ፍቶ ፃንቑንትኹ ወረዳ

ታደለ አጋጄ

ሰላም እምፕልታቕ አንኩሊውሳ ፍሬ አግፄካማ ጋቻዴስ፣ ጅፍንትዴስ፣ ሲኪኪኒዴስስታ ባፃባፅስትጝዴስ እቺጝስ እንካንስ፣ እምፕልትስ፣ ቲቪቪርጚስስታ አስሚምጚስ ዝኩጝስ ካሊፃው ዳድያኽ:: እምፕልታ ዝኩዋንኩ ማቤርአቕ ክቻዳ ቱትጜ አቲጝ ፌቴርስታኒ ችግሮ ኩስጝጚስ ኽይጝስ እርዳትጜካማስታ ኬቤቤርጜካማ እምፕልትስ ዝኩጝስ ሰላም ማልጛ ፋይፃንቲያኽ:: ፖለቲካው፣ ኢኮኖሚውስታ ማይቤራዊ ዝኩዊኒዴስ ፌይኹስ አቕ አቕሊ ፍትሬትሊስታ ዙራሙሪሊ ዝኩኽሳ ታምትጜ ይስጝፅጝስ ሰላም ውላአቡቕ ኽይ ዝኩኽያኽ:: ትክላሊስ ሰላማ ጋቲታ ዝኩጝስ ካሊስታቲው አኽጝ አዴስኪ ቤፍትኹ ጋቲዊያኽ::

እጉ ሴግቴንት ኬቤርስታታ ልማትስታ ልግስኒ ይንታታ፣ አቕቱስታ ዴሞክራሲው ሜብት ኬቤርስታታ ሰላሞ ሴፌንጝ ፋይፄ:: እጉ ሴግቴንት ኬቤርስታኒ ዎንጄሌንካ እግስ ካሲስታና:: እምፕልታቕስታ ምንግስት ክቻዳ ዝኩኽ ታምትጚ ይስጜ:: ችግሮ ፌቴራንኩ እግስ ካሲስታና:: ያኼስጉ ዲጊ ጊዝዴስ ናቴ አጌርታ ኬሴትስትኹ ሰላሙስታ ፄትቲው ችግር እምፕልታቕዳ ዜርፋ ሚንቼ ቤዴሎ ታምፃማጊ አግስቴ:: ጋያኪ ፌይኹ አሜትዳ አማኻሪ ክልልዳ ኬሴትስትኹ ጋቻው ምክንያቲስ እምፕልታቕዳ ማይቤራዊ፣ ኢኮኖሚውስታ ፖለቲካውሳ ጉዳቶ ታምፃ:: አዊ ብሄረሰቡ ቺፅጝፂዳኪላ ሊሊትጙንኩ ዙራሙርካዳ ሰላሙስታ ፄትቲው ችግር እምፕልታቖ ቤዴላማጊያኽ:: ሰላሙስታ ፄትቲው ችግርስ ማልጛ ጉዳት ታምቡክ ወረድካ ክቻዴስ ጃዊ ወረዳ እምፕሊያኽ::

ጃዊ ወረዳ እሊኩራንድ ኬቤሊው ዝኩዋንቲ ዙሙኑውስታጊ ዶንጌቱንኩ አይልካ ጛ ዝኩዋኑ ዙራሙሪዳ ችግሮ ፌቴርካማጊ አኽⶓ ዙሜካ:: ወረዳዳ ሰላሙስታ ፄትቲው ችግርስ ሚንች ጉዳት ታምባ:: ክንቲ ጝንካ ልምትካ:: ስርኩ ልማትካ እንፃኽስታቲንታ ፅንጋኻ ያኻ:: ምንግስቱ ኾት ዜሬፍስታ:: ይጉኽ ዴሜካ ሌግስ ድጙስታ::አሬሳቻንትካ እርሺውሳ እንፅኼ እንፃኽስታቲንታ ፄዋ:: ሚንችካ እምፕልታቕ ፌኔኬልጜካማ ባስኹ ችግራኻዳ አግስታንኩ አኽⶓ ዙሜካ::

ሽኩዋሩ ፕሮጀክት ግቢትስቱስ ፌኔኬልጙንኩ እምፕልታቕስ እይስትኹ እርሺው ብቲ እቺ ስፍሪዳ አግስታው አኽጝስ ፄትቲው ችግርስ እርሺውሳ እንፅኼ እንፃኽስታቲንታ ፄውⶓ ድኹዌካ:: እርሼ አሬሴካማ አሜሬታቲንታ ብሄሮ ስራ ፄውኽ ጋቻ ጁዋማጊ ሚንችካ እምፕልታቕ ፌኔኬልጜካማ ምርኪስ ጉዲስትካማጊ አኽⶓ ዲብስካ::

ጃዊ ወረዳዳ አግስታው ሽኩዋሩ ፕሮጀክት ሚንችካ እንፃኽስታንትካ እንፃኽስታሺኑ ያኹኒውላ ናካዳ ፄትቲው ችግርስ እንፃኽስታንትካ እንፅኺዴስ ሴጋ አኽⶓ ቶኬምካ::

ጛ ዝኩዋኑ ዙራሙሪዳ እንዳርማኪ ምንግስቱ አግልግሎቴ እያው ኾት ጄሜራያሱ አኽⶓ ቶኬሙንኩ ዝኩዋንቲ ወረዳው እዝብ ውላ ዲብስ ባስኹ ችግራኻዳ አግስታው አኽⶓ ድኹዌካ:: ጃዊ ኬቴምዳ ፌያፌያማ ምንግስቱሳ አግልግሎቴ እይፅካ ኾትካ ብስስቱኒውላ ኬቴምዴስ ሴግዳ እሊኩ ኬቤልካዳ ኩፅኒ እንዳርማኪ ምንግስቱ እንፅኺ እላቲው አኽⶓ ድኹዌካ::

“ዶንጌቱንኩ አይልካስ አቕ ክራና፣ ክምካዋ ዜሬፍታና:: እምፕልታቕዴስ ጌንዜቦ ቻቤላና” ኑንክ ዝኩዋንቲ አጌሩ ካላካልጚው ሴራዊቲ ዶንጌቱንኩ አይልካዳ ይስጙኽሳ እርምጄ ካፅጝስ ሰላሞ ሴፌንፅጝ ፋይፃው አኽⶓ ጉሽካ:: አጌሩ ካላካልጚው ሴራዊቲ እላ ያኹኒ እምፕልታቕዳ እንዴስ ጃላ ጉዳት ታምብጝስ ካላው አኽⶓኪላ ቶኬምካ:: እምፕልታቕ እንፃኽስቴካማ ኹዋቲንታ ምንግስት ዶንጌቱንኩ አይልካዳ ይስጙኽሳ እርምጄ ካፅጝስ ሰላሞ ቼሜትጝፅጝ ቱስታው አኽⶓ ድኹዌካ::

ሰላሙስታ ፄትቲው ችግርስ ዳንግሊዴስ ጃዌኺስታ ግቢትስትጝዳ እሺኹ ዳድ አንፅኼ ቲሪፅⶓ ቶኬምካ:: ዳድ ሰላሙስታ ፄትቲው ችግርስ ልምታማ ቑንዳስቴንካ እክምኒዳ ካስካማ አኬምስታቲንታስታ ጌፄንካ ጊፅሳቲንታ ኬፍቲኔ ችግሮ ታምፅⶓ ዙሜካ::

እሊው ጃዊ ወረዳ ወርክሜዳ ኬቴኒ አቡ ኬቤሊው ዝኩዋንቲ ዙሙኑውስታጊ ዶንጌቱንኩ አይልካ ጛ ዝኩዋኑ ዙራሙሪዳ ልቕልቓንኩ አኽጝስ እምፕልታቕ ስጋትዳ ቱⶓ ዲብስካ:: አጌሩ ካላካልጚው ሴራዊቲ ቱዋማ ሰላሞ ማንዲፃማጊ ያኹኒውላ ሰላም ዋኽስ ዋኾ ሴፌንጝስ ካሊስታያሱ አኽⶓ ዙሜካ:: ጃዊ ወረዳ ወርክ ሜዳ ኬቴኒው ዝኩዋንቲ ዙሙኑውሰታጊ ዶንጌቱንኩ አይልካ ሰላምስ ይንታንታ ሹማጌልቱሳ እንፅኼ እንፃኽስትጝስ ዙሚትጝፁኒውላ አጌር ሹማጌልካዋ አንጌራጌርጝስ ችግሮ ታምፅካማጊ አኽⶓ ዲብስካ::

ሰላሙ አኺኒ ጊዝዴስ ጊዞ ባስጛማጊ አኽⶓ ቶኬምካማ ጃዊ ወረዳስ ሊሊቲ ትኩት እይስታማ እንፃኽስትጝ ፋይፃው አኽⶓ ድኹዌካ:: ጛ ዝኩዋኑ ዙራሙሪዳ ቲኑ ኾትዴስ ይጎ እንዳርማኪ ምንግስቱ አግልግሎቴ እይፂ ኾት ጄሜርስታያሱ አኽⶓ ቶኬምካ::

ወረዳዳ እሳንስ ግብርኒው እንፅኺ እንፃኽስታው ዙራሙሪ ያኹኒውላ ፄትቲው ችግርስ ግብርኒው እንፅኺ እሳንስ እንፃኽስስታያሱ አኽⶓ ዲብስካ::

ወረዳዳ ፄትቲው አይልካስታ ሚፄ ኩፕፃንኩ ኾትካ ዴስ ይጎ እሊኩ ምንግሰትኩ እንፃኽስታንትካ እንፅኼ ቲሪፁኒዴስ እምፕል አሜትዴስ ጃላ ቼፍፅⶓ ዙሜካ::

ምንግስት ችግራኻዳ ዝኩኽሳ እዝቦ እርዳትስታማ ዶንግቱንኩ አይልካዳ ይስጙኽሳ እርምጄ ካፅጝስ ሰላሞ ቼሜትጝፃያታ ካሲካ::

ጃዊ ወረዳው ቹዋ ቹፅጝፃንቲ አማኑኤል አዳነ ወረዳዳ እንዴስ ቤዴራ ሚንችካ ዙራሙርካዳ ኬፍቲኒ ያኹኽ ፄትቲው ችግር እሺኹ ዙራሙሪ አኽⶓ ጌሌፅካ:: ዶንጌቱንኩ አይልካ እምፕል አሜትዴስ ጃላ ውላ ኬቤልካዋ ቼፍጝጝስ እሚካማ እጂኑ አኽⶓ ቶኬምካማ ናካዳ ኩፅኒ ጉድ ሰላሙ አኺኒዳ አኽⶓ ጌሌፅካ:: ወረዳዳ አግስታንኩ 25 ኬቤልካዴስ 9 ኬቤልካዳ ሰላም ማንዲስታታ ፄውስትⶓ ጉሽካ:: ወርክሜዳ ኬቴኒስታ ዴክ ኬቴኒዳ አጌሩ ካላካልጚው ሴራዊቲ ቱዋማ ሰላሞ ማንዲፃማጊ አኽⶓ እርዳትፅካ::

እሊው ዙራሙሪዳ ታስስቱንኩ ዶንጌቱንኩ አይልካ ጃዊ ወረዳሾ ቱዌካማጊ ያኹኒውላ ምንግስት እርምጄ ካፃማጊ አግስታው አኽⶓ ጌሌፅካ:: ወርክሜዳ ኬቴኒዳ ዶንጌትካማ ልቕልቓሺንኩ ሰላሙሳ እቑዌ ቻቤልካማ ሰላምሾ አንትⶓ ቶኬምካ:: ጃዊዴስ ዳንግሌ ኺስታ ዝኩኽ ዳድ እንፅኺ ጄሜራታ ፅሬት ፄውስታማጊ አኽⶓ ዙሙንኩ ቹዋ ቺፅጝፃንቲ ምንግስቱ አመራር እዝቦ ኩስጝፅጝስ ሼውቴ ፌቴራቲታ ፄትቲው ችግር ፅንጋኻ አኽⶓ ጉሽካ::