ናፌኩኑሳ አግፁንኩ

አለሚቱ የኔት

ክልልታ ጌቴምኹ ሰላሙ አዌክስትጝስ 2ሻይ 833 ክንቲ ጝንካዳ ጉዳት ታምብⶓ አማኻሪ ክልሉ ክንቲ ቢሩው ንባር ቶኬማ:: ኽዮ አታማ እጂኹ ዱንጊቲስ አጌዝስትኹ ጋቻ ቺፃማጊ ዝኩኽ ቻኒስት ክንቲው ኾትካው ጉዳትዳ ይቪቻ ወሴንስታማ ይጉዋያላኪያኽ:: ክልልታ 2017 ክንቲው ዝቤንዳኪላ ላጚቲ ሚሊዩን ክንታንትካዋ ሜዜጌባማ ክንትፅጝስ እክድ እምስታሼ::

አዊ ብሄረሰቡ ቺፅጝፂ አዩ ጉዋግሲ ወረዳ አንቢሊ 1ንቲስታ ክቻክቺ ክንቲ ጝናኪላ ጋቻው ምክንያቲስ ዙራሙሪ ሌግስ ድጙስታታስታ ክንቲጝናስኩ ክንትፅካ ሜሳርካ ሊሊትጙንኩ አኼንካስ ድሳንታ ፄውስቱንኩ ወረዳው ክንቲ ጝንካዴስ እንፕሊያኽ:: እንሱ ምክንያቲስ ዝኩዋንትካ ሙሬ ባይፅካማ ጄር ቹዋ ታብልዴስ አግሌልጜካማ ስዴታ ፋንታ ፄዋ:: ስራስሪ እንካናኑሳ ክንቴ ክንታቲንታ ፅንጋኻ ያኻማ አሜቶ ላካሳ ቼፍፅካ:: 2017 ም/አ ኩፅኒ ዙራሙሪ ሴላምሾ ዙራማ ክንቲ ጄሜርጝስ ክንቴካማጊ አኽⶓ ስልኪስ አግፅንኹ ንባር ቶኬሜ::

በየነ ታከለ 8ንቲ ቤኑ ክንታንቲ ያኹስ እምፕሎ አሜቶ ኬውጝፃሺኹሳ ክንቴ ንጙዋ ጄሜርጝስ ዴስቴና ፄውኽ አኽⶓ ዲብሳ:: ጝናቕዳ ዝኩኽ አክም አሳላካ አኽጝስ እሊው ዙራሙሪሾ ካሳማ ክንትጝስ ካላያሱስታ እሊኩ አፄብካ ካስካማ ክንታኒስ ካንታኒ አንኩሊውሳ ፉሬ አታሺኹ አኽⶓኪላ ድኹዋ::

እሜ ክንቲ ጄሜሩስ ጌቴማሺኹሳ ምንድራሺውሳ ወረርሽኞጊ ዊፅጝስኪላ ክንቴ ሲፍጜካማ ክንትጝስ እምፕላንቲ ድንቤራ ክንቲውሳ ፍታኔ ፌቴንስትⶓ እንክርፃ::

እሊት ክንታንታ አለሚቱ ብርሃኑኪላ ክንቴ ኬውጝፅካሺኑሳ ጊዞ “ግቕሲው ጊዝያኽ” ኒስ ዲብስታ:: እሺኹ ጋቻው ችግር ፌያማ ናኪኒ ሰላምስ ታምብካማ ክንቴ ክንትጝስ እንኩሊውሳ ፉሬ አግፅⶓ ድኹታ:: ክንትፃንትካኪላ ፉሪውሳ ጊዞጊ ባይካማ ፄዋኑ ፅሬትስኪላ ውላዋ ክንቲው እምካዋጊ ሾፌንጝስ ክርፄ ዋይሜ ያጋንታ ፄዌካማጊ አኽⶓኪላ ዲብስታ::

ክንትፃንቲ ይሄይስ ወንድም አንቢሊ 1ንቲስታ ክቻክቺ ክንቲጝናሱ ክንትፃንቲ ያኻኒስ 2016 ም/አ እሺኹ ጋቻ ናካዳ ታምብጝስ ካሊፃውሳ ፄጌራቲው እሺⶓ ድኹዌካ:: አንጊ ችግር ኩፅኒ ፌያማ እምፕልታቑ ሼውፅንታ አዴስስታማ 2017 ም/አ ዋኽስ ዋኾ ያኻውላ ይጉኒውላ ክንታንትካ ክንቴ ጄሜራንታ እንፃኽጝስ ክንትፅካማጊ አኽⶓ እንክርፄካ::

ክንትፃንትካኪላ ሊሊትጙንኩ ክንትፅካ ሜሳርካው ዳንጉዊኒ ዝኩኒኪላ ክንታንትካስ እርዳቴ ፄውጝሾዳ ኬፍ ንኹሳ ፍሼ ፄዌካማጊ አኽⶓ ድኹዌካ:: ክንትፃንትካ ፉሪውሳ ጊዞጊ ቴኬምስትካማ እርዳቴ ፄውኒውላ ፍታኒው ዋይሚዳ ኩፅኒ ቤዴራሱ ችግር ቻኒስቶ ፉሪፅⶓ ድኹዌካ::

ጋቻስ ሰላሞ አቲጝስ ክንቴ ኬውጝፅጝዴስ ፌይኹስ ክንቴ ጄማሩኒዴስ ፋሌንጋኪላ ምንድራሺ ቑንዛው ወረርሽኝ ምክንያታስ ክንታንትካ ዋኽስዋኾ ክንቲ ጝና አንታቲንታ ፄዋማ እጂⶓ ክንትፃንቲ ይሄይስ ድኹዌካ:: ናካዳ ኩፅኒ እሺኹ ችግር ጌጌውስታማ አሳላካ ሼውፅንታዳ ቻኒስቶ ፌቴራሺኹ ሰላሙ ዳንጉዊኒ ዙራሙሪዴስ ድሳማ እምፕልታቖ ዋኽ ሼውስ ዝኩዊኔ ጉስጝሾ ቱⶓኪላ ቶኬምካ::

ክንትጝ ክንትፅጙሳ ቴርቶ ዋኽትጙኽ ያኻታ ፄውጝስኪላ ክንቲ ጝናሱሳ ሙኩሪ ጝናሳስታ ሜፃፍ ጝናሳ ሜሳርካስ ዋኽትጝፅጝ ቱስታው አኽⶓኪላ ክንትፃንቲ ክንቴ እይካ::

አቶ አለሙ ምናየሁ አንቢሊ 1ንቲስታ ክቻክቺ ክንቲ ጝናሱ አላፊ ጌሌፁኑውስታጊ 2016 ም/አ ዋኾ አሜቶ ክንቲዴስ ሴጋ ያኻሺኹያኽ:: 2017 ም/አ ኩፅኒ ክንትጝ ክንትፅጙ ቴርት ጄሜርስታማ 1ንቲ ድንቤራ ክንቲው ጊዝ አሌድስታማ 2ንቲሾ ቱⶓ እርዳትፅካ:: 1ሻይ 428 ክንታንትካዋ ሜዜጌብካማ 1ሻይ 328 ክንታንትካዋ ክንትፅካማ አኽⶓኪላ ጉሽካ:: ቤዴራ እሺኹ ጅፍንት ናካዳ ድሳማ እምፕልታቕስ ፄውስትኹ እርዳቲስ ድስኹ ዝኩፂ ግቢትስታታ ፄውስታማ ሼዎ ዋኽካማ ክንትፅካማጊ አኽⶓኪላ ቶኬምካ:: ክንታንትካኪላ ዝኩፂ ጝንጊ ዝኩዋውላ ክንቲ ጝናዳ ቼካ እሺካማጊ ክንትፅጝስ ክንቲ ቹዋ ቴግባርሾ ቱዋታ ፄውጙሳ እንፅኼ እንፃኽስቱንኩ አኽⶓኪላ አቶ አለሙ ኽይትጝፅካማ ቴሳስ አርፌኺስታ ናካዴስ ቻ ልምቴይኻሲ ናውሺኹ አሳብኪላ ናካዳ ዋኽስ ዋኾ ድሳማ ውላጊ ትኩቶ ልማትሾስታ ክንቲሾ ፄውⶓኪላ ቶኬምካ:: ሊሊትጙንኩ አጋታምካዋ አግፃኒስ እምፕልትቖ ሼውፅንታሳ አድርፃውሳ ኩስጜ ቤንጝፃንኩ አኽⶓኪላ አቶ አለሙ እርዳትፅካ::

አዩ ጉዋጉሲ ወረዳዳ ክንቲ ፅ/ጝናሱ አላፊ አቶ አሳየ ተረፈ ኑኑውስታጊ ወረዳዳ 64 ክንቲ ጝንካ ዝኩካ:: 2016 ም/አ 22 ክንቲ ጝንካዋ አሊዴኺስታ ክንትፅⶓስታ 2017 ም/አ ኩፅኒ 43 ክንቲ ጝንካ ክንትጝ ክንትፅጙ ቴግባርሾ ቱⶓ እርዳትፅካ:: ክንቲ ሚንችካውሳ ቴሳትፎሰታ ሰላማዌ ዙራሙሬ ፋያው አኽጝስ እንሱ ዳንጉዊኒስ ሚንችካ ስራስሪውሳ ክንትጙሳ ሜብቶ ዳንጉዊትጝፃማ ፌይⶓ ቶኬምካ:: ሊሊትጙንኩ ክንቲው እርዳታንትካ ቤንካስስታ እምፕልታቑ እርዳቲስኪላ ፌኔኬልጙንኩ ሙሪሾ ዙራንታ ፄውስትጝስ ጄርካ ክንቲው ማንድሾ ቱዋንታ ፄውስትⶓኪላ ጌሌፅካ::

ክንቲው ቢሩስታ እምፕልታቑ እርዳቲስ ዳንጉዊኒ አክምታጊ ዋኽትጝፅጝስ ሞኬርስትⶓኪላ እርዳትፅካ:: 12 ትኩሚ 4 ሚሊዬንዴስ ጀላ ብሮ እርዳቴ ፄውጝስኪላ አንቢሊውሳ ክንቲ ጝናሳ አቾ ማንዱኽስ ግቢታማጊ አኽⶓኪላ አቶ አሳየ ቶኬምካ::

ሜፃፉሳ ችግሮ ካንትኹስ ዴሜካ ሰላም ዳንጉዊጛስ ጉዳት ታንቡኒ ኪላ ቤዴራ ዳንጉዊኒ እሺⶓ ጉሽካ:: ናካዳ ኩፅኒ ክንትፃንትካስ ያኻውሳ ሊሊትጙኽሳ እንዜጝትጝፄ ቴኬምስትጝስ ታምፅⶓ ጌሌፅካ:: ዋኽስ ዋኾ ችግሮ ጌጌውጝስ ኩፅኒ ዳድ ልምትⶓ ምክንያቲስ ጌቴምኹ አኽⶓ ጉሽካማ ፍንሾስ ኽያንኩ አኽⶓ እርዳትፅካ::

ፍንሾስኪላ ውላጊ ትኩታኩ ቤንካ ክንቲስ ታንቡንኩሳጊ ክንቲ ጝናሾ እንፃኽጝ ቱስታው አኽⶓኪላ እንፅኼንቶ ፌያፌይጝፅካ::