አፍሪካው እምፕልት

አለሚቱ የኔት

ይቶፒያ አፍሪካ ኔፃኔቶ አግፄታ ፄውቱክ ቡንካዴስ ኬምፕስ ኬምፓ አፍሪካውያንካ እምፕልቶ ፌቴርካማ ታምባውሳ ቻኒስቶ ቲሪትጛንታስታ እዝብካ ኬሽጙኽ ይወትሾ ካይጛንታ እንፃኽስቲስ እጂቴ:: ጋና 1949 ም.አ ኔፃኔቶ አግፅጝስ ጄሜርትኹ እንዝጚ አፍሪካው እምፕልቱ አችት ቲሪትጙኽ ጉንቤት 1955 ም.አኺስታ 32 አጌርካ ካይ ክማስ እምስትጝዴስ ኔፃ ያኼካ:: እኒ 32 አጌርካኪላ አፍሪካ እምፕልቱሳ አችቶ ቲሪትጝፁና::

ይቶፒያስታ እሊኩ ፓን አፍሪካኒዝሙ ልቕልቓንትካ አችቶ ቲሪትጝፅጝስ ጉሽጝፅኹ ኔፃኔቶ አግፄካያስኩ አጌርካ ኔፃ ያኻንታ ኔፃኔቶ አግፁንኩ ዴሜካ ኔፃኔት ዋኽትጙኽ ያኻታ እሺኾ::

ይቶፒያ እን እምፕልትዳ ዝኩኽ አኩዋም ጉሳንትካው ኪስጝጚስ ቤቴንስታቲው ዝቤንቺፋ እምፕልት ይሴና ያኻማ ፊትጛታ ዝቤን ቺፋሱሳ ካሴ ኽይጝስ ጉሳንትካ ቤዴራንትካኽ:: ከዳማዊ አፄ ሀይለስላሴ ዴስ ተክላይ ማኒስትር አቢይ አይመድ /ዶ/ር ኺስታ ዝኩንኩ ይቶፒያው ጉሳንትካ ሊሊታጋቲታ ታምቦጊ ፊትጜካማጊያኽ::

ንⶓ ካስጙኽ 38ንቲ አፍሪካ እምፕልቱ ጉሳንትካው ጉባይኪላ ኬሽጝፂው ፍት አፍሪካውያንካስስታ ዜሮ አፍሪካውያንካስ አግፅፅጝስ ካሊፃው ጉዳይካው ዙሪዳ ሊሊትጙንኩ ውሳንካዋ ፉሪፃ::

ጉባይ ጋግርት፣ ጌዴድፃማ አጌርሾ ዙርፅጝ /ዲፖርቴሽን/ስታ ካይ ክማ አፍሪካውያንካዳ ፊፄምስትኹ ዜሮ ድፅⶓ ቴግባር ያኻማ ቤየንስታታ ዲጉኽሳ አሳቦ ፄዴክፃ::

ውሳኒ አፍሪካውያንካስታ ዜሮ አፍሪካውያንካዋ ጋግርትዴስ፣ ጌዴድፃማ አጌርሾ ዙርፅጝ /ዲፖርቴሽን/ስታ ካይክማሊ እምትጙኽሳ ፌፄምስቱንኩ ወንጄልካ አቕስቴ አግፃንታስታ ካሲስታንታ ፄዋዊያኽኪላ እስታ:: አፍሪካው እምፕልት አጌራው ጋቻስታ አሪጊግጚ እላቲኩ አጌርካውሳ ችግሮ ዙሚትጝጚስስታ ዳራዳርጚስ ኽይጝስስታ ዊዳፊ ሰላም ሴፌናታ ፄውጝስ ትኩቶ እያማ እንፃኽስታው አኽⶓ አፍሪካው እምፕልቱ ፖለቲካ ጉዳይካ ሰላሙስታ ፄትቲው ኮሚሽነር ባንኮሌ አድገቦዬጋ አድአዬ ዙሜካ::

አፍሪካው እምፕልቱ ኾቱ ኬሽጝፅካ፣ ካሲትጝፂው ፍት፣ አፍሪካ ቴቬቬርጙንኩ ምንግስትካው አችቱ ፄትቲ ኩስጚጝናሱ ቲሬንቴ ውክልኔ አግፅጝስ ፄውስትካማጊ ዝኩንኩ ልቕልቕትካ፣ አጉራዊ ሰላምስታ ዴክት፣ አፍሪካው ኔፃ ጊፁ ኬቴኒው ፊፂምጚስታ አጉራዊ ጊፁስታ ይኮኖሚው ኩራርጚ ግብርኒስታ አይር እግልታው ኪሲ፣ አቕቱ ሜብትካ፣ ፆቲ ፅንታስታ ወታትካዋ ዳሊፅጝስ እንቲታኪ ኾትካውስታ አችትካው ጉላሊው ኩስጝጚ ፄውስቱክ ቹዋ ቹዋ ጉዳይካኽ::

ንባሮ አግፅንኹኪ ኢዜአስታ ኢቢሲዴስያኽ