ካራማራ

ገነት አየነ

ይቶፒያውስታ ሶማሊያው ምንግስት ክቻዳ ሜቴንስ ሳሴርካስታ ይዝኩካ ወሬምካ ፌቴርስታሺና:: እኒጛዴስ እምፕል ማልጜ ሚንች ድኽጚ ካንትስቱኽ፤ ዎሬራንቲ ሶማሊያው አይል ሜንቾ ቤዴራ ቴርቶ ፄውኽስታ ሊሊትካ ዝቤኑ ዎሬምኩ ሜሳርካስ አችትጙኽ ዎሬም እሺኾ:: ይቶፒያኩ ኬቴምካ አቕስታቲንኩ ሚሳኤልካስ፣ እቺዴስ አሬኻንኩ ሜድፍካስ ዳብዳብስትካ:: ሲኦሉ ሌግታ ላቕላቕናንኩ ሜሳርካስ ጃላዴስ ኩክሬኺስቴ አሬስስትካ:: ታክሲሎ አጉዊስ እሉኽ እሪስ ዋኹኽ ብንታጊ ብቴ አምፖ ወኻባይንኩ ዎሬምኩ ሜሳርካስ ስታ ማኪንካስ ሚንችካ ፅንኩትካ ዎሬሙ ሴብትጚዳ አሴቴፍጝካይስኩ አጌር አቑሳ እንኬ ኻፂታ አንጌፋ ካራማራው ዎሬም:: ናኪኒ ባይሉ አምድዳ ኪላ አድዋዴስ ሲፋማ ታሪክስ ላጛንቲ ኽሳንቲ ዎሬም ያኹኽሳ ካራማራውሳ ዎሬሞ ጉሽፄስታ ታምፁኽሳ ኬሴቶ ጋያኪ ድሎ አንቤብፅጝስ ፋኑኻ::

አፍሪካ አውሮፓኩ አጌርካስ ካይስክምስቲኹ ዝቤን እሺኾ:: እንጊዛይ ሶማሊያ አሊዲዳ እንግሊዝዴስ ሰታ ታሊያኑ ክምስትጝዴስ ኔፃ ታኹኻ:: ታሊያኑ ውራሪዴስ 5 አሜትዴስ ፋሌንጋኪላ ይቶፒያው ምንግስትዳስታ እንግሊዙ ምንግሰት ከቻዳ እምፕል ውል ፌሬምስትኾ:: እን ውልኪላ እንግሊዝካ ይቶፒያውሳ ሉዋላውቶ ኬቤርፅካማ ላጛንቲ አሌሙ ወሬም አሌድስትምባ ኺስታ ኦጋዴኖ አዴርስ ቺትጝፃንታ ናው እሺኾ:: ላጛንቲ አሌሙ ዎሬም አሌድስታኒ እንግሊዝ አዴርስ ቺትጝፄሽቲኹሳ ኦጋዴኖ ይቶፒያስ ዙርፂኾ::

አዝቼ 1967ስ ሶማሊያው ፕሬዝዳንታ ያኻማ ሹሚስትኹ ኢብራሂም አጋል ኬንያውሳ ሰሜናዌ ቤኖ ጀቡቲዋስታ ይቶፒያውሳ ኦጋዴኖ ቴክሌልጝፃማ ኽሳንታ ሶማሊያዋ ቲሪትጝፅጝስ ኬፍቲኔ ፋዩ ካንትፁኻ:: አዝቼ 1969 ሶማሊያዳ ምንግስቶ ግርብስ ድርብጝስ ፕሬዚዳንት ዚያድባሬ ስልታኖ እሚና:: ቢዲሪ ፕሬዝዳንቱ  ፋይዴስ ኬፍንኹሳ ፋዬ ካንትፁና ::ውላ ዲብ ስርዴስ ካሲስትኾ::

ፕሬዚዳንት ዚያድባሬ ይቶፒያዴስ ሶማሊያ ፋታው ኦጋዴኖ ይቪቼ ጋቲው ያኽ ንጝስ ይቶፒያ ካፂኹ እኖጂሱ ብቲ ሃረርጌ፣ ባሌስታ ሲዳሞ አጌር ቤናጊያኽ ንጝስ አዋጆ አዌጅፅኾ:: አዋሽ ቤኑ ኩክሪዴስ ጉሽፃማ እኖጂሱ ብቲያኽ ንⶓ ጄሜርኾ:: ሶማሊያው ምንግስት ሾሻሊዝሙ ሲፋንቲ አኽⶓ ይፋስ አዌጁኽ አኽጝስ ሶቪየትዩኒየንኪላ ሶማሊያስ እስካውካ ስታ ዝቤናውካ ሜሳርካዋ ይትኾ:: ላጜቲ አሜታሳጊ ውታድሬ አችትጝፅጝስ ይቶፒያዋ ዎሬርጝስ ቴርቲኾ:: ይቶፒያ ዚያድባሬ እንሳጊ ውታድሪውሳ ቤዴራ ቴርቶ ፄውስ እሊው አጌራኻሱ ችግርስ ባፃባፅስቴው ጊዝ እሺኾ:: ስልታንዳ ዝኩኽ ኮሎኔል መንግስቱ ሃይለማርያም ከዳማዊ ሃይለስላሲዴስ ቻቤሉክ ሴዛ ዎሬምኩ ቤንካ ይቢችካ እሺና ይቶፒያኩ ውታድርካ:: እን አኽጝስ ይቶፒያው ሰራዊቲው ቼፍ ሶማሊያሊ ካንትጛኒ ኪንዴውላ ያኻው እሺያላ:: ዎሬምዴስ ፍና ሊሊትጙንኩ ሹማጌልትኩ ፅሬትካ ፄውስቴካ:: እንጚዴስኪላ የመንዳ ፄውስቱኽ አሊዲ ፊዳል ካስትሮው ሹሜጌልፅጝ ኪላ ዚያድባሬው ኻልኻልትስ ሳኪትጛውላስ ይጉኻ::

ሶማሊያው ምንግስት ውራሬ ኩቲስ ጄሜርጝዴስ ፍና ቤፍታቱካ /Insergents/ ውታድርካዋ ይቶፒያሾ ቱዋንታ ፄውኻ:: እኒጛ ቤፍታ ቱካኪላ /Inserigents/ ሊሊትጙንኩሳ ድፅካዋ ፌፄማችኹኒውላ ዋሺኔኪ ይቶፒያውሳ ኬቴሞ ቼፍጝጝስ ካሌካያ::

ይቶፒያ ሶማሊያው ድንቤርዳ አግስቴት ዶሎዳዋ ኬቴማዋ ደቡብ ኡጋዴንሾስ አግስቴት ባሬ ኬቴማዋ ስታ ደቡባዊ ባሌስ አግስታንኩ ኩልኩ ስፍርካዳ ቤፍትስ ሴብትጜ ጄሜሩና::

ይፋስ ውራሪ አምሊ 15 1969ስ ጄሜርስቱኻ:: ፕሬዚዳንት ዚያድባሬው ኽሳንታ ሶማሊያዋ ቲሪትጝፅጙሳ አሳቦ ሳኪትጝፅጝስ 7 አሜታስ አችትጝፁኽሳ ውታድሬ ዋኽ አይልስ ሴብትጛንታ ትዛዞ እዩና:: ሶማሊያ ኦጋዴንስ ስታ እሊኩ ላጛ ስፍርካስ ስራዊቴ ሚፅፂኾ:: ይስኹ ሴብትጚ ካስጙኻ:: ይቶፒያው ሴራዊቲ እን ጊዛይ ዶንጌትኹ ሜሳሪ አሜሪካ ላጛንቲ አሌሙ ዎሬም ጊዛይ ግቢቲኹሳ አሜሪካ ግቢቴ ሜሳሬ እሺኾ::

ሶሚሊያው ሴራዊቲው ቺፍ ይቢቺ ያኻውላ ዶንጌትኹ ሜሳሪው ዝቤናውትኪላ ይቶፒያሊ ካንትጛኒ ማልጜ ሊሊቲ እሺኾ:: እን ጊዛይ ይቶፒያው ምንግስት ኮሎኔል መንግስቱ ሃይለማርያም ቹዋ አጌራስ ጁዋን ዜሜቻን ንጝስ እቑዌ ዲግሱና:: ይቶፒያው እዝብኪላ ቹዋ እቑቴታ እንጋ ናው እላኽ ውላጊ ዳሪዴስ ዳሬ ዜሜቹና:: ይቶፒያ እዝባዌ ውታድሬ ሲሊቲንፂኾ:: ፄዋማኪ ዳላው ሜሳሪውሳ እርዳቴ ካሲጝስ ምስራክኩ አጌርካሾ ካትኾ:: ቻይና፣ የመን፣ ይጐዝላቪያ ኩባ ስታ እሊኩጊ ይቶፒያስ ሴራዊቲውሳስታ ሜሳሪውሳ እርዳቴ ፄውንኩ አጌርካ እሺና:: እሊው ሶቪየት ዩኒየን ሶማሊያት እርዳታንታ እሽቲት ታኻችኽቱኒውላ ጊዝዴስ ፋሌንጋ ሶማሊያሊ አስሜሚጜ አቲጝስ ይቶፒያሾ እላፎ ዙርፄ:: ይቶፒያኪላ ባርኾቼዴስ አግፂኩ ዎሬምኩ ሜሳርካስ  እንግራ ይጉካ አሜሪካ ግቢትካ ሜሳርካዴስ ሶቪየት- የኒየንኩ ዝቤናውካ ሜሳርካስ ስራዌቴ ዱንጊፂኾ:: ቤዴራ እሺኹ 4 ዎሬም ቤናዴስ 9ዋ ዴሜክጝስ ትክላሊስ 13 ዎሬምኩ ቤንካዋ አችትጝፂኾ:: ይቶፒያው ስራዊቲ ማንዚ 8ስ ዋኾ ውታድሪውሳ ስዬስታ ሜሳሬ ዶንጌታማ አድባባይዳ ፊጝስ አጌራስ ቴሬው አኽⶓ ካንትፁኻ:: እን ጌርካስ ውታድሪውሳ ሴልፎ አሌምዳ ካንፅስታ ያቓያሱ ሊጊሲሚ ውታድሪው ስልፍያኽ ኪላ ንካ::

ቴርቱኽ ይቶፒያው ሴራዊቲስታ ባርኾቼዴስ ይንቱንኩ ሴራዊትካ ሴብትጜ ጄሜሩና:: አጌራስ ናኒስ ክራፊትጙና:: ሶማሊያውሳ ሴራዊቴ ምሽጐ ዱንፄካ ቱዌካማጊ ታምባውሳ አቲሱና:: ይቶፒያው ዎሬም ችየክሰንስስታ ኮሬሾስ ቱጝስ ይካቲት 23 1970ስ ጂጂጋዳ ይስኹሳ ፅካቶ ብስኾ:: ሶማሊያው ዎሬራንቲኪላ ታክስታያሱ ዳድስ ይንታባያኒ ኪንክንጝስ ጂጂጋዋ ባይፃላናማ ክራፊትጙኻ:: ያኼችኽስጉ ካሊስታው ዲብ ያኻያላ:: ጅጅጋዋ ባይፃማ ቡካማ ካስጝስ ካራማራዳ አዚዝፄ ጉትፖ ብስኾ:: ይቶፒያው አይሩ አይልኪላ ሶማሊያውሳ ድንቤሮኺስቴ ቱጝስ ውታድሪኩሳ ታምትጝፅካዋ ዳባዳብኾ:: ልቓ ሩምብልካ ዝኩንቲ ይቶፒያ ቢኩንኩ /አቕስቱንኩ/ ሩምብልካዋ እሽታንትካ /ቤሬርፃንትካዋ እሚንኩ ያኻኒስ አሌሞ ግሩም እፁኽ ውማይ ካሌቕትስ ቼፍስታ ዝቤናውትስ ይቶፒያዴስ ኬሹንኩሳ ሶማሊያኩሳ ሩምብልካዋ ድባን አምፓዴስ ብቲሾ እሪታ አንጌፋውሺና:: ዴዴጝጊዝስ ሶማሊያውሳ ጄትካዋ ይቶፒያው ክልልዴስ ኔፃ ፄውና:: ካራማሪዳኪላ ይካቲት 26/1970ስ ታሪኮ እንፃኽስቱና:: ካራማራዳ ታንክ ታንክስ ፍችስታ:: ዝቤናውካ ሶማሊያኩሳ ዎሬምኩሳ ሜሳርካዋ አይር አይል ዳባ ዳባማጊ ትክሞ እያቲንታ ፄዋ:: ሜንች ይቶፒያውካ ስታ ባርኾቼኩ ስራዊትካ አይር አይል ጛሬ ጛሬ ናማጊ አምፕዴስ ድርባኒ እዝባዊ ሰራዊትካ ዴሜካ ኩክሪስ ቱዌካማጊ ኦጋዴኖስታ እሊኩ እምስቱንኩ ኬቴምካዋ ኔፃ ፄውና::

ካራማራው ውራሪኪላ ሚንችካ ይቶፒያውያንካዋ አቲሱኽ ጋያኪ ኬቴምካዋ ፌሬስፅኹ ታሪክስ ላጛንቲ ኽሳንቲ ዎሬም  ያኻማ ፌያ:: 8 አርፍካስ እጂኹ ሶማሊያውስታ ይቶፒያው ዎሬም ይቶፒያው ዊፃንትስ አሌድስታ:: ካራማራ ሜንች ጄግንቱ ቴግባር ፌፄምስትኹ፣ ታፍስ ዋውርስታው ቦምብስ ታንክ ሌግታ ብብሩኽ፣ ሌጐ ልቒታንኩ ሜድፍካስታ ሚሳዬልካ አየር አምፓዴስ ይቶፒያውያንካ ጄግንካስ እቱኑ ኽሳንቲ ታሪኩ ሜዝጌብያኽ:: ይካቲት 26 ዋኪላ አሜትቺፋ ብሄራዊ አችስ ካራማራው ድል ታክስታታ ያኻ::

ካራማራ ይቶፒያውሳ እምፕልቶኽ ካንትፁኽ:: ይቶፒያ እስቴት አጌራ፣ ይቶፒያዋ አኽጝ ዴሜካ ማራማርስታቲው ስርኩኒ ዊፃንትስ ግቢትስቱኽ ሼውፅንታሳ ካንትፅኹያኻ:: ይካቲት አርፊዳ ይቶፒያውንካስ ይቶፒያ ድልስ ፂኒት፣  አሌሙ አችስ ኬፍናታ ፄውኽ፣ ጄግንቱሳ ታሪኮ ድኻቲው ኬሌምስ፣ ዌሌጃቲው ብራኒዳ ፃፊስቱኽያኽ:: ካራማራ ብግብግፃው ቢሪኺዳ ትቤብስ ሴብትጜካማ ሜንቾ ሜስዋቴ ኬይካማ እሊውሳ ይካቲቱሳ ድሎ ታሪክዳ ሜዜጌብፅካ::