እጐትኾል

ታደለ አጋጄ

አማኻሪ ክልልዳ ኬሴትስትኹ ሴላሙስታ ፄትቲውሳ ችግሮ ምክንያታ ፄውጝስ ሊሊትጙንኩ ዙራሙርካዳ ዳዴኹ፣ አቖ ኩጝስታ እሊኩ ዎንጄልካ እሳንስ ኬሴትስትካማጊ አግስታና:: ክልሉ ዎክታዊ ሰላሙስታ ፄትቲውሳ ችግሮ ጉሽፃ ፄውጝስ ሊሊትጙንኩ ክልልኩ ዙራሙርካዳ ዎንጄሉ ቴግባር እሳንጛታ ፄዋ:: ዳዴኹ፣ አቖ ኩጙስታ ስርኩሳ ልማትካዋ ዜርፍጙ ቴግባር ፌፄምስታማጊ አግስታው ዙራሙሪዴስ ፅርባ ኬቤሊ እምፕልያኽ:: ብሄረሰቡ ቺፅጝፂ አንኪሺ ጉዋጉሲ ወረዳዳ አግስታው ፅርባ ኬቤሊ እምፕልታቑሳ እሴቶ ሺሽራንኩ እምፕልት ፌቴርስታቲታ ፄዋንኩ ቱትጚ አቲጝ፣ አቑ ክርጝ ዳዴኽጝስታ  ስርኩ ልማትካስ ይንትኹሳ ሜብራቱሳ ጌሜዶ ዜሬፍጝ፣ ሻያቴ ሺንኪጝስታ ዴኖ ካቻካችጝ ኬቤሊዳ እሳንስ ኬሴትስቱንኩ ዎንጄልካኽ:: ጊዝዴስ ጊዞ ኬቤሊዳ ዎንጄልካ እሳንጜካማጊ ይንትጝ እምፕልታቖ ጉዳትስ ታምፃማጊያኽ::

ስልኪስ ንባሮ ታምፁንኩ ፅርባ ኬቤሊው ዝኩዋንቲ አቶ ጋሻው አረጋ ዙሙኑውስታ ክልሉ ዎክታዊ ሰላሙስታ ፄትቲውሳ ችግሮ  ምክንያታ ፄውጝስ ዲጊ ጊዝዴስ ናቴ ኬቤሊዳ ካንትስታ ያቒኹ ዎንጄል ፌፄምስታማጊ አኽⶓ ዙሜካ:: አቕ ክራና፣ ዳዴኹስታ ዜሬፍጙ ዎንጄል ፌፄምስታ፣ ሜብራቱሳ ጌሜዶ ዜሬፋና፣ ካዌኖ ካቻካችጝስ ብቴ ዎሬርጝስታ እሊኩጊ ዎንጄልካ ኬቤሊዳ እሳንስ ኬሴትስቱንኩ ችግርካ አኽⶓ ቶኬምካ:: እኒጛ ችግርካ ኬሴትስታታ ፄውስትኹ ኬቤሊው ፄትቲው አይል እጎ ኬቤርፅጙ እንፅኺስ አሊው ዙራሙሪሾ ካስⶓ ሲፋማ አኽⶓ ቶኬምካማ ፌቴርስትኹ ችግር ኽይስታታ ፄውስታማጊ አኽⶓ ጉሽካ::

ሰላም ፌቴርስታታ እምፕልታቕ እምፕልትስ ያኻማ ችግርካዳ ኩስጝጜ ፄዉⶓ ቶኬሙንኩ አቶ ጋሻው እኒጛ ችግርካጊ ኽይስታንታ እምፕልታቕ እምፕልትስ ኩስጝጛማ ችግርካዋ ኽይጝ ቱስታው አኽⶓ ዙሜካ::

“ሰላሞ ማንዲፅጝስ ብሽታንዳ ክንቲ እይስቴ:: ናካዳ ጉድ ሰላሙ አኺኒ ፌቴርስታማጊያኽ” ኑንኩ አቶ ጋሻው ፌቴርስትኹ ችግር ኽይስታታ እምፕልታቕ አሬባሬብጜ ፄውጝ ቱስታው አኽⶓ ዲብስካ:: ኬቤሊስ ዞንዴስ ወረዳዋኺስታ ዝኩንኩ አመራርካ ሊሊቴ ትኩቶ እይጝስ እንፃኽስትጝ ፋይፃው አኽⶓ ቶኬሙንኩ አቶ ጋሻው ፌቴርስትኹ ችግር  ኽይስታማ ሰላም ሴፌናታ ፄውስትጝ ፋይፃው አኽⶓ ዙሜካ::

እሊው ፅርባ ኬቤሊው ዝኩዋንቲ አቶ ሀይማኖት ዴሜካ ኬቤሊዳ እሳንጛማጊ ይንትኹ ዎንጄል እምፕልታቕዳ ኬፍቲኔ ጉዳቶ ታምፅኹ አኽⶓ ዙሜካ:: ጊዝዴስ ጊዞ ባስጛማጊ ካስኹሳ ዎንጄሎ ካላካልጝጝስ አጌር ሹማጌልካ፣ ዎታትካ፣ አጌሩ ካሜንስታንትካ ፌፄምስትኹ ችግር አምኺስ ኽይስታታ ፄውስታማጊ አኽⶓ ጉሽካ::

“ሊሊትጙንኩ ዎንጄልካ ፌፄምስትካማጊ ኬቤሊ ድኪ ስምስ እቑስታታ ፄውስታማጊያኽ” ኑንኩ አቶ ሀይማኖት አቒ ዎዴስኪ ይንታማ ዳዴኻላ፣ ችግሮ ፌቴራንኩ ኬቤሊዳ ዝኩዋንኩ እምፕልታቕ አኽጝስ ችግርካዋ ፌቴራንኩሳ አቖ እግስ ዲግስጝስ ካሲስታንታ ፄውስታማጊ አኽⶓኪላ ዲብስካ:: ሜብራቱሳ ጌሜዶ ዳዴኹንኩ ዎንጄሌንካዋ እግስ ዲግስካማ ካሲስታንታ ፄውስታማጊ አኽⶓ ዙሜካ::

ኬቤሊታ ፌፄምስቱንኩ ዎንጄልካ ፌፄምስታቲንታ ውላጊ እምፕልትስ እንፃኽስትጝ ቱስታው አኽⶓ ጉሹንኩ አቶ ሃይማኖት ኬቤሊዳ ዳዴኹ ዎንጄል ፌፄምስታኒ እምፕልታቕ ዳዲኼ ፍሽጝዳ ችግር ዝኩⶓ ዲብስካ:: እምፕልትቖ ቴኬምጝስ ይንትኹሳ ልማቶ ድፅጝስ እምፕልታቕ ጉዲስታንታ ፄውስታማጊ አኽⶓ ቶኬምካማ ኬቤሊዳ ሰላም ሴፌናማ እግ ኬቤርስታታ እንፃኽስታንኩ አኽⶓ ዙሜካ::

ዳዴኹሳ ዎንጄሎ ካላካልጝጝስ ዳዲኺ ቱዋውሳ ቹዋ አብጂሌ ሮንድስ ማንዲፅጝስ ዳዴኹሳ ዎንጄሎ ካላካልጛንኩ አኽⶓ ዲብስካ:: ኬቤሊ አዮ ጉዋጉሲ ወረዳሊ ድንቤርታው አኽጝስ ችግር ባስጛታ ፄውስትⶓ ጉሽካማ ሰላም ሴፌናማ ልማት እንፃኽስታታ ፄውጝ ቱስታው አኽⶓ እንክርፄካ:: አቕ ጛስጛዋ ክርጙንኩሳ ዴሜካ አጌር ሹማጌልካስታ አይማኖትኩ ታብልስ አምኽጚ ፌፄምስታታ ፄውስትⶓ ዲብስካ::

አንኪሺ ጉዋጉሲ ወረዳው ሰላሙስታ ፄትቲው አላፊ መቶ አለካ በለው ሁነኛው እዝብ ሰላምስ ጜዋና ያኻማ እንፃኽስትጝስ ወረዳ ጉድ ሰላሙ አኺኒዳ አግስታው አኽⶓ ቶኬምካ:: ፖለቲካኩ አመራርካ እዝብስ ሼውቴ ፌቴርጝስ ዳዴኹስታ ፅንፊኔ ኬቾ ቡንክትጝጝስ ሰላም ሴፌናታ ፄውስትⶓ ጌሌፅካ:: እምፕልታቕኪላ ፄትቲውሳ አይሎ እርዳትካማጊ አኽⶓ ቶኬሙንኩ አላፊ ቤዴራ እሺኹ ሰላሙ አኺኒዴስ ናካዳ ኬሽኹ ሰላም ሴፌንⶓ ጌሌፅካ:: ፅርባ ኬቤሊታ ፌፄምስቱንኩ ሊሊትጙንኩ ዎንጄልካ አጌር ሼማጌልካስ፣ አይማኖትኩ ታብልስ፣ ፄትቲው አይልካስስታ ዙራሙሪኩ ካሜንስታንትካሊ አኽጝስ አምኽጚስ ፌፄምስትⶓ እርዳትፅካ::

ዳዴኻንኩሳ ዎንጄሌንካዋ እምፕልታቕ ጛስጛዋ ኪፂጝስ ዳዴኽስትኹ ዙራታ ፄውስታማ፣ ዳዴኹንኩ ዴሜካ ኪፂስትካማጊ አኽⶓ ቶኬምካ::

ወረዳው ሊሊትጙንኩ ዙራሙርካዳ ዳዴኹስታ ፄጌርጙንኩ ዎንጄልካ እሳንጛማጊ አኽጝስ እምፕልታቕ ዎንጄሌንካ እግስ ዲጋንታ ፄውጝስ እንፃኽስትጝ ቱስታው አኽⶓ ጋሼካ:: ወረዳ አዮ ጉዋጉሲ ወረዳሊ ዎሌንታው አኽጝስ ዎንጄሌንካዋ ያኻ ዶንጌትካማ ልቕልቓንኩ አይልካ ዝኩኑ ዙራሙሪዳ ትኩቶ እይጝስ እንፃኽስታንኩ አኽⶓ እርዳትፅካ::

“እምፕልታቕ ዎንጄል ፌፄምስታው ጊዝዳ ንባሮ እይጝስስታ ፄትቲው አይሉ ኬምፕዳ አኽጝስ እርዳትጝ ቱስቴ” ኑንኩ አላፊ እዝብ ሚንች ዲብስ ጉዲስታማጊ አኽⶓ ጌሌፅካ::

ዊዳፊ ሴላም ጌማማ ልማትሾ ቱስታታ እዝብ ፄትቲው አይልሊ ቴቤቤርጝስ እንፃኽስትጝ ፋይፃው አኽⶓ ቶኬምካ::