ግሪክ

አለሚቱ የኔት

ሚንች ክሙ ቤን ባርስ ኬቤብስቱኺያኽ ግሪኩ:: ሴሜን ምራብ አልባኒያዳ፣ ሰሜንስ ሜክዶንያስታ ቡልጋሪያ፣ ምስራክስታ ቱርክሊ ድንቤሮ ይጋርቲ:: 131 ሻይ 957 ስኩዌር ኪሎሜትሮ ሾፌናው ብቲ 10 ሚሊየንዴስ ጃላ እዝብኪላ ዝኩዌ ግሪክዳ::

ግሪኩ ደቡብስታ ምስራኩ ዎሌንካዳ ሚንችካ ደሴትካኪላ ዝኩና:: ደሴትካዳኪላ ሚንችካ ሙርካስታ ኬቴምካ ቲሪትጝካ:: ኬቴምካዴስ እንፕል ዴሜካ አንቱፓሮስ እስቴ:: እን ስፍሪዳ ዝኩኽ ኽሳንቲ ግዲታሚ ዋሺ አቕስትኹ ስሞ እቑስታንቲ ማኺቲ ጉቢንጚው ስፍሪኪላኽ::

ኽታዌና ግራኩ ስልታኒ 1200 አሜት አሌምዳ ሜሶፖታሚያው ስልታኒዴስ እስክንድሩሳ ስልታኑሳ ዝቤኖ አሊዴኺስታ 323 አሜት አሌሞኺስታ ታምባው አኽጝ ድኹስታ:: አሌም ናካኪላ ዜርፍስ ቲኪምስቴኩ ፖለቲካስ፣ ፍልስፍኒስ፣ ኪነትቤብስስታ ሳይንስስ ሜዜጌብስቱኑ ዝቤን ስልታኒስ፣ ፖለቲካስ/ ኪነትቤብስ፣ ሳይንስስታ ፍልስፍኒስ ቤዴራ ፍና ታኹት ግሪክ ወክትስ ሊሊትጙንኩ ስፖርታውካ ልኺትጝካ እሳንስ ካስጛንቲ አጌራኪላ እሺቲኾ ግሪክ::

ኽታዌና ግሪኩ ደቡባዊ ቤንዳ ኦሎምፒያዳ አዝቼ 776ስ ካስጙንኩ እንክርካዋ አሌም ጝሺሳኺስታ ስስትስ ማንዳውሳስታ ሲዚ አሜትቺፋ ቴርታው ኦሎምፒኩ ልኺትጚው ፂፅስትጝስኪላ ምክንያታ ያኻ:: ላንቢሳኺስታኪላ ኦሎምፒክ እስትጝስ አቕስታው ስፖርታዊ ልኺትጚ ስሞ አግፁኺ ግሪክዳ አግስታው ኦሎምፒያው ካንዴስያኽ::

ግሪክካ ግዲታምካ አውልትካውስታ እንፂው ትቤብስ አቕስታና:: ሶቕራጥሶ፣ ፕላቶስታ አርስቶትሎ ፄጌሩንኩ አቕስቱንኩ ፈላስፍካው ፍልቕፃኪላኽ ግሪክ:: አሌም አቡቑ ጐቤናንትካ ፉሪውሳ ጊዞ ፌይፅጝስ ግሪኩ ቹዋ ኬቴማ አቴንሾስ እንዜጛና:: አቴንስዴስ እሽፃማ 11 ካሬ ማይል እሳንት ዝኩት ሃሊኪ ደሴቶኺስታ ሚንችካ ቱሪስቱ ታምብፅካ አግስታና::

ንባሮ አግፅነኹኪ በኩር ጋዚቲዴስያኽ