ታደለ አጋጄ
ማይኬላዊ ይቶፒያ ክልል ሆሳና ኬቴምዳ ፌዩንኩ ሴስታ ጌርክካስ ካስጙስ ሴኔቤትኹ 22ንቲ ባይሉ ስፖርቱ ልኺትጚስታ 18ንቲ ባይሉ ስፖርቱ ፌስቲቫል ትክላሊ አማኻሪ ክልሉ ዊፃንትስ አሌድስትኾ::
ባይሉስታ ስፖርት ሚኒስቴር ስፖርት ልማት ዜርፋ ሚኒስትር ዴኤታ አቶ መኪዩ ሙሃመድ ፌያፌይጝፁኑ እንፅኼንትዳ ባይሉ ስፖርት ማይቤራዊ ታምትጜ ይስጝፅጝስስታ እምፕልታቑሳ አይቶ ጌሌፅጝስ ኬፍንኹ አክም ዝኩኽ አኽⶓ ጌሌፅካ:: ስፖርቱ ልኺትጚ እምፕልትቑሳ እምፕልቶ ይስጝፃንኩ አኽጝስ አችቺፋ ልኺትጜ ሲፍፅጙስታ እሳንጝፅጙ እንፅኺ ይስጛማ ሲፍጝ ቱስታው አኽⶓ ጉሽካ::
ባይልኩ ስፖርትካ ኬርትኹሳ ትርክቶ ክችስጝስ ኬፍንኹ ትክሞ ዝኩክ አኽጝስ ምንግስት እን ዜርፍስ ሊሊቴ ትኩቶ እያማ እሳንስ እንፃኽስታው አኽⶓ ጌሌፅካ::
ይቶፒያው ባይሉ ስፖርትካው ፌዴሬሽኑ ፕሬዝዳንት ዊዛሩ ህይወት መሀመድ ባይልኩ ስፖርትካ ልኺትጚዴስ ፌይኹስ ቱሪዝሙ ሜስክሰ አጌራውሳ ፍንቶ አድርፅጝስ ኬፍንኹ ፍሺ ዝኩክ አኽⶓ ቶኬምካ:: ባይሉ ስፖርትካው ልኺትጚስታ ፌስቲቫል ፋይስታውሳ አላሜ ሳኪትጝፅኹ ያኹስ ንጙዊኒ ልኺትጚዳ ህብረ ብሄራዊ እምፕልት ካንትስትኹ፣ ዴሶ ኪስጝጙኑ፣ ሆሳና ኬቴሙ እዝብ ሌንጌዳ ቻቢሊ አኽⶓ ካንትፁኑስታ ብርኹ ልኺትጚ ካስጙኽ አኽⶓ ጌሌፅካ::
22ንቲ ባይሉ ስፖርትካው ልኺትጚስታ 78ንቲ ስፖርቱ ፌስቲቫል አማኻሪ ክልል ትክላሊስ 57 ዋይሜ አግጝስ እምፕላንቴ አቾ እሜማ አሌድኹ ያኹስ ባይሪውሳ ዋንቼ ዴሜካ ደቡብ ይቶፒያ ክልል ዊፃ::
22ንቲ ባይሉ ስፖርትካው ልኺትጚስታ 18ንቲ ባይሉ ፌስቲቫል ሻህ፣ ቡብ፣ ጊቢቲ፣ ቡንካ፣ ዎሬም፣ ኩርቦ ፣ጊኒ እንክራስታ ፊሪሲ ግልቡሳ ልኺትጜ ዴሜካማ 11 ስፖርትኩ ዜርፍካስ ካስጙኽ ያኹስ ይንታው አሜትስ ልኺትጜ ቴርሳው ሀረሪ ክልል ያኻማ አላፍቶ ቻቤላ::
ንባሮኪ ባይሉስታ ስፖርቱ ሚኒስቴር ማይቤራዊ ታምትጝፂ ፍንዴስ አግፅና::