ኬሽጛማጊ ይንትኹሳ ሰላሞ ሲፍፅጝ ቱስቴ እስትኾ

ታደለ አጋጄ

አዊ ብሄረሰቡ ኩስጚ ጝና 4ንቲ ዙሪ 31ንቲ ሚዲቪኒ ጉባዬ ስንብቶ ካስጝፅኹ ጊዝዳ 2017 ባጄት አሜቱ ዋልቲ አርፋሱ እንፅኺው ፊፂምጚው ሪፖርት ዲጋማ ጋማጋምስታ:: ጉባይዳ ብስፂውሳ ዙሚትጜ ፄዉንኩ ጉባዬ ኽምባ ዊዛሮ ሙሉአዳም እጅጉ ክልልታ ናማኪ ብሄረሰቡ ቺፅጝፂታ ሰላምስ ትኩት እይስታማ እንፃኽስትጝስ ኪሲ ይንትⶓ ዙሜካ:: ብሄረሰቡ ቺፅጝፂታ ሰላሙ አኺኒ ኬሽጝጛማጊ ይንትⶓ ቹዋ ምክኒያት እምፕልታቕስታ ምንግስት እምፕልትስ እንፃኽስትጝ አኽⶓ ቶኬሙንኩ ጉባዬ ኽምባ ሰላም ዊዳፊስ ቼሜትጛታ ምንግስት ኩርፄንትስ እንፃኽስታው አኽⶓ ዙሜካ:: እምፕልታቕኪላ ሰላምስ ታምቦጊ ፊትጝጝ ቱስታው አኽⶓ ጉሽካ::

ሰላሙስታ ፄትቲው ችግርሊ እምትጛማ ብሄረሰቡሳ ቺፅጝፄ እንር ግራ ጉስኹ ሚፄ ኩፕፅጙ ችግር አኽⶓ ጉሹንኩ ጉባይ ኽምባ ሚፄ ዎክትስ ኩፕፅጙ እንፅኺ ቻስ እስታቲው ቴግባር አኽጝ ቱስቴ ንካ::

ልምትካማ እጂንኩ ክንቲ ጝንካዋ ብስፅጝ፣ ክንቲዳስ ሴጋ ያኹንኩ ክንታንትካዋ ክንቲሾ ዙራንታ ፄውጝስታ ክንትጝ ክንትፅጙ እንፅኺ ይስጛማ ሲፋታ ፄውስትኹ እንፅኺ ይስጝፃው አኽⶓ ቶኬሙንኩ ጉባዬ ኽምባ ክንቲዴስ ሴጋ ያኹንኩ ክንታንትካ ክንቲሾ ዙራንታስታ ልምቱንኩ ሚንችካ ክንቲጝንካ ብስስታንታ ትኩትስ እንፃኽስስትጝ ቱስታው አኽⶓ ጌሌፅካ::

አዊ ብሄረሰቡ ቺፅጝፂው ትክትሊ ቺፅጝፃንቲ አቶ አይተነው ታዴ ክልልታ ፌቴርስትኹ ሰላሙስታ ፄትቲው ችግርስ ኬፍቲኒ ጉዳት ታምብኹ ክንቲው ዜርፍዳ አኽⶓ ቶኬምካማ ብሄረሰቡ ቺፅጝፂታ ናካኪላ 329ዴስ ጃላ ክንቲ ጝንካ ልምትⶓ ዙሜካ::

ክንቲው ዜርፍዳ እንፃኽስታንኩ አመራርካ ትኩትስ እንፃኽስትጝ ፋይፃው አኽⶓ ጉሹንኩ አቶ አይተነው ልምቱንኩሳ ክንቲ ጝንካዋ ብስፅጝ፣ ክንቲዴስ ሴጋ ያኹንኩሳ ክንታንትካዋ ክንቲሾ ዙራንታ ፄውጝ  ቱስቴ ንካ::

እሊው ኩስጚ ጝናዳ እሳንስ ጁዋማ ጋማጋምስትኹ ጉዳይ ቲኑ ሜዳኑ አግልግሎቲዳ ዝኩኹሳ ችግርስታ ቲኑ ኾትካዉ  አግልግሎቴ እይጙ ችግር ኽይስትጝ ቱስታው ጉዳዬኽ ንካ::

ብሄረሰቡ ቺፅጝፂውሳ ሰላሞ ቼሜትጝፅጝስ እንፃኽስስትኹ እንፅኺ ክርፂስ ጋማጋምስትⶓ ጉሹንኩ አቶ አይተነው ሰላሙስታ ፄትቲው ችግርካ እሺንኩ ሚንችካ ኬቤልካዳ ሰላም ሴፌናታ ፄውስትⶓ ዙሜካ:: ሰላም ሴፌናያስኩ ሚንችካ ኬቤልካዳ ሰላሞ ቼሜትጝፅጝስ ትኩትስ እንፃኽስትጝ ፋይፃዉ አኽⶓ ጌሌፅካ::

ብሄረሰቡ ቺፅጝፂው ኩስጚ ጝናስኩ አባልካ ኑኑዉስታ ሰላሙስታ ፄትቲው ችግርስ ሚንችካ ክንቲ ጝንካ ልምትካማ ክንትጝ ክንትፅጝዴስ ሴግ አኽጝ ኩስጚ ጝናዳ እሳንስ ጁዋማ ጋምጋምስትኹ ጉዳዬኽ:: ልምቱንኩ ክንቲ ጝንካ ብስስታንታ፣ ፌሬሱንኩ ክንቲ ጝንካ ቴጌንስትካማ ክንታንትካዋ ሜዜጌብጝስ ክንቴ አግፃንታ ፄውስትጝ ፋይፃው አኽⶓ ዙሜካ::

እሊው ኩስጚ ጝናዳ እሳንስ ጁዋማ ኩስጝጚ ካስጙኽ ቲን ኾትካው አግልግሎቴ እይጝጚ አኽⶓ ዙሙንኩ ኩስጚ ጝናስኩ አባልካ ቲኑ ኾትካዳ ካንትስታንኩ ችግርካ ክቼንታ እሳንስ ኩስጜ ፄውⶓ ዙሜካ::

ሰላሙስታ ፄትቲው ችግር ዊዳፊስ ኽይስታታ እዝብስታ ምንግስት እምፕልትስ እንፃኽስትጝ ቱስታው አኽⶓ ጉሹንኩ ኩስጚ ጝናስኩ አባልካ ሰላሙሳ ጉላሌ ቻቤላቲንኩስታ ፄትቲውሳ ችግሮ ፌቴራንኩ አይልካዳ ምንግስት ይስጙኽሳ እጎ ኬቤርፅጙሳ እንፅኺ እንፃኽስትጝ ቱስቴ ንካ::