ምንይችል እንግዳ
ዲጊስ አፍሪካ እምፕልቱ ጉሳንታካው ጉባዬ አዲስአበባዳ ካስጝጝ አቕስቴ:: ጉሳንትካው ዙሚስትኹጚ ቺፋ ካባካቢማ ጁዋው እምፕል አፍሪካው እምፕልቱ ሜንፌስ ዝኮ:: እንኪላ ፓንአፍሪካኒዝምያኽ:: ጋያኪ እንአጌራ ይቶፒያ አፍሪካውካናከው አርኔትስስታ ፓነ አፈሪካኒዝሙ እሳንጝጝስታ ይሴንጝስ ፄውስትኹ ፍሺ ትኩምስቴ:: ታሪክስ ድኹስቴ:: እን ፃርክካው አርኔቱ ሜንፌስ (ፓን አፍሪካኒዝም) ክምንተስታ ልግስ አይስስታ ዋኒናናኩ ካስካ ጁጝ ይጉዋላኽ:: አኽስከላ ማርከስ ጋርቬይ ዜኔግስታቲው አያኻማ አግስቴ::
ጃማይካ አጌራዳ ሴንት አን አይ ስቴት ስፍራዳ አውሮው ዝቤን ቼፋታ ኦገስተ17‹1887 ካሜስትኹ ማራከስ ሞሲያህ ጋርቬ ጚታላ ሰር ማርከስ ጋርቨየስስታ ጚቹ ሳራ ጀይን ሪቻራድስ 11ንቲ ጄር ያኹስ 14 አሚቲ ያኼምባ ኺስታ ክንቴ ጃማይካዳ ሲፍጝጛ:: አባላምቴ ኮስታሪካስታ ሲፍፃማኪ እንግሊዝ ለንደንሾ ካስጝዴስ ፍና እትሜት ጝናዳ እንፅኼ ዴስንቲ ያኻማ እንፃኽስታ:: ክንቴ ኬፄልጝስ ለንደንዳ እጎስታ ፍልስፍኔ ክንታ::
1927ስ አውሮፓው ዝቤን ችፍታ (አ.ዝ.ቼ) ጃማይካሾ ዙራማ ለንደንሾ ዙርጝዴስ ፍና ሚንችካ ፓንአፍሪካኒዝምኩ ልቕልቕትካዋ አችትጝፅጝስ ካላ:: ማርከስ ጋርቬይ ፃርክካው ብሄርቴንትስታ ፓንአፍሪካኒዝምኩ ልቕልቕትካው ታብሊ አኽዴስ ጃላ አሌማቡቕ ፍናእዜጝካው (ተራማጅካ)ፃርክካው ማቤርካዋ ቲሪትጝፃንቲስታ ጁትጝፃንቲ ኪላ እሺኾ::
ጋርቬይ ፓንአፍሪካኒዝሙሳ ፍልስፍኔ እሳንጝፅጝስ ጋርቬይዝም አሌማቡቕ ሚንቸካው ልቕልቕቲ ፌቴርስታታ ጁትጝፃ:: ቻ እሼማኪላ ጋርቬይዝም እስልምኒው ብሄርቴንቶስታ ራስ ታፋሪስታው ልቕልቕትካ ጁትጛንታ ምክንያታ ያኻ:: እንዴስ ድምክና ፃርክካው አርኔት/ፓን አፍሪካኒዝሙሳ ሼሽፄ ፌቴራ:: ፓንአፍሪካኒዝሙ ቺርቤዋ አ.ዝ.ቼ( አውሮፓው ዝቤን ቼፋ) ጃነዋሪ 1940ዳ ስትሮክ ታሳማ(ብሪ አይምሩሾ እንዜስ ኬውጝጝ) አካላት አዜዝስታላ ንኾ:: እንታኮው አኺኒስ ሚንቾ ጊዞ ስካዮ ካንቱስ እጄማ አ.ዝ.ቼ ጁን 10‹ 1940 ላጛንቲ ጊዝስ ስትሮክስ ታስስታማ 52ንቲ አሜትዳ እነዴስ አሌምዴስ አጉሌልስታ:: ጚ ካሜንኹ ፍልስፈኒው ውርስ ኩፅኒ ዝቤንካዋ ካያማ አፍሪካው እንግራ ካሜንስትጝስ ልቕልቕፃንቲ ሞቴር ያኻማ ኬፄላ::