አለሚቱ የኔት
ቤዴርኑንኩ ሌጌሴምካ አሜትካስ ኹን ዙራሙሪው ባይልስታ ወግ ፌኬድጝዴስ ይጉጝስስታ ድፍሬቶ አቲጝስ እንፅኺው ዜርፍዳጊ ጝርጃሊ ክቻ ካንትስታቲኑ ጊዝ እሺኾ:: ሌጌሱንኩ አጌርካዳ ኩፅኒ ክንቲው ዝቤናውትስስታ እርዳትስትጝስ እንቲታኪ ልግስኒው አች ኬፍ ንጝስ ኹን ውላጊ ዜርፍዳ አሴቴፍጝጝስ ምሳላ አኽⶓ ቤዴርካማኽ ጄሜሩኑ:: ዲጊዴስ ናቴ ኩፅኒ ይቶፒያዳኪላ ኹኑ ክችክችቱሳ ሜብቶ ቴኬምስትካማ አሴሜርጝጝስ ሚንች ኹን ዋይሚስታ ያኼካማጊያኽ:: ናካሱ እትሚዳኪላ ባርኾቼኩስታ አጌራኻስኩ ይሴንካ ኹኑሳ ዴስ ካንትኹስ አንቤብፅናኻኽ ክርፂ ንባብ::
ሚንችካ ዲብካው ጄሜራ ታኹት ኹናኽ:: ሳንድራ ፕሩኔላ ማስን:: አባላምታ ባርባዶሱ ፕሬዝዳንታ፣ አባሳደርቱሳ ስፍሬ አግፅጝስ አባላምታ ዳኛ፣ ባርባዶሱ ይግባኞ ቹንታንታ ችሎቱ አባላምታ ኹና አላፋ፣ ኮመንዌልዙ ሴክሬታሪያት ጋላጋልጚ ፍርድ ጝናዳ ጄሜራ ኹና ቶሬጌማንታ ክንትፃንታኪላ እሺቲኾ::
ካሚንስቴታ ሌጌስትኹ ኢስት ፓይንት ክዱስ ፊሊፕ ባርባዶስዳ አ.ዝ.ቼ ጃኑዋሪ 17/1949ሲያኽ:: 9 አሜት ዋኹስ አባላምቲ አቾ ክንቴ ክንቲኹሳ ሴንት ካትሪን አባላምቲ አቕ ክንቲ ጝናሳ ባይፅጝስ ኩዊንስ ኮሌጅሾ እንዝጜ ፄውታ:: ፋሌንጋኪላ አዝቼ 1973 እግስ ዲግሬ እምቲኒዴስ ፋሌንጋ ሹኻንቲ አቹሳ ክንቴ ዌስት ኢንዲስ ዩኒቨርሲቲ ዋሻ ሂል ባርባዶስዳ ክንቴታ አዝቼ 1975 ሂው ውዲንግ ክንቲጝናዳ እጉሳ ክንቴ ስርትፍኬቶ አግፂኒዴስ ፋሌንግ ባርባዶሳውያንካው ታሪክስ ባርባዶሱ ባርሾ ትየታ ፌክድስታይት አባላምታ ኹና አኽጝስ ካሌ::
አዝቼ 2008ስ ባርባዶስዳ ይግባኞ እንኮኻንቲ ፍርድ ጝናዳ አባላምታ ኹና አኽጝስ ይግባኙ ዳኛ ታኻታ ሜሮ ትያ:: ሲፍፅጝስኪ እንጅኩፄ ሎንዶን ኢንግላንድዳ ፄውኽ ኮመንዌልዝ ሴክሬታሪያት ጋላጋልጚ ፍርድ ጝናዳ አዝቼ ጃንዋሪ 1 ጌርክ 2014 አባላ ታኻታ ሹሚስትጝስ አባላምታ ባርባዶሳዋ ታኻ:: ክንትፃንታ አኽጝስ ጄሜርስትኹ ሳኪትጚው እንዝጚው ኩርማኑ አሊድፂዳ አጌራው ኩስጚ ጝናስታ ሴኔት ኩስጚ ጝና ካስጝፁኽ ይጋሪው ኩችቲዳ ድምፆ አግፅጝስ አባላምታ ብሪታኒያ ንጉሱሳ ክሞ ድፅጝስ ባርባዶሱ አባላምታ ፕሬዝዳንታ ታኻታ ጉሊልስቴታ አጌላጌልታ::
ባርኾቼው ካሜንስታንትካ ይሴንካ ኹንዴስ ፌይኹስ ይቶፒያውያንካ ይሴንካስታ ጐቤዝካ ኹንኪላ አጌራው አችስ አሴሜርጙኑ ዜርፍስ አባላምትካ ያኹንኩ ኹን ዝኩና:: እኒ ክቻዴስ ዊ/ሮ ሮማን ወርክ ካሳሁን አባላምታ ይቶፒያዋ ኹና ጋዜቴናኽ:: ጛታላ ካሳሁን እንግዳሸትስታ ጛቹ ዊ/ሮ አለሙሽ አለምዴስ 1914 ም/አ አዲስ አበባዳ ካሜንስቴ:: ድሚ ክንቲስ ታንቡስኪላ ክድስት ስላሲ ብሽታንዳ ሜንፌሳዊ ክንቲ ጝና ትያታ ብሽታኑሳ ክንቴ ክንትጝስ ዳዊቶ ዴጌምታ:: ሲፍፅጝስኪ ሲዊድን ሚሲዩን ክንቲጝና ቱጝስ ወክትስ እይስታሺኹሳ ዝቤናዌ ክንቴ ክንቴ::
ክንቲ ጝናዳኪላ “ኹና ክንቲስ ፃፊስቲያላኪያኽ” ናውሳ ዴሶ ፅሬትስስታ ይሴንትስ ቲሪትጝጝስ እምፕላንታ አኽጙሳ አቾ እሚጝስ አውሮፓውያንካ ካንትፃትካስ ሼሌምስታኒስ እሺና:: ዊዛሮ ሮማን ወርክ ክንቱኑ ወክት ኹን ክንቲ ጝናሾ ካስጙሳ ድሎ አግፁኑ ዝቤን እሺኾ:: ያኼስጉ ጌና 16 አሜታ ስራ ዝኬስኪስ ትዳርስ ታሚትስቲኹዋ:: ሊጊ ድሚስኪላ ትዳሩሳ አሌሞ አሌቔትጝታታ እምፕላ ኹና ጄራ ቹ አኽጝስ ካሌ:: ዊዛሮ ሮማን ወርክ ትር አርፊዳ 1939 ም/አ አቕፂውስታ ፕሮፓጋንዳው ሚኒስቴር” እስታማ እቑስታሺኹ ሜስሪ ጝናዳ አባላምታ ኹና ጋዜቴና ታኻታ ኪፂርስቲኹዋ:: “ኹና ጄራው እንፅኺ እንጅፂ ጝናዳ” ናውሳ ወክቱሳ እምፕልታቑሳ ካንቴ ካሊጝስ አቕትስስታ ካሊጝትስ አጌሮ አጌላጌልጝስ “ጝርጂው ብቲያኽ” እስታሺኹሳ አደባባይሾ ፍይኾ:: ዊዛሮ ሮማንወርክ ወክትስ ጄሜሩኑ እንፅኺ ኹና ጄራስ ሚንቾውላ ዴስስታያሱ እሺጝስ ቴግባር ጝርጃዴስ ይቢቻ ያኻውላስ ኹንዴስ ድምክና ኪዊምጜ ዲግሳንታ ምክንያታ ያኻሺⶓ ታሪክ እርዳትፄ::
ማስታወኪ ሚኒስቴርዳ አጌላጌሉኑ ጊዝካስ ሬዲዮኑሳ አብኖ ቴርስጝስ፣ አብኖ አንቤባንታ አኽጝስ፣ ኹኑሳ ፕሮግራሞ ቴርስጝስ እንፃኽስቴ:: ቹኒታንትካስ እስካዌ ዲቦ እሜማ ዲግጝስ 25 አሜትካስ ውማይስ አምንስትጝስ አጌላጌልታ:: ኹንስ ይቪቻ ያኻውላ ጝርጃስኪላ /ሊሊትኑስኪ ጋዜቴንካስ/ አርአያ አኽጝስ ካሌ:: እንኪላ ኬፍቴና ያኹኽሳ እንካንስታንታ አኽⶓስታ ጋሽስትⶓ አግፅፃያ:: ዊዛሮ ሮማን ወርክ ካሳሁን ጄሜራ ጋዜቴና ይቪቻ እሺቲያላኪ:: ኹን ጝርጃሊ ክቻ ሴሌፍስትካማ እንፃኽስትጝስታ ዋይሜ አግጝስ ካላንኩ አኽⶓ ይቶፒያውያንካ ኹንስ ምሳላ አኽጝስ ቤዴራንትካው ቴርዳ ሚዲብስቴት እሺቲኾ:: ፊቲ ጊዝስ ዴሜካ ሊሊትጙንኩ ማቤራውካ ጉዳይካው ዙሪዳ ትኩቱንኩ ፁፍካዋኪላ ፃፊስ እሺቲኾ:: ሚንች ፁፍካኪላ ኹኑሳ ማቤራዌ ዝኩዊኔ ኬሽጝፅጝዳ ትኩቱንኩ እሺና:: ዊዛሮ ሮማንወርክ ውማይስ ፄውኑ ፍሺስ ካንትፁኑ ኬፍቲኒ እንፅኺው ፅሬትስ ሊሊትጙንኩ ሽልማትካዋ አግፄ:: ሽልማትካዴስኪላ ይቶፒያው ንጉሰ ነገስት ምንግስትዴስ ወርኩሳ ሜዳልያዋ እንቲታኪ ደራሲያንካው ታክስፂ ብሩ ሜዳልያ ቶኬምስቴ::
እሊት ይቶፒያዋ አባላምታ ኹና ፕሬዝዳንታ ዴሜካ ዊዛሮ ሳህለወርክ ዘውዴ ያኻኒስ ካሜንስትካማ ሌጌሱኑ አዲስ አበባዳኽ:: ዊዛሮ ሳህለወርክ ሚንችካ አሜትካስ ዲፕሎማሲው ዜርፍዳ እንፃኽስትካ:: አዲስ አበባዳ 1942 ምሬት አሜታስ ካሜንስቱንኩ ያኻኒስ ፈረንሳይጜ፣ እንግሊዝጜስታ አማኻርጜ ግዲፅካማ ዙማና::
ፈረንሳዩ ሞንቴፔስ ዩኒቨርስቲዴስ ፍትሬቱ ሳይንስስ ዳቔርስቱንኩ ያኻኒስ አዝቼ 1989-1993 እንጀኩፄ ሴኔጋልዳ ፄውጝስ ማሊው፣ ኬፕቨርዲው፣ ጊኒቢሳው፣ ጋምቢያውስታ ጊኒው አምባሳደራ አኽጝስ አጌላጌልካ:: አዝቼ 1993-1993 ጅቡቲው አምባሳደራ ያኼካማ እንፃኽስቴካ:: እንሱ ጊዝስ ምስራክ አፍሪካ ልማቱ በየነ ምንግስትካ አችቱ /ኢጋዱ/ ኩዋሚ ወኬልስታንታኪላ እሺና::
2002ዴስ 2006 ኺስታ ዴሜካ ፈረንሳይዳ አምባሳደራ እንቲታኪ ቴቬቬርጙንኩ ምንግስትካው ክንቲው ሳይንሱስታ ባይል ኾቱ ወኬልስታንታ ያኼካማ እንፃኽስቴካ:: ፋሌንጋኪላ ቴቬቬርጙንኩ ምንግስትካው ሊሊቲ እንፅኺ ጝናኻዳ ፃምርትኹ ሰላም ኬቤርፅጙ አይሉ ወኬልስታንታ አኽጝስ ሴንተራል አፍሪካው አላፋ ያኼካማ አጌላጌልካ::
አፍሪካው እምፕልትዳ ቴቬቬርጙንኩ ምንግስትካው ኢኮኖሚ ኮሚሽናኻዳኪላ ይቶፒያው ኩዋሚ ወኬልስታንታ ያኼካማ አጌላጌልካ:: ባርኾቼ ጉዳይካው ሚኒስቴራኻዳ አፍሪካ ጉዳይካው ዳይሬክተራ ያኼካማ እንፃኽስቴ::
አዝቼ 2011 ቴቤቤርጙንኩ ምንግስትካው ቹዋ ፃፋንታ እሺንኩ ባንኪሙን ኬንያደ ቴቤቤርጙንኩ ምንግስትካው ዳይሬክተር ጄኔራል ፄዌካማ ሹሚጝስኪላ አጌላጌልታ:: ቴቤቤርጙንኩ ምንግስትካው ቹዋ ፃፋንቲ አንቶኒዮ ጉቴሬስ አፍሪካ እምፕልትዳ ሊሊታ ወኬልስታንታ እንቲታኪ አፍሪካ እንፕልትዳ ቴቤቤርጙንኩ ምንግስትካው ቢሩው አላፋ ሹሚስትካማ አጌላጌልካ:: ትክምቲ 2011 ም/አዴስ ሜስኬሩም 2017 ም/አሜታሳኺስታ ኪላ አባላምታ ይቶፒያዋ ኹና ፕሬዝዳንታ ያኼካማ አጌላጌልካ::
ዲጊዴስናቴ ኪላ ይቶፒያዳ ኹን እገምንግስትዳ እንኩርስትኹ ክችክችቱ ሜብት ስሬታዳ ጝርጃሊ ክቻ ድሎ አግፄካማ አሴቴፍጝስ አጌራስ ዋይሜ ሜዜጌብፅካማጊያኽ:: ንባሮ አግፅንኹኪ Press.etዴስስታ ቢቢሲ አማኻርጚዴስያኽ::