ባሌው ፓርክ

አለሚቱ የኔት

1962 ም/አ ቲሪትጙኽ ባሌ ካንካው ቤራዊ ፓርክ አዲስ አበባዴስ 400ኪሎሜትር እቺትዳ አግስቴ:: እሳንት 2200 ኪ/ሜትሮ ታንባው ያኹስ ስሜንዴስ ደቡብሾ ላጜታ ኪሎሜትሮ ምራብዴስ ምስራክሾ ዴሜካ 53 ኪሎሜትሮ እሳኔ:: ፓርክ ባሩ ወሌልዴስ ጀላ 1ሻይ 450ዴስ 4 ሻይ 377 ቻም ዝኩኽ ሊሊታኻዳ አግስታንኩ ዙራሙርካዋ ኬሌሌ:: 4 ሻይ 377 ቻሞ ሌጌሴምታው ይቶፒያዳ ኬፍቲስ ላጛንቲ አችዳ አግስታው ቱሉ ዲምቱ ካኖ ዴሜካማ  አፍሮ አልፓይን ኬፍቴንካ ብትካ እኒ ፓርካኻዳ አግስታና:: ባሌው ካንካ ኬፍቴንካ ዙራሙሪ ሊሊትጙንኩ ዳድካስ ፌቴርስቱንኩ አይክካ፣ ሶኼንካ ብትካ፣ ሳተጐመራው ችክችኬንካዋጊ እሜ::

ፖርኮ ሊሊታ ፄዋው እሊው ዲብ ይቶፒያዳ ድንጉሌስታ ላጚቲፅካ ሻይ ኪሎ ሜትር ስኩየሮ ሾፌናው “ሀሩ ካዌን” አኽዳ ዝኩኽ አኽጝሲያኽ:: እንዳ አኽዳኪላ እምፕል ሻይ ኪሎ ሜትር ስኩየር ያኹኽ ብሄራዊ ፓርካኻዳ አግስቱስ ይጉኽ ዋልቲ ሻይ ኪሎ ሜትር ስኩየር ታምብ ኦሮሚያ ክልሉ ካዌንስታ ካዌን እንሴስካው ኢንተርፕራይዝስ ቺትጜ:: ባሌው ካን ብሄራዊ ፓርክ ቴቬቬርጙንኩ ምንግስትካው ክንቲው ሳይንሱስታ ባይሉ አችት /ዩኔስኮ/ አሌሙ ማኼትትስ ሜዝጌባኻዳ ሜዜጌብስታ::

1ሻይ 600ዴስ ጃላ ያኻንኩ ሊሊትካ ሊሊትካ ቴክልካ፣ 78 አይኔትካ ፃኹፃንትካ እንሴስካስታ 200ዋ ናቔንኩ ቻኽካ ፓርኮ ዝኩፃ ፄዌካማ አግስታና:: እኒ ክቻዴስ 32 አይኔትካ ቴክልካ፣ 31 ናቔንኩ ብርክካ ካዌንኩ እንሴስካስታ ዋልታሾ ናቔንኩ ቴክልካ ብሄራዊ ፓርኩጃጊ እሊው አሌምዴስ ኮቴ አግስታላኪ:: ባሌ ካንካው ብሄራዊ ፓርኩ ክልላኻዳ አግስታንኩ 78 ታንባንኩ ፃኹፃንትካ ካዌንኩ እንሴስካ 17 ያኻንኩ ይቶፒያዳ ይቪቻ አግስታንኩ ብርክካ እንሴስካኽ::

እንዴስ ፌይኹስኪ ሳይንስስታ ኢኮሎጂስ ኬፍቲኒ ትክም ዝኩክ ሴንድስ ጉስስታንኩ ሊሊትካ ሊሊትካ እንሴስካዋ ፓርክ አቩቓማ እሜ:: ቴክልካስታ እንሴስካው ብዝሀይወቱ አድርትጝ አችስኪላ ፓርክ አሌምዴስ 34ንቲ አፍሪካዴስ ዴሜካ 12ንቲ አችዳ እንኩርስታ:: ባሌው ብሄራዊ ፓርክ “Bird lite international” አሌምዳ አግስታንኩ ፋይፃንትካ ቻኽካው ዝኩፂ ብቲው ቴርትዳኪላ ባሌው ፓርክ ሜዴብስታ::

ፓርካኻዳ 280ዴስ ጃላ ቻኻኩ ዜርካ ዝኩኑ ያኹስ ላጜታ ይቶፒያዳ ይቪቻ አግስታንኩዊያኽ:: አሌም አቩቑ ቻኽካ አቕቱ ሪፖርትታጊ ባሌ ካንካው ብሄራዊ ፓርክ አፍሪካው ሴዛንቲ “በርዲንግ ሳይት” እስታማ ሜዜጌብስታ:: ባሌ ብሄራዊ ፓርክሾ ዋቢሸበሌ፣ ዌብ፣ ዱማል፣ ያዶትስታ ወልመል እስታንኩ ብንካ ክቤና:: ባሌ ብሄራዊ ፓርክዳ አግስታንኩ ካዌን እንሴስካ ድሚ ውግሊ፣ ኒያላ፣ ጋኽሪ እሊኩኪላ ቶኬምስታና::

ይቶፒያው ድሚ ውግሊኪላ ዝኩዊኒው አኺኒ ኬችስያኽ:: እምፕል ኬችካዳ ሹኻ ዴስ 13ኺስታ አባልካ ዝኩጝስ ካላና:: ውላጊ ኬችካ ዝኩፂ ዙራሙሪ ዝኩኽ ያኹስ ዙራሙሪውሳ ድንቤሮኪላ ጝርጃ ድሚ ውግልካ ኬቤርፃና:: እሩብጚው ወክትስኪላ ኹን ድሚ ውግሊ ኬቹ አባልካ ጝርጃዴስ ይጐ ታምትጜ ፄውጝስ ፌኬድስታያላኪ:: ኬቹ አባልካኪላ ይሴንካ ጝርጃ ኹንሊ ታምትጜ ፄውጝስ ኬሽኹ ድል ዝኩኺያኽ::

ኒያላ እን ጋኽሪው ዜር ይቶፒያዳ ይቪቻ አግስታው ብርክ እንሴሲያኽ:: ቲሪኪላ 135 ሴ.ሜትሮ ክቻክቺስ ታንቤ:: ኹና ኒያላ 150ዴስ 200 ኪ.ግ ጝርጂ ዴሜካ 180ዴስ 300 ኪ/ግ ሚንዛኔ:: ኒያላ ባሌ ካንካ ዙራሙርካዳ ጊዊቺ፣ ክይስታ ፌያፌያማ ካዌኑ አኺኒ ካንትስታው ዙራሙሪ እሳንስ ዝኩዌ:: እምፕላ ኹና ኒያላ ሶኼታ ዴስ ሴስታ አርፋሳኺስታ እጄው ሼርቱ ጊዝ ዝኩዋት ያኹስ እምፕላኒስኪላ እምፕሎ ካሜንጝዴስ ቤዴራ ላጛ አሜትካዋ ላካሳ ቹዋዴስ አግሌሌስታላኪ:: እንዴስ ፋሌንጋ ኹን እሜ ሼራንኩ ያኹስ ጝርጃ ዴሜካ ጝርጃሾ ካስካማ አሌቔትጛና:: ኒያላ ኻፄ፣ ክዩስታ ጊዌቼ ሜጌብስቴ::

ባሌ ብሄራዊ ፓርኩ ዲኒክፂ ካኑ ካንቲኪላ ሊሊቴ እንኮኽስቶ ፌቴራንኩ ዴንካዋስታ አኹ አካልካ ቱሪስትካስ ሊሊቲ ጉስካኽ:: ፓርክዳ አግስታንኩ ካዌንኩ እንሴስካስታ ቻኽካው እልቕቲኪላ ዲኒክፂያኽ:: ፓርክሾ እንዜጛንኩ ቱሪስትካ ፓርኩሳ ካንካዋ ልኩስ ፊጝስ ዜኔግስታቲውሳ ጊዞ ፌይፃና:: ፓርክዳ አግስታንኩ ዳንካ፣ ዌብስታ ሻንያ ብንካዋስታ ሊሊትካ ሊሊትካ አኹ ቤንካዴስ አሌ ሞፄድጝስ ፍትኽናንኩ አጌሮ ጐቤናንትካስ ሊሊቲ ዴስቲው አግፅፅካኽ::

ንባሮ አግፅንኹኪ አዲስ ዋልታስታ ፋና ብሮድካስትዴስያኽ::