ልኩ ኩታስታ ፒተር ድሩሪ

ታደለ አጋጄ

ልኩ ኩታስ ሚንችካ ኮሜንታተርካ ዝኩና:: ሚንችካስ እንካንስታንኩ ኩፂ ፒተር ድሩሪያኽ:: እንሱ ምክኒያት ዴሜካ እንክሪ ጊዛይ ቴኬምስታኩ ካልካስታ ካል ኩፓሲያኽ::

ፌሬንጅካው 1967 እንግሊዝ ዊስትሃም እስቴታ እቑስቴት ኬቴማዳ ካሜንስትኾ:: ሚንቺትስ ኢኮኖሚው አግፅፂ ኢንዱሰትሪዳ ፄውቱት እና ኬቴማ ልኩ ኩታው ኢንዱስትሪስ ዴሜካ ፒተር ድሩሮ ፍሽታ::

ፌሬንጅካው 1990ስ ቢቢሲ ሬዲዮንስ ኮሜንታተርቱሳ እንፅኼ ጄሜርኹ ፒተር ድሩሪ ቤዳራሱ ስምስ አባላምቲ ዲቪዚዮን ልኩ ኩታው ሊግ እስታማ አቑስታው እንግሊዝ ፕሪሚየር ሊግዳ ኮሜንታተርትስ እንፃኽስታ አንዴስ ፋሌንጋ ዴሜካ ሻምፒንስ ሊግዳስታ አሌሙ ዋንቺዳ ጎሌልስቱንኩ ካልካስስታ አንኩሊዳ ስሎ ፌቴራንኩ አሳብካዋ ቴኬምስታማ ጌሌፅጝስ ካንታንትካዋ ዴስፁስ እጄ::

ፒተር ድሩሪ “ኮሜንታተርቶ ታክሳኒ ኹሉ ቺፋ እምፕል ዲብ አንኩሊዳ ይንቴ:: እንኪላ ልኩ ኩታዋ እንካንጝስታ እንካንኹሳ ዲቦ ጉድካ ካልካስ ጌሌፅጝስ ካላኻ አኽⶓ ታክሴ” ኑስ ዙማ:: አውሮፓው ዘቤን ቼፍታ 2021/22 ልኺትጚው አሜትዳ ማንቸስተር ዩናይትድ ቤዴራሱ ጐቤዝ እንክራንቲ ክርስቲያኖ ሮናልዶ አልድትራፎርድሾ ይንቱኻ:: ሮናልዶ ካብስ ማንቸስተር ዩናይትድስ አባላምቴ እንክሬ ኒውካስትል ዩናይትድሊ ካስጝፅኹ ጊዝዳ ኮሜንታተር እሺኹ ፒተር ድሩሪ “ሮናልዶ፣ ልኩ ኩታው ውታኺሾ ቱዋማጊያኽ:: ማንዴራ፣ ማንቸስተር ማድሪድ፣ ቱሪን ካብስ ማንቼስተር፣ ድሚ ማሊያስ፣ እንካንስታው ሊግሾ ዙራ:: ቻማጊ ምሺታ ፄዌንታው፣ ልኺትጛንቲ አግስታቲው ቤዴራሱ ክሌብሾ ካብስ ዙርኾ” ንጝስ እኒ ካልካስ ፖርቹጋሉሳ እንክራንቴ ጌሌፃ::

ልኩ ኩታው እንካናንትካ እንሳ እንግሊዙ ልኩ ኩታው ኮሜንታተር ቼፍካዋ እንክርካሊ እምፕልዳ አምኽጝፃማ አንኩሊዳ ዋኒኪ ዜኔግስታቲታ ፄውጝስ ካላው ኮሜንታተር ንጉስ ንጝስ ጋሻና::

ንቫር፡- ፋና ብሮድካስቲንግ ኮርፖሬቱዊያኽ::