ዚጋሚ ወረዳዴስ ፌኔኬልጛሺንኩ እምፕልታቕ ዙራሙሪሾ ዙርካማጊያኽ

ታደለ አጋጄ

ክልልታ ፌቴርስትኹ ሰላሙስታ ፄትቲው ችግር ብሄረሰቡ ቺፅጝፂው ሊሊትጙንኩ ዙራሙርካዴስ ፌኔኬልጛሺንኩ ጛርት አቕ እሺኑ ዙራሙሪሾ ዙርካማጊያኽ::

አዊ ብሄርስብ ቺፅጝፂው ዚጋሚ ወረዳዳ ፌቴርስታሺኹ ፄትቲው ችግርስ አኺቲ፣ ጁሚሪስታ ሶሪት ኬቤልካዴስ ሚንችካ እምፕልታቕ ፌኔኬልጜካማ እንጃቢሪዳስታ ቻግኒ ኬቴምዳ እጂካ:: ፌኔኬልጜካማ እጂንኩ እምፕልታቕኩ ቤንካዋ ምንግስትስታ እምፕልታቑ ቲቪቪርጚስ ዙርፃማ ቲሪትጝፅጝስ ምንጊ እሺኑ ዙራሙሪሾ ዙራንታ ፄውስታ::

ስንብቶ ዚጋሚ ወረዳ አኺቲ ኬቤሊዳ ፄትቲው ችግር ምክንያቲስ ፌኬልጙንኩሳ እምፕልታቖ ዙርፅጝስ ጎኻ ኬቴምዳ ሰላሙ አምኽጚ /እርክ/ ፌፄምስትጝ ታክስስታው ያኹስ እምኼ ሲፋማ ፌኔኬልጜካማ ሊሊትጙንኩ ኬቴምካዳ እጂንኩ ፌኔኬልጛንትካ /ቡካንትካ/ እሺኑ ዙራሙሪሾ ዙርካማጊያኽ:

ፌኔኬልጛሺንኩ /ቡካሺንኩ/ ጛርት አቕ እሺኑ ዙራሙሪሾ ዙርጝስ ዴስቴንካ አኽⶓ ጌሌፅካማ ፅንፌንካ ኬችካ እምፕልታቑሳ እምፕልቶ ሺሽራውሳ ቴግባሮ ፌፄምጝስ እምፕልታቕዳ ሚንቾ ጉዳቶ ታምፁኒውላ ፅንፌንካ ኬችካዋ እምፕልትስ ቡንክትጝጝስ እምፕልታቑሳ እምፕልቶ ይስጝፅጝ ቱስታው አኽⶓ ፌኔኬልጛንትካ /ቡካንትካ/ ዙሜካ::

ዚጋሚ ወረዳው ምንግስት ኮምኒኬሽንሊ ፄውኑ እጂጚዳ እዝቦስታ እዝቦ ጋቺትጝፃንኩ አይልካዳ ምንግስት ይስጙኽሳ እርምጄ ካፅጝስ እጎ ኬቤርፃያታ ካሲካ::

ዚጋሚ ወረዳው ቺፅጝፃንቲ አቶ መልካሙ አለነ ፌኔኬልጛሺንኩ /ቡካሺንኩ/ እምፕልታቕስ ፌያፌይጝፁኑ እንፅኼንትዳ ኑኑውስታጊ ወረዳው አችስ ቲሪትጙኽ  ኮሚቴ ፌኔኬልጛንትካዋ /ቡካንትካዋ/ ዙርፃማ ቲሪትጝፅጝዴስ ቤዴራ እዝቦስታ እዝቦ ታምትጝፅጙ እንፅኺ ሳኪትጙኽ ዳድስ እንፃኽስስታማጊያኽ::

ፄትቲው ችግር ምክኒያቲስ ልምትካማ እጂንኩ ምንግስትኩ አግልግሎቴ እይፅካ ኾትካ ብስስታንታ ትኩትስ እንፃኽስትካማጊ አኽⶓ ኪላ ዙሜካ::

አዊ ብሄረሰብ ቺፅጝፂው ትክትሊ ጉባዬ ኽምባስታ ፌኔኬልጛንትካዋ /ቡካንትካዋ/ ዙርፃማ ቲሪትጝፃንቲ ኮሚቴው ኩፕፃንቲ አቶ በላይነህ ወንድም ፅንፊኒ አይል አማኻሪ ክልሉሳ እዝቦ ኔፃ ፍሻኻ ንጝስ ጚው እዝብዳ ኬፍንኹሳ ቑሎስታ ቤዴሎ ታምፅⶓ ዙሜካ:: ፅንፊኒ ኬች ፌኔኬልጝፁኩ /ቡክፅኩ/ ዚጋሚ ወረዳ አኺቲ፣ ጁሚሪስታ ሶሪት ኬቤሊኩ ፌኔኬልጛንትካዋ /ቡካንትካዋ/ እሺኑ ዙራሙሪሾ ዙርፅጝስ ሚንችካ እንፅኽካ አኮሜችስትⶓስታ ፋይፃንኩ ቤዴራ ቴርትኩ እንፅኽካ እንፃኽስስትካማ እጂኑ ዙራሙሪሾ ዙራንታ ፄውስትⶓ ዙሜካ::

ፌኔኬልጛንትካ /ቡካንትካ/ አሬኬዝጜካማ ኺስታ ዚጋሚ፣ ጉዋንጊስታ ቻግኒ ኬቴሙ ቺፅጝፂው ፃምርትኹ አይል ፋይፃውሳጊ እርዳቴ ፄዋው አኽⶓ አቶ በላይነህ ዙሜካ::

ቻግኒ ኬቴምዳ ፌኔኬልጜካማ /ቡካኬማ/ እጂንኩ እምፕልታቕስ 35 ኩንታል ሹምቢ፣ 5 ትኩሚ 1 ኩንታል ፊኑው እቲኒ፣ 3 ኩንታል ማኮሮኒስታ እሊኩ እሌትስ ኹጝስ እሼንኩሳ ምግብካዋ እርዳቲ ፄውስታ::

አዊ ብሄረሰቡ ኩስጚ ጝና 4ንቲ ዙሪ 3ንቲ ሚዲቢኔ ጉባዬ ካስጝፅጙ ጊዝዳ ሰላሞ አቲጙ ችግርስ ፌኔኬልጛሺንኩ 20 ሻይዴስ ጃላ ያኻንኩ እምፕልትቕ እሺኑ ዙራሙሪሾ ዙራንታ ፄውስትጝ ጉባዬዳ ጋሺስታ:: ፄትቲው ችግርካ ዊዳፊስ ኽይስታንታ እምፕልታቖ አሴቴፍጝጝስ እንፃኽስትጝ ፋይፃው አኽጝ ዳብዚ እንኩርስታ::