ዲጊ ጊዝዴስ ናቴ ዝኩዊኒው ክብርናቲ አጌርታጊ ይዝኩዊ ፍታና ፋያኻ:: አቕ ሊሊትጙንኩ ፍሽካዋ ሾፌናማ ዝኩጝስ ኮቴ ካሊስታያላኪ:: ስርኩ እስታንኩ ዲብካዋ ዋኽትጝፅጝ ዝኩጝስ ችሪ አኽⶓኺስታ ታንባ:: ስርኩ ፋይካውኪያኻ እሊኩ ዝኩዊኒው ፋይፃንትካ ዲብካው ዋይሚው ክብርናቲ እምፕልታቖ ምኽምኽፅጝዴስ ፌያማ ቴስፌ አታንታ ፄዋማጊያኽ::
ዝኩዊኒ ክብርናቲው ኒንዲፊው ቻኒስትስ ፍዴ ካንታንኩ ክቻዴስ ሊሊትኑስኪላ ደሞዝቲኒ ምንግስቱ እንፃኽስታንቲ፣ ጌርኩ እንፃኽስታንትካ፣ እንፅኼ ፋያንትካኽ:: ሚንች እምፕልታቕ ዝኩዊኒው ክብርናቲ ምክንያታስ ችግሩ ጅቕጅቓኻዳ ቱዌካ::
ጝሺ ዝኩኽ ዝኩዊኒው ቻኒስት እንጚስ ኬፄሉኒጊ አጌራዳ ታምፃው ኬውስ ይዝኩዊያኽ:: ንባርካ ቶኬማኑውስታጊ እንታኮው ችግር ምራብ አፍሪካዳ ዝኩንኩ ቡርኪናፋሶ፣ ማሊስታ ኒጀርዳ ማቤራዌ፣ ኢኮኖሚያዌሰታ ፖለቲካዌ ኬውሶ ፌቴራ:: እን ድል እን አጌራዳኪላ ኬሴትሰታ::
እሌት ቺፋ ዴሜካማጊ ካሳው ዝኩዊኒው ክብርናቲስ ጉሽፃ ያኻንኩ ምክንያትካ ዝኩኒኪላ እንሳ አኺኔ ባስጛታ ፄዋንኩ ክቻዴስ ዴሜካ ዴሬታኑውላስ አድርትጝስ ፋያንኩ ደላልካስታ ዋፅዋፅካ ጌፄንካኪላ ቶኬምስታንትካኽ:: እንጊ ይንታውኪላ አቕቱ ታክስጚዴስ ፊጝስ ጛጂ ይቪችካ ዝኩጝስ ታክሳንኩ አቕስያኽ:: ድኹዋራ “እን ክቱኒዴስ ክምባኺ ዋጊቲን” ኒኹስታጊ:: እኖጂ ዝኩኑኒዴስ እሊውስ ሻኽናላ ንጝስ ክብርናቶ ባስጝፅጝስ ፅሬቶ ፄዋንኩ እምፕልታቕኪላ ሼውንጝስ አቒ ጄራሱ ዝኩዊኒስ ታክስጝ ቱስቴ:: ምንግስትኪላ ያኹኒ ዝኩዊኒ አሬኬዛታ ፄውጝስ ካሊፃንኩ እንፃኽስትጝካዋጊ ቴኬምስትጝስ እዝብ ካላው አክምስ ዝኩዋታ ካሊፃንኩ አኼንካዋ ፌቴርጝ ፋይፄ:: አሜሬታንትካ እምፕልታቑ ቤንካኪላ ያኹኒ እን ዝኩዊኒው ክብርናቲ አሬኬዛታ ይሳማ እንፃኽስትጝስስታ ምርቶስታ ምርታምቶ ዴሜካንኩ ሴልካዋ ቴኬምስትጝስ ምርቱ ዲግስጚ ዴሜካታ ፄውጝዴስ ፌይኹስ አቒ ጄራስኪላ ታክስጝስ ዋይሚውዳ አኺኒዳኪላ ካንቴ ፄውጝ ቱስቴ:: እኑስ እኖ ታክስጚስኪላ እንሳ ዝኩዋኒውሳ ችግሮ ካይጝ ፋይፃንቲያኽ::