: እቴጌ ታይቱ አደዋሾ ዚሚቺኹ 5 ሻይ ልኩቴንስታ 6 ሊኻ ፌሬስቴንካ ወሬምቴንካዋ ሲፍፄታ እሽቲኾ:: እቴጌ ታይቱ ጌና ስግላስ ውቻሌ ውሉሳ ችግሮ ቤዴርታታ እርዳትስትጝስ “እን ኹናኽ ወሬሞ እንካናላኪ:: ዲብ ኩፅኒ እንታኮውሳ ውሎ ቻቤልጝዴስ ክርⶓ ጐሌሌ” ኔ እሽቲኾ::

እቴጌ ታይቱ መኬሌው ወሬምዳ ታሊያውያንካው አኹ ዲግስጚ ኬውጛታ ቴርስትኹ ወሬሙ ሴል ወጌኑ ወሬም ሚንቾ መስዋቴ ኬያኑውላ ድላ ፄዋንታ ካሊፃ:: እቴጌ ታይቱ ጚ ጉስታው እሺኹዴስ ልኩቲኒስታ ፊሪስቲኒው ወሬምዴስ ድምክና ሚንችካ ኹኖ ሲፍፄታኽ አድዋሾ ዚሚቺኹ:: እኒ ኹንኪላ ምሺ ጝናዳ፣ አንኪ ጝናዳስታ ስልኺጝናዳ ቤንጜካማ ኽሳንቴ ፍሼ ፄዌካ::

እኒ ኹን አሳጊ ምግቡሳ ቴርስፄስታ ፊሪሲዴስ ፊቱኽሳ እንጃያሱሳ ምግቦ ማቕስ ቡዌካማ ካዌኖስታ ሌንቴቖ፣ አጙስታ ጋሪፂ ዋኹኽሳ ዳዶ ናኺሲ ልኩስ እሺኾ እንዜጜሺኑ:: ጌርክስ 10-15 ኪ/ሜትሮ ልኩስ እንዜጙኒዴስ ፋሌንጋ ዜሜቻንቲ ፉሪጝስ ሴፌሩስ ኹንዳ ፉሪ እላኪ:: አሬ ፍችካማ፣ አኾ ችንቤካማ፣ ብኮ ብኩስካማ፣ ጋይቴ ዝኩፅካማ አንኬ እንጅፅካማ፣ ልሻኹዌ ግቢቴካማ ዜሜቻንቴ ሜጌባና:: ዳድዳ አጙ ሴቡኽሳ፣ ፅንጋኺ ታስኹሳ አኬማና፣ እንግራ ዜሜቻንቲ እንዝጚስ ቴርቱስ ፉሬካያስኩ ኹን ጉዋዜ ኩፕፅካማ እንግርስ ቡዌካማ እንግራ እሊው ሊጊሲሚ ልኩ እንዝጛስ አሴኔድስታና:: ካሳና ፉሪጝናው ዲብኪላ እላኪ::

ብንቺፋ ጝርጃውሳ ስዬስታ ልኮ ቑፅጝኪላ ዜሜቻንትካ ኹኑ እሊው እንፅኺ እሺኾ:: ዝማቺ እቑስትኹ ትክምቲ ኪንዲስ ያኹስ ቹዋ ወሬም እሺኹ ይካቲት 23 ጌርኪያኽ:: እንዳጊዝ ክቻዳ እሺኹ ውላጊ ጌርክካ ኹንስ ፉራጋው ጌርክ እሺኾ:: ኹኑ ፍሺ ግርብስ ይቪቻ አሌድስታው ጋቲዊያኽ:: ምግቦ አቤሴልጝዴስ፣ ስዬስታ ልኮ ቑፅጝዴስ ፌይካማ ሚንችካ ኹን ትይት ሽንኩሽታው ቡንካ ክቻዴስ ፌይካማጊ ትይቶ ቻቤልፅካ፣ ላኼንትኹሳ አኬምካ፣ ምግቦስታ አኾ ዲግስካ፣ ባስጝኑስኪላ ሜሳሬ ጉሽካማ ሴብትጜካ:: ወሬም ክቻዳ ክሩኽሳ ዴሜካ ክብርስ ኽብፄ ሴያታ ፄውጝኪላ ኹኑ ፍሺ እሺኾ:: ፅላቱሳ ወሬሞ ሴሌልጝስኪላ ኹኑሳ ላካ ፊትጙኽሳ እንፅኼ እንፃኽስትኹ እሺያላኪ:: እሊው ኽሳንቲ ፍሺ ዴሜካ ሴብትጛውሳ ወኒስ ይስጝፅጚያኽ:: ሴብትጚስ ዴሬቱኽሳ ውታድሬ እንግራዳ ያኻማ አርቴ ንጝስኪላ ኹኖ ካንታኒ እስካዊታ ጁትጛና::

አድዋውሳ ድሎ አግጝሰ ፄውስትኹ ወሬምዳ ራስ መኮነን 15 ሻይ ፊሪስቲኔ ሀረርዴስ፣ ንጉስ ተክለሃይማኖት 5 ሻያሳ ጐጃምዴስ፣ ራስሚካኤል 11ሻዬ ዎሮሙስታ ወሉዴስ፣ ራስ አሉላስታ ራስ መንገሻ 12 ሻያሳ ትግራይዴስ ፊታውራሪ መንገሻ አገው ምድርዴስ እሊኩ ራስ ወሌ እስታንኩጊ ፊሪስቲኒስ ሴብትጛንኩሳ እሚጝስ ሴብትጙንኩ ያኹስ እኒሊኪላ ኹንዴስ እቴጌ ታይቱ ፍንዳ ታኻታ ወሬሞ ጉስታሺቲኾ:: እን ዴሜካ ኹን ወሬምዳኪላ እሺኹሳ ቴሳትፎ ካንትፃው አኽⶓ ስልኪስ አሳቦ እዩንኩ እንጃቢሪ ዩኒቨርስቲዳ ፖለቲካ ፍልስፍኒው ክንትፃንቲ አለምነህ አጋዤያኽ::

ወሬሙ ወከትዳ ቡንክትጛንትካዋ ይስጝፅጝሾስ አዝማርኪላ ጀብዶ፣ ወኔ፣ ጄግንኔቶ ሚኒሊክስኪ ያኻ እቴጌ ታይቱስ ዜሚስ ጌቴምጝስ ኽስኹስ ጉሽጝፅጝስ ወሬምስ ዊፃንታ ፄውጝስ እሺኹ ፍሺ ልቓ እስታቲው ታምብ ዝኩኽ አኽⶓ ክንትፃንቲ አለምነህ እርዳትፅካ:: አዝማርካ ወክትስ ወሬሞ ጉሳንኩዴስ ፌይኹስ ጛጂ ቴኬምስታንኩ ፌሬስካስ ይጉዋውላ ግትሞ ጌቴምጝስ ይስጝፅጙሳ ቴግባሮ ፊትጛኒስ እሺⶓኪላ እንክርፄካ::

ዲጊዴስ ናቴ አጌርታ ጌቴምኹ ሰላሞ አቲጙ አኺኒኪላ ውላጊ ይጋሪስ ታክስጝ ይጉዋማ ይዌኽ ኽሳው ናውሳ ታክስጜ እሚጝስ ጌቴምኹ አኽⶓኪላ ክንትፃንቲ አለምነህ ዲብስካ:: ጝሺ ጌቴምኹ ሰላሙ ዳንጉዊኑዴስ ፊጝስ ዴሜካ ቤዴራ አጌራዋ ካይ ክማስ እምጝስ ይንቱኽሳ ፅላቶ ዜሮ፣ ኬሌሞስታ እምኔቶ ድንቤርሳኑውላስ እምፕላ አጌራዋ ካይክማዴስ ፍሽጝስ ናው ታክስጚስ ቲቪቪርጚስ ፊጝስ እምፕልታ ቡንክትጝጝስ ኔፃዋ ፍሽጝስ ካሊስትኹስታጊ እምፕልትስ እንፃኽስትጝስ አኽⶓኪላ ቶኬምካ:: ውላጊ ጚውሳ ጚውሳ ጀግኔ ሴየማማ ድጙትጜ ባያማ አጌራዋ እምፕልሳውሳ አሳቦ ሲፍጝ ቱስታው አኽⶓኪላ ታክስፅካ:: ኽታዋ እሺንኩ ጀግንካዴስ ክንቴ ካስጝስ ናካኪላ እዝብስ ይጋራ ያኹኽ አጌራው አላሚስ አሴሜርጜካማ እንግሬ ባርኾቼዴስ ይንታውሳ ፅላቶ ሴብትጝጝ ቱስታው አኽⶓኪላ እርዳትፅካ::