ፋያንቲ ሚንቹኽ ስይ

አለሚቱ የኔት

ይቶፒያ ሊሊትጙንኩ ብሄር በሄረሰብካ ዝኩንት አጌራኽ:: ባይሉ ስይካ፣ እንፃኽስትጚስታ ሴይጝጚው ቴርት እንቲታኪ ዙራሙሪ ቺፋ ሊሊትጙኽ ፄጌር ዝኩኼኽ:: ሴይጚኪላ አይቱ ጊሊፅፂያኽ:: ሊሊቲ ግድስታ አቕፂ አኽጝስኪላ አጌላጌሌ:: ናካ ናካ ዴሜካ ትቤብ፣ ዲዛይንስታ ሳኺጊ ዝቤንሊ አብርታ ዝቤንታማ ካሳው ያኻማጊ ይንታ:: እን ዴሜካ ባሉ ጌርክስ ሴይስታንኩ ሚንችካ ክቱ ባይላውካ ስይካ ሴይስታኑሳ ድሎ ፌቴራማጊ አግስቴ:: አሜቻንኩስታ ሳሴር ንካማ ዲጋንኩ ያኻንታ ፄዋ:: ዋይሚሾስ ካንትስታኒኪላ ውላስጊ አክምታ ዲጌ:: ናካስ አንቤብፅጝስ ፋኑኽኪላ ባይልኩ ስይካውሳ አኺኔ ካንትኹስ ባርዳር ኬቴምዳ አግስታው ቹዋ ጌቤል ክቻዳ አግስታው “ሽማተራ” እስታው ጌቤልሾ ካስጝስ ጐቤንንኹሳኽ::

እንዝጚ ታክሲስ እሺኾ “አባይማዶ” እስታው ዙራሙሪዴስ ጉሽፃ ፄውጝስ ባርዳር ኬቤሊ ሴዛ ቹዋ ጌቤል ክችሾ ፄውኑኺ:: ታክሲዴስ ጌምኑታኪላ ፒያሳዳ አግስታው “ዋርካ” ስታ “አገዳና ምቾት” እስታንኩ ጌቤሉሳ ማይኬሎ ፌይጝስ “ሸማተራ” እስታው ባይላዊ ስይ እሳንስ ግቢትስታውስታ ሳኽስታው ጌቤሉ ማይኬልሾ ፄውጝስ ቹዋ ጉዳይ ትኩታ ፄዋው ስፍሪሾ ታምኑኻ:: አኽስቴ ቱኒስኪላ ሊሊትጙንኩ ባይልኩ ስይካ ሳንክስትካማ ውላዋጊ ቴርስ ቴሮ ካንትናናጊያኽ:: ባይላውካ ስይካዋ ካንትናኒኪላ  አዊው፣ ጐንዴሩ፣ ጉጃሙ፣ ራያው፣ ዋግኽምራው፣ ዘጌው፣ ወሎው፣እስታ እሊው ይቶፒያው ባይላውካ ስይካጊ እልቤዥ ንምባኺሰታ ሼዎ ዳዴኻንኩ ስይካዋ ካንትጝናናጊ እምፕላ ባይላዊ ስዩ ጌፄናውላ ታምብጝስ ጚሊ እጂጜ ፄውኑኻ::

ጌፄናው ዙሚታጊ ባይላውካ ስይካ እሳንስ ግቢትስታኑስታ እምፕልታቕኪላ ፋያኑ አሜትባል ታንባው ወክትዳኽ:: እሊው ጊዝስ ዴሜካ ሚንችካ እንፅኽካዋ እንፃኽስታኑ ጌቤልስ ያኻውሳኽ:: ዴንቤንካው ፋይስስታ ሊሊትጙንኩ ሳኺውስታ ትልፉ ዲዛይንስ እንፃኽስታኑ ስይ ኩፅኒ ቤዴራ እሺኹዴስ ኪቻ ዲጊዴስ ናቴ ኩፅኒ እሌትዴሰ እሌቶ ኬሽጛማጊ አንትⶓኪላ ንባሮ አግፅና:: ቤዴራ ካሴንቲ አሳላካ እሺኹ ባይላዊ ስይ ናካዳ ኪላ ፋይስታው አይኔትስስታ ሳኺው ዲዛይንስ ዲጋው አኽጝስ ፋያንቲ ሚንቻ:: ጌንዜብሾስ ካንትናኒኪላ ዝቤናዊ ስይዴስጊ ኽሳውሳ ጌንዜቦ ካሲ:: ያኻችኼስጉ ባይላዊ ስዩ ፋይስታንቶ ዴሜካማጊ አንትጝስኪላ እላቲውሳ ጉሽታማ ሴዩስ ሼውስቴ:: ጌንዜቡሳ ክብርናቶ ቤዴራሱሊ ካንትጝፅጝሰ ዴሜክⶓ ጉሽንኾጃጊ ልክስ ቤዴርካማ ቴርታንኩ ስይካውሳ ዋይሜ ካንትኑስ ኩፅኒ ውላውሳጊ አክሞ ካንትጝፅኹ አኽⶓኪላ ሼው ንጝስ ካሊና:: ባይላውካ ስይካ ቤዴራ አሜት ባልታዋ ይቪቻ ሴይስታኒሲያኽ ካንትናሽንኹዊ:: ናካ ናካ ኩፅኒ ሊሊትጙንኩ ጝናኻስኩ ድግስካዳ፣ ድቕርዳ፣ ክስታንትዳ፣ ማቢሪዳ ፌይጝኑስኪላ ኽሳንትካ ይጋሪው ኩችትካዳጊ ሴይስትካማጊያኽ:: እንሳ ባይላዌ ስዮ ዴሜካ ሚንችትስ ሴያኒስ ካንትስታንኩኪላ ኹን ይቪችካ እሺንኩ ይጉዋማ ውላጊ ኹና ጝርጂ ጛው ፋይታጊ ቴርስፅጝስ ቴኬምስትካማጊ አኽⶓኪላ ጌቤልዳ ዙርንኹ ጊዝስ ሼውና:: ባይላዊ ሰዩ ጌፄንካዋ ካንትኑስኪላ ሊሊትጙንኩ ወታትካስ እንፅኺውሳ ድሎ ብስⶓ ታዜብጝስ ካሊና:: እምፕሎ ስዩ ቴርስፅጝስ ሻሙኒ ግቢታታ ፄዋና:: ግቢትስትኹሳ ሳኻንቲ ሊካማ ኮቼ፣ ኮቺስትኹሳ  ቴሌፋንትካ ዲዛይኖ ፍሽካማ ቴሌፋና፣ ሳኻንቲ ቻቤላማ ጌቴማማ ሳኼ፣ ዛማዛምስታውሳ ዛማዛማንትካ ቴርሳና፣ ኔፄሌ ሴጌካማ ሳኻንትካ ቴርሳና:: እንሳጊ ካስጜኪላ ሊሊትጙንኩ ውማይቴንካ እንፃኽስታኑ አኽጝስ ሚንችካስ እንፅኺው ዜርፍ ያኻ:: ባይሉ ስይ እሳንስ አሜሬትስታው ዎክት ዝኩኽ አኽⶓ ቶኬማው ናካዳኪላ ፍንሾስ ክስታንቱ እምኔቱ አምናንትካውላስ ብሩኽ ቴርትስ ኬቤርስታው ፋዝጋው ባልስ ናካዴስ ጄሜራማ ወረፊስ ኬፄሩስ ጌቤልትጚ ካስጙስ ካንትና:: ሻሙን ግቢቱኑሳ ትቤብ እንፅኻሳ እሚካማ ጊፂኒ ቺፋ ዙሬካማጊ ጄዋንታኪላ ዋይሜ ካራካርጛና:: ቱትጙኑሳ ስዬ ዋያና:: ፋይስታያሱሳ ዙርፅካማ ኻስካማ ካሳና:: “ሸማተራ” ጌቤሉ ማይኬልዳ አኽአኽትስ ውላዋጊ ዙራማ ካንትኹ አቒስ ሼዎ እንግሮ ዜኔግፃው ትቤብስ፣ ኬሌምስስታ ግብሪስ ግዲትኹ ስይ ፕችቕና:: እኖጂኪላ እን ባይላሳ ዴኔክፅናናጊ ዋትጛይ ክናና ሴጝና ናው እንኮኽስትስ እምፕልዴስ እሊውሾ እሎ ዛኬርፅኑስ ካንትጝስ ዴሬትንምባኺስታ አኽኑስ እሺናና ጌቤልዴስ ፍንኾ:: ባይላውካ ስይካዋ ውላጊ ሴያኒ ግዲታንኩስታ ግዲፃንኩ አኽጝስ ሴያንትካዋኪላ ጉዋልንካማ ካንትስታንታ ፄውጙሳ አክሞ ፃይካ:: ካቢትጚስ ሳኽስትካማጊ ሴይስቱኒ ሼሌችስታቲንኩ ያኻንታ ፄውኽኪላ ሴይስቱስ ዝኩኽ ግድስታ ሊሊትጙኽ አኺኒስ ቴርታንኩ አኽጝስያኽ::