ምሱቡ ቢሪኪቲ

ታደለ አጋጄ

ይቶፒያ እንሴስካው አብትስ አፍሪካዴስ አባላምቲዳ ሚዲብስቴት ታኹስ ዜርፍዴስ ኩፂ ሚንቾውላ ትክሞ አግፄታጊ ጋቲው አኽⶓ ንባርካ ምልኻታና:: እንሴስካውሳ ቲኖ ማንዲጝዳ ፣ሜጌብጚዳ፣ አንኬባኬብጚዳስታ ጌቤሉ ታምትጚዳ ችግርካ ዝኩⶓ ካቢትጚስ ጁዋው ጉዳያኽ::

ይቶፒያ ዝኩኽሳ እንሴስካዉሳ አብቶ ቱስታው ዳድስ ትክሞ አግፄታጊ ጋቲው ያኹኒዉላ ዲጊ ጊዝዴስ ናቴ ኩፂ ግብርኒው ዜርፍዳ እይስትኹ ሊሊቲ ትኩትስ ኪሲ ካንትስታማጊያኽ:: አጌር አቡቕ አችስ ምስቡ ቢሪኪቲው ቤን ያኹኽ እንሴስካዋ እሩብፅጙስታ ሌፍፅጝስ እንፅኺስ ኬቴምዳ ያኻ ጌፄሩ ዙራሙሪዳ ትክሞ አግፄውሻንኩ እምፕልታቕኩ ቤንካ ልቓ ጋቲንኩዊያኽ::

አዮ ጉዋጉሲ ወረዳ 3ቱ ሰኞ ኬቤሊው ዝኩዋንቲ አቶ ካሳሁን የኔት ስልኪስ ፄውኑ እጂጚዳ እንሴስካው አብትዳ አሴሜርጛማ ኬሽኹሳ ትክሞ አግፅⶓ ዙሜካ:: ግብርኒው እንፅኺዴስ ኬምፕስ ኬምፖ እንሴስካዋ እሩብፅጝስስታ ቡዚስጝስ ኬሽኹሳ ኪሴ ካንትፅⶓ ቶኬሙንኩ አቶ ካሳሁን እን እንፅኺው ዜርፍሾ ቱኑኪላ 2009 ም.አሜታዴስ ጉሽፃማ አኽⶓ ድኹዌካ:: እንሴስካው አብትዳ አሴሜርጜካማ እንፅኼ ጄሜሩኒዴስ ናቴ ኬሽጝኹሳ ዝኩዊኔ ጉሳና ::

አቶ ካሳሁን እሺኩሳ ቤራዋ ሌፍፅካማ ዋያና:: ቹንችካ ዱርካዋ ሌጌፅካማ ጌቤልስ ዲግሳና::ኾሺኩሳ ክምካዋ እሩብፃና:: ታይካዋ ሌፍፅጝስ እሺስ ዋያና:: እንስኪላ 120 ዚንጎ ኮርኮሮ እንሴስካስ ግቢቴካማ እንፃኽስቴካማጊ አግስታንኩ አኽⶓ ዲብስካ::

ግብርኒውሳ እንፅኼ ይስጝፄካማ እንፃኽስትጝስ ጛው ዝኩዊኒዳ ኪሴ ካንትፃውሻንኩ አቶ ካሳሁን እንሴስካዋ ሌፍፅጝዳስታ እሩብፅጝዳ አሴሜርጙኒዴስ ፋሌንጋ ሚንችካ ዎታትካስ እንፅኺውሳ ድሎ ፌቴርጝስ እንፃኽፃና:: ክንቴ አሌዱንኩ ጄርካ እን እንፅኺው ዜርፍዳ አሴሜርጜካማ ዝኩዊኔ ጉሳንታ ፄዋማጊያኽ::

ልቓስ ጄሜሩኑሳ እንፅኼ እሳንጝፄካማጊ አግስታንኩ አኽⶓ ቶኬምካማ ጌርክስ 3ዴስ 4 ያኻንኩ እንፃኽስታንትካዋ ኬፄርጝስ እንፃኽፃና::

እንሴስካዋ እሩብፅጝስስታ ሌፍፅጝስ አግፃኑ ሚፂስ እሌቱሳ ምግቦ ሾፌናና:: ሜቴቴንጙኽሳ ምግቦ ኹዋንታ ፄዋ:: እሊኩ እምፕልታቕስኪላ ዋያና:: ኾሺ ዋይስታቲው እሺኹ ዙራሙሪዳ ናካዳ እምፕልታቕ ኾሼ ጄዌካማ ቴኬምስታንኩ አኽⶓ ዙሜካ::

ጛዴስ ካንትካማ እሊኩ አሬሳቻንትካጊ እንሴስካው ልማቱ ዜርፍዳ አሴሜርጜካማጊ አኽⶓ ዙሙንኩ አቶ ካሳሁን እንሴስካው ዜርፍስ ኬሽኹሳ ሚፄ አግፅጝስ እንሴስካስ ፋይፃውሳ ምግቦ እይጝስስታ ቱስቲስ አንኬባንኬብጝ ፋይፃው አኽⶓ ዙሜካ::

“እንሴስካዋ ቡዚስጝስ እይስታው ምግብ ዝኮ:: ኾሺኩ ክምካስ እይስታው ጚው ያኹኽ ምግብ ዝኮ:: እንኩላሎ ድርባንኩስ ያኻ እሺኩ ዱርካስ እይስታው ጛርቶ ካሉኽ ምግብ ዝኮ:: ዴስስ እንሴስካስ እይስታው ምግብ ኩፅኒ ዋይሚስታ ፄውጝስ ካሊስታላኽ” ናኒስ እንሴስካስ ፄዋኑሳ ሚጊብጜ ድኹዌካ::

አቶ ካሳሁን ዙሙኑውስታጊ ናካዳ 10ዴስ 15 ኺስታ ቤራዋ ሌፍፅካ:: 20ዴስ ጃላ ታይካዋ ሌፍፃና፣ ዋልታ ኾሺኩሳ ክምካዋኪላ እሩብፃና::

አቶ ካሳሁን ዎክቶ ማንዴካማ እንሴስካዋ ሌፍፃንኩ አኽⶓ ቶኬምካማ ሳኑ ዎክትዳ እንሴስካዋ እሳንስ ሌፍፃቲንታ ዳዴኽስታ ዜሬፍጝ ስጋትዳ ሚፅኹ አኽⶓ ቶኬምካማ ችኹ ዎክትዳ ሚንቺትስ ሌፍፅጝስ እክዶ እሚⶓ ዙሜካ::

እንሴስካዋ እሩብፅጝስታ ሌፍፅጙ ዜርፍሾ ቱኑሳ አላሜ እንክርፃኒስ “ማልጛ ቴኬማው እንፅኺው ዜርፍ አኽጝስ ክንቱንኩ ጄርካ እን ዜርፍዳ አሴማርጜካማ እንፅኺው ድል ፌቴርስታታ ፄዉጝያኽ” ናኒስ ዙሜካ::

ፅክራ ላጛንቲ ቤኖ ዊድኹ ጄርስ እንሴስካዋ እሩብፅጙስታ ሌፍፅጙ ዜርፍዳ አሴሜርጛንታ ፄዌካ::

አቶ ካሳሁን  ጌቤሉ ታምትጚው ፣ እንፃኽፂ ብቲው ችግርስታ ወረዳው ፍታዊ ያኻያሱ እንፃኽስትጝጚው ችግርካ ኽይስታያንታ ካሲካ::

እሊው አዮ ጉዋጉሲ ወረዳ 3ቱ ሰኞ ኬቤሊው ዝኩዋንቲ አቶ ነበሩ አዳሙ ስልኪስ ፄውኑ እጂጚዳ ጛኪላ እንሴስካዋ እሩብፅጝስስታ ሌፍፃማ ዋይጝስ ትክሞ አግፄካማጊ አኽⶓ ዙሜካ:: ኾሺኩሳ ክምካዋ እሩብፅጝስ፣ ቤራዋ ሌፍፅጝስ፣ታይካዋስታ ዱርካዋ እሩብፅጝስ ኬሽኹሳ ኢኮኖሚውሳ ትክሞ አግፄካማጊ አኽⶓ ዙሜካ::

አቶ ነበሩ ናካዳ 500ዴስ ጃላ ዱርካዋ እሩብፃውሻና:: ሌጌፅካማ እሺስ ዋያና:: እንኩላሎ ድርባንኩሳ ዱርካዋጊ እሩብፃና:: ፌሬንጅኩሳ ቤራዋ ሌፍፃና:: እምፕሎ ሌፍኹሳ ቢሬ 120 ሻይ ብሮኺስታ ዋያንኩ አኽⶓ ዙሙንኩ አቶ ነበሩ ግብርኒው እንፅኺስ  ኬሽኹሳ   ዝኩዊኔ ጉሳና::

እንሴስካው ልማትዳ ኬሽኹሳ ትክሞ አግፃንታ ግብርኒኩ ውማይቴንካው እርዳቲ ኬሽኹ አኽⶓ ቶኬምካማ እንሴስካው ዜርፍዴስ ኬሽኹሳ ትክሞ አግፅጝ ቱስታው ዳድስ አንኬባንኬብጝ ፋይፃው አኽⶓ ዲብስካ:: ጛኪላ ጌቤሉ ታምትጚው ችግርስታ እንፃኽፂ ስፍሪው ችግርስ ኽይስታያታ ካሲካ::

አዩ ጉዋጉሲ ወረዳ ግብርኒው ፅፌት ጝናዳ እንሴስካው አብቱ ልማቱ ፅፌት ጝናሱ እንሴስካዋ እሩብፅጙ ኬቹ ጉሳንቲ ተመስገን ደሴ ወረዳታጊ ሌማት ትሩፋቱ /ምሱቡ ቢሪኪቲ/ ኢኒሼቲቩ እንፅኺስ አሬሳቻንትካ እንሴስካዋ እሩብፅጙስታ ሌፍፅጙ እንፅኺስ 54 ሻይ 706 ክምካዋ ሌፍፅካማ ጌቤልስ ዲግስጝስ አኬድካማ እንፃኽስቴካማጊ አግስታንኩ አኽⶓ ጌሌፅካ:: 22ሻይ 185 ያኻንኩሳ ቤራዋ ሌፍፅጝስ ወረዳው አችስ ካስጙኽ አውደሪይዳ ዲግስⶓ ጌሌፅካ:: ምሱቡ ቢሪኪቲ ቹዋ አላሚ እንሴስካዋ እሩብፅጝስ፣ ኾሺውስታ እንኩላሉ ምርትስ አሬሳቻንትካዋ ቴኬምስታንታ ፄውጝስ እንፃኽስቴካማጊ አኽⶓ ቶኬምካ:: ወረዳታጊ 27 ሻይ 644 አሬሳቻንትካ እንሴስካዉ ልማትስ ቴኬምስታንታ አኽⶓ እርዳትፅካ:: እንሴስካዋ ሌፍፅጝዳ:: ዱርካዋ እሩብፅጝዳስታ ኾሺው ምርትዳ አሴሜርጙንኩ እምፕልታቕ ጉሻኑ እንፃኽፂ ስፍሪውሳ ችግሮ ኽይጝስ አሬሳቻንትካ ቢዝነስ ፕላኑሳ ፕሮጀክቶ እንፃኽስትጝስ ወረዳው ቺፅጝፂው ካቪኒስ ዲግስካማ ኮሚቴስ ጋማጋምስታማጊ አግስታው አኽⶓ  ቶኬምካማ ዲጊስ ዙርሚ እይስታው አኽⶓ ቶኬምካ::

ጌቤሉ ታምትጚዳ ዝኩኹሳ ችግሮ ኽይጝስ ጊፁ ፅፌት ጝናሊ ዙሚትጝጝስ ጌቤሉ ታምትጚ ፌቴርስታታ እንጃቢሪ ዩንቨርስቲሊ እምፕልትስ እንፃኽስታንኩ አኽⶓ ታክስፅካ::

ሶኼት ቺፋ 30 ያኻንኩ ቤራዋ፣  5 ሊኻ ሊትሮ ኾሼ ዲግስጝስ ካላንኩ ያኹኒጊ እንጃቢሪ ዩንቨርስቲ ውሎ እሚጝስ ዳብዳቤ ፃፋማ አቕፅⶓ ጌሌፅካማ  ዲጊስ  ኽይቲ እይስታዉ አኽⶓ ጉሽካ::

ኾሺውሳ ማቢሬ ቲሪትጝፅጝስ እክድስ እምስታማ እንፃኽስትጝስ ፅሬት ፄውስታማጊ አኽⶓ ጉሽካ:: እንሴስካዉ ልማትዳ አሴሜርጙንኩ ሞዴል  አሬሳቻንትካስ ስልታኔ እይጝስ እንፅኺሾ ቱዋንታ ፄውጝስ እርዳቴ ፄዌካማጊ አኽⶓኪላ ጌሌፅካ::

አዮ ጉዋጉሲ ወረዳ እንሴስካው አብትስ ኬሽኹ አክም ዝኩኹ አኽጝስ እን ዜርፍዳ አሴሜርጝጝስ ፋያንኩ ጛርት አቕ ይንቴካማ እንፃኽስታንታ እቑዌ ፌያፌይጝፄካ::