12ንቲ ቤኑ አጌር አቩቑ ፍታኒስ ቤዴራ ቴርቶ ፄዌካማጊያኽ እስትኾ

አለሚቱ የኔት

እንጃቢሪ ኬቴሙ ቺፅጝፂዳ አግስታው ዛጉዌ 2ንቲ አች ክንቲ ጝናስኩ 12ንቲ ቤኑ ክንታንትካ እይስታው አጌር አቩቑ ፍታኒስ ቤዴራ ቴርቶ ፄዋካማጊ አኽⶓ ዙሙና::

ፌዩንኩ ሹኻ አሜትካኻዳ አጌርታ እይስትኹ 12ንቲ ቤንካው አጌር አቩቑ ፍታኒው ዋይሚ ክንቲ ፃንኩትስ እን አጌራ ዝኩኽሳ ዜሬቕቲኔ አች ካንትፅኹያኻ:: ሹኻ አሜትካኻዳ ሜዜጌብስትኹ ዋይሚስ ሊኽዴስ 95 ፌቴንስታንትካ ኪንዲዴስ ኩክራ ሜዜጌብፃኒስ ሻይስ ቼፍስታንኩ ክንቲ ጝንካ እምፕሎውላ ክንታንቴ ፌይፃኑውላስ ይጉጝ ዴሜካ ክንቲው ካስትዳ ዳንጉዊኒ ዝኩⶓ ካንትፃውያኽ:: 2017 ም/አ 12ንቲ ቤኑ ክንታንትካኪላ ቤዴራ እሺኹ ዋይሚ ዜሬቕቴና  አኽጝ ካቢስታቲታ ሊሊትጙንኩ ፅሬትካዋ ፄዌካማጊያኽ:: ስልኪስ ዙሚትጝፅንኹ ዛጉዌ 2ንቲ አች ክንቲጝናሱ 12ንቲ ቤኑ ክንታንቲ ልደቱ ደረጂኪላ ፍንሾስ ፌቴንስታኑ 12ንቲ ቤንካው ፍታኒስ አፄብካሊ ይጋሪስ ፂንሳንኩስታ ቱዋያሱ ዝኩኒኪላ እርዳትጜካማጊ ፍታኒስ ቴርቶ ፄዋካማጊ አኽⶓ ድኹዋ::

ክንቲ ጝናስኩ ክንትፃንትካኪላ ክዳሜስታ አድጉዌ ፉራኑላ ጊዞ ሳሲታኑውላ እርዳታንኩስታ ቤዴራስኩ ፍታንካዴስ ካስካዋ ፍሽካማጊ እርዳትፃንኩ አኽⶓኪላ ክንታንቲ ዲብሳ::

ክንትፃንቲ አዳሙ መንግስቴ ዛጉዌ 2ንቲ አች ክንቲ ጝናሱ ክንትፃንቲ ያኻኒስ አባላምቲ ድንቤራ ክንቲዳ ሰላም አቲጝ ምክንያታስ ሊሊትጙኽ ዙራሙሪዴስ ይንቱንኩ ሊሊትጙኽ ካሌቕቱ አችዳ ዝኩንኩ ክንታንትካ ዝኩⶓ ጌሌፅካ:: እን አኽጝስኪ እሊኩ ክንቲ ጝንካዴስ ሊሊቲ አኺኒስ ጐሌልስቱንኩ ክንትፃንትካስ ክዳሜስታ አድጉዌጊ ክንትፅጝስ ክንታንትካው ዋይሚኪላ ኬሻንቲ አኺኒዳ አኽⶓ ቶኬምካ:: ካንትስታው ዋይሚዴስኪላ ኬሻንትካ ክንታንትካ ዝኩⶓስታ ልቓዋ እርዳቴ አግፁኒጊ ቤዴራሱዴስ ቢሊፄ ዋይሜ ሜዜጌብፃንኩ አኽⶓ ሼውንጝስ እርዳቴ ይስጝፅካማ ሲፋንኩ አኽⶓኪላ ክንትፃንቲ አዳሙ እርዳትፅካ::

ዛጉዌ 2ንቲ አች ክንቲ ጝናሱ ጛሪ አቶ ስሜነህ ዳኛው ጌሌፁኑውስታጊ ፌይኹ አሜትዳ ዛጉዌ 2ንቲ አች ክንቲ ጝናዳ 12ንቲ ቤኑሳ ፍታኔ ፌቴንስቱንኩዴስ 50ዋስታ ጃላ ሜዜጌብፁንኩ ክንታንትካ ሊኽዴስ 8 ታፋ ይቪችካ እሺካ:: ፌይኹዴስ ክንቴ ካፅጝስ ንጙዊኔ ዋይሜ ኬሽጝፅጝስኪላ ፊቴ ጊዞ ቴኬምስትጝስ እንግርት ኑንኩሳ ጐሌላማ ክንትፅጝስስታ ክዳሚስስታ አድጉዊስኪላ ፕሮግራምስ ክንትፅካማጊ አኽⶓ ቶኬምካ::

ፌይኹ አሜትዳ ጌቴማሺኹ ክንትፃንትካው እንፂጝ ንጙዋዳ ዋኽትጙኽ አኽጝስስታ ሜፃፍኪላ ዋኽትጛስኩኽ ላይበራሪ ዴሜካ ሶኼቶጊ ብስቲ አኽጝስ ቴርትጝስ ፌይኹ አሜትዴስ ኬሻንቲ አኽⶓኪላ ጉሽካ::

እንጃቢሪ ኬቴሙ ቺፅጝፂ ክንቲ ፅ/ጝናሱ አላፊ አቶ ዳኛው ትላሁን ኑኑውስታጊ 12ንቲ ቤንካው ክንታንትካ ኬሻንቴ ዋይሜ ሜዜጌብፃንታ ፄውጝስ ክንትፃንትካ ፊቴ ጊዞ ቴኬምስትካማ ክንትፃንታ ፄውጙሳ ቴግባሮ ካስጝፅካማጊያኽ:: 12ንቲ ቤንካው ዋይሚ ጉዳ ያኻታኪላ እንጃቢሪ ክንትፃንትካው ኮሌጅስታ ዩኒቨርስቲሊጊ ክንታንትካዋ እርዳትጝሾዳ ይጋሪስ እንፃኽስትካማጊ አኽⶓ ቶኬምካ::