ሌጌሳታምብካው ልኺትጚ

ታደለ አጋጄ

እንጃቢሪ ኬቴሙ ቺፅጝፂዳ 2017 ም/አታሱ ሌጌሳታምብካ አሴቴፍጛኑ ክሌብካው ልኺትጚ ካስጛማጊያኽ::

ኬቴምዳ አግስታንኩ ትክላሊሰ 12 ኬችካዋ አቡቕኹ ሚንችካ ሌጌሳታምብካዋ እሚጝስ ስፖርት ዜርፍስ አሴቴፍጛንታስታ ቴኬምስታንታ  ያኻንታ ፄዉስታማጊያኽ::

አኻኻሱ ልኺትጚ ልኩ ኩታስስታ ቮሊቮሉ ስፖርቱ አይኔትካስ 12 ልኩ ኩታው ኬችካስታ 6 ቮሊቮሉ ኬችካ ክቻዳ ካስጛማጊያኽ:: ልኺትጚ ግንቦት አሊዴኺስታ ካስጙስ እጄው አኽጝ ጌሌፅስታ::

ልኺትጚዳ አሴቴፍጛንኩ ስፖርቴንካ ሰላሙስታ ፄትቲው ችግርስ ኬውጛማ እጂኹ ስፖርቱ ልኺትጚ ጄሜርጝ ቲኖ ማንዲጝዴስ ፌይኹስ እምፕልቶ ይስጝፅጝስስታ አቕትጝጙሳ ዴሶ አግፁኑ አኽⶓ ዙሜካ::

እንጃቢሪ ኬቴሙ ዎታትካስታ ስፖርት ፅፌት ጝናሹ አላፊ አቶ ማስተዋል ፈንቴ ጌሌፁኑውስታ ቓቔፃማ እጂኹሳ ስፖርቱሳ ልኺትጜ ጁትጝፅጝስ ልኺትጚ ካስጛታ ጄሜርፅጝ ዎታትካ ጉዳጋቲው ስፍሪዳ እሼቲንታ ፄውጝስ ኬፍንኹ ትክም ዝኩኹ አኽⶓ ዙሜካ::

እንጃቢሪ ኬቴሙ አብትዌንካ ስፖርቱ ዜርፍስ ዎታትካዋ ቴኬምስታንታ ፄውጝስ እንፃኽስትካማጊያኽ ኑንኩ አላፊ አብትዌንካ ስፖርትስ ፄውኑ ፍሺስ ምስጋኔ ዲግስካ::

ሌጌሳታምካው ስፖርቱ ልኺትጚ ልኩ ኩታስስታ ቮሊቮሉ ሰፖርቱ ልኺትጚ ዳር አርፊዴስ ጉሽፃማ ግንቦት አርፊው አሊዴኺስታ ሲፋው አኽⶓ ጌሌፁንኩ አላፊ ይንታውዳ ዴሜካ ክንቲ ጝንካው ልኺትጚ ካስጛው አኽⶓ ዙሜካ::

አቡሽ ቦጋለ ህንፂው ክሌብ ጛሾስ ስፖርቱ ዜርፍዳ አሴቴፍጝጝ ዎታትካ ስፖርቱ እንፃኽፂ ስፍራዳ አግስትጝ፣ አጌሮ አሬኬብስታውሳ ክምንቶ አፌርጝስ ጛውሳ ታምቦጊ ፊትጝⶓ ዙሜካ:: እሊኩኪላ እን ዜርፍዳ አሴቴፍጙኒ ዎታትካዋ ቴኬምስታንታ ያኻንታ ካሊፃው አኽⶓ ዙሜካ::ንባር አዊ ኮምኒኬዊያኽ::