ኔፃ ፍቱ አግልግሎቲ

ታደለ አጋጄ

አቕ ዎንጄልስ ያኻ ፍታህብሄሩ ጉዳይስ ክስ ዲጋማ አኹ ኬሴስካማ ፍትኩ አካልካሾ ጋያኪ ፖሊሱ ጉትፕሾስታ ፍርድ ጝናሾ ካሳና:: እን ያኻው ጊዛይ እጎስታ እጉሳ ቴርቶ አቕጝ ማልጛ ቴኬማዊያኽ:: ያኼስጉ ውላ አቒ እጎ ክንትኹ፣ እግስ ዳሊ አቕት አኹ ሼውቲ ዝኩጝስ ካላቲው አኽጝስ አጉ ውማይቴንካስ እርዳቴ ካሲጝ  ፋይፃንቲያኽ:: እንስ ስሬትስ ሚንችካ አጌርካ ኔፃ እጉሳ አግልግሎቴ ፋይፃንኩ አቕስ እጉሳ ማይኬፎ ፍሽጝስ አግልግሎቴ እይካማጊ አግስታና::

እን አጌራ ይቶፒያኪላ ኔፃ አጉሳ አግልግሎቴ እምፕልታቕስ ታምብስታንታ ፄውጝስ ጋያኪ ፂኪስቱንኩ እምፕልታቕኩ ቤንካስ፣ ባኩ ፋዩ አችትካስስታ ማቤርካስ አጉሳ ማይኬፎ ፍሽጝስ ኢፌዲሪ እገ ምንግስት ቱንዚ 20/5/፣ ፌዴራሉ ትክላይ አካቤ እጉ ቲሪትጝፂ አዋጁ ቼፍ 943/2008 ቱንዚ 6/4/ /8/ /11/ ፌዴራሉ ፍርድ ጝንካው ቴቤክካው ፍካዱ እይስትጝጚው ምዝጋቢው አዋጁ ቼፍ 199/1992 እንቲታኪ ክልልካዳ ምስሌ እጎ ፍሽጝስ፣ ሜሜሬስታ እንፃኽስትጜ ሲፍጝስ አግልግሎቴ ይታታጊ አግስቲ::

ኪቢርስቲንኻ አንቤባንትካ ናካስ እንቶጂስ አንቤብፅጝስ ፋኑኽ ጉዳይ ኔፃ ፍቱሳ አግልግሎቴ ካንትኹስ አማኻሪ ክልልዳስታ ፌዴራሉ ፍርድ ጝንካዳ ቲቢኪስታ እጉ ኩስጝፃንቲ አቶ ሰውበሰው አበበ አውጚው ሬዲዩንሊ ፄውኑሳ እጂጜያኽ::

ኔፃ እጉ አገልግሎቲ ንጝ እንዳራ ንጚይ?

ኔፃስ እጉ አግልግሎቲ ንጝ ጌንዜብ ኬይስታውላስ ኔፃ እይስታው እጎ ኩስጝፅጙ፣ ፍርድ ጝናዳ ቲሬማ ካራካርጝጙ እንዳርማኪ ጌንዜብ ኬይስታውላስ እግኩ ውማይቴንካስ ኔፃስ እይስታው እጉ አግልግሎቲ ንጝያኽ:: እን ኔፃ እጉ አግልግሎቲ ጌንዜቦ ኬይጙ አክሞ እላቲኩ ድኻ ድኽስ እይስታው ያኹስ ካልስ አኹኪ ፁፍስ እይስትጝስ ካሌ:: ቤዴልስትኹሳ አኹ አክም እላቲውሳ አቔ ዎኬላማ ፍርድ ጝናዳ ቲሬማ ካራካርጝጜ ዴሜካዊያኽ:: አግልግሎቲ ዴሜካ ፍታህቤሄርስታ ዎንጄልያኽ::

ኔፃ ፍቱ ግልግሎቲው አላሚ እንዳርማይ?

ቹዋ አላሚ ፍቶ አቱንኩስስታ ቼጌርስቱንኩስ ድኻ ድኽስ ፍቶ ክችስጝያኽ:: ጌንዜብ ዝኩኸ ጌንዜብስ ቲቤኬ ቲሪፃ ላኹፃማ ጚውሳ ሜብቶ ኬቤርፄ:: ጌንዜብ እላቲው ኩፂ ቤዴሎ ጉዝግዳ ቦኻሳማ ጝንዳ እንጅኩስ ካንትስቴ:: አክም እላቲኩ፣ ስራስሪ፣ ኹንስ ፍቱሳ ቤዴሎ ቡዌካማ እንጅኩዋቲንታ፣ ጛጂሱ ሜብት ኬቤርስታያታ ፄውጝስ ኔፃስ እጉሳ አግልግሎቴ እይጝስ አክም እላቲኩ አቑ ሜብት ኬቤርስታታ ፄውጝያኽ::

ኔፃ እጉሳ አግልግሎቴ እይጝ ፍት /ክርፂ ቺፅጝፂ/ ዝኩዋታ ዎታኮውሳ ታምቦ ፊትጜ?

ሚንች ትክሞ ዝኩኽያኽ ውንሱሳ ሜብቶ ታፍዳ እሜማ እጉሳ ዳዶ ያቓውላስ ይጉዋማ ሚንች ቤዴል ታምባማጊ ዝኩኽሳ እምፕልታቖ እኖጂ ጌርክ ቺፋ ካንትኔ:: ፍርድ ጝናዳ ካንትናው ትፍትጚሊ እምትጙኽ ስራስሪው ምግብዳስታ ውርሱ ቤንጚዳ እጉሳ ውማይቴኖ አግፄካማ እግ እይኹሳ ሜብቶ ኬቤርፅካማ ጛጂሱሳ ሜብቶ ኬቤርፅጝስ ካላና:: እግ ኬቤርስታውላስ ይጉኒጊ ኩፅኒ ምንግስትዳኪላ ቻኒስት ታምቤ:: “እን ቤዴልስቱስ ምንግስት እያዋ እርዳታያላ” ንጝስ እምፕልታቕ ምንግስትዳ ቻኒስት ታምባታ ፄውስቴ:: ኔፃ እጉ አግልግሎቲው እይስትጝ እኒጛ ችግርካዋጊ ኽያው አኽጝስስታ ሜብት ኬቤርስታታ ፄውጝስ ኬፍቲኔ ታምቦ ፊትጛዊያኽ::

ጌንዜብስ እይስታው እጉ አግልግሎቲስታ ኔፃ እጉሳ አግልግሎቴ ካንትጝፅናኒ ክችክቺስ እጉሳ አግልግሎቴ አግፅጝስ ካሊስቴማ?

ጌንዜብስ እይስታው አግልግሎቲ ኔፃስ እይስታው እጉ አግልግሎቲዴስ ኽሳላ አኹኪ እንፃላ:: ላጝጊጊ ፍቱሳ አግልግሎቴ ክችክቺስ እይጝስ ካሊፃዊያኽ:: ኔፃ እጉሳ አግልግሎቴ አግፅጝስ ድኻድኻ አኽⶓ እምፕልታቕ ድኽካ ጌፄሩ ማይቤራዊ ፍርድ ጝናዴስ ፃፊፅካማ ያጋኒ ምንግስቱ አካቢ እጉ ኾት እንፃኻኒ ቴቤክካ አሜትስ 50 ሳቶ ኔፃ እጉሳ አግልግሎቴ እይጙ ግዴቲ ዝኩክ አኽጝስ ኩታ ፍት እኖጂሾ ፃፋማ እንፃኻኒ አክማ ጋቲንኩስ፣ ስራስሪስ፣ ኹንስ፣ ኤች አይቪ ኤድሱ ቑንዚ ብራኻዳ ዝኩክስታ ሹማጌልካስ ኔፃ እጉሳ አግልግሎቴ እይኔ:: ጌንዜብ ኬይስታውስታ ኔፃ እጉ አግልግሎቲ እንዳርማኪ ሊሊት እላቲዊያኽ:: እንፃኽስትናው እግ አኽጝስ::

ኔፃ እጉሳ አግልግሎቴ እንፃኽስቴኒስ ዋሼንካ ጉዳይካይ ሚንቺትስ ካንትስታንኩ?

ሚንቺትስ ታዜብናው ጝን አቑ ላኹፂሊ እምትጙንኩ ችግርካኽ:: ትፍትጚ፣ አብቶ ክቻ ቤናላ ንጙ፣ ጄርካዋ ካሜናውጃማ ካዲጙ፣ ጄርካስ ምግቡሳ ኬታላ ንጙ፣ እንፃኽስታንቲስታ እንፃኽፃንቲሊ ታምትጛንኩ ችግርካ ፌይካፌይካማ ካንትስታና:: ዉርስሊ እምትጛንኩ ችግርካ ዴሜካ ሚንቺትስ ካንትስታና::

ኔፃ ፍቱሳ አግልግሎቴ አግፅጝስ ፍቶ አግፁንኩሳ ቶኬምጝስ ካሊስቴማ?

ይጋ ቶኬምጝስ ካሊስቴ:: እምፕል ጝርጂ ኹናዋ ሚፃማ ጄርካዋ ካሜኑኒዴስ ፋሌንጋ ኹናሊ ትፍትጛማ አግሌልጝጝ:: ትፍትጛማ አግሌልጙኽ ጝርጂ ዴሜካ እሊትፃ ኹናዋ ሚፃማ ጄርካዋ ካሜኔ:: ላጛንታ ኹናዋ ሚፃማ ጄርካዋ ካሜኑኒዴስ ፋሌንጋ ክሬ:: አባላምታ ኹናዴስ ካሜንስቱንኩ ጄርካ ክርኹ ታብሊውሳ አብቶ ቤንስትጙ /አግፅጙ/ ሜብት እግስ ዴንጌግስታ:: ያኼስጉ ላጛንታ ኹናዴስ ካሜኑንኩ ጄርካ ታብሊውሳ አብቶ እሜኻስካማ ቤናላ ንጙ ችግር እሺኹ:: እንሳ ችግሮ ፍርድ ጝናዳ ዲግስጝስ ውሳኒ እይስታማ እሺኹ ጝንዴስ ታብሊውሳ ታምቦ ጄርካ ውርሶ አግፃንታ ፄውስታ:: ጄርስ ምግቡሳ ኬያላ ንኹሳጊ ኬሴስጝስ አርፊ ቺፋ  ምግቡሳ ኬያታ ዎሴንስትኹ ዲብ ዝኮ::

ኔፃ ፍቱ አግልግሎቲ ዝኩⶓ እምፕልታቕ ማሌካማ ቴኬምስትካማጊማ?

ኔፃ ፍቱሳ አግልግሎቴ እምፕልታቕ ቴኬምስትካማጊያኽ ንጝስ ካሊስታላ:: ኔፃ ፍቱ አግልግሎቲ ዝኩⶓ ሚንችካ ማሌካያላ:: ጌፄሩ ዙራሙሪዳ ዝኩንኩ ዴሜካ ሚንቺትስ ያቓላ:: ኬቴምዳ ኩፂ ንቫሮ አግፃንኩ አኽጝስ ይንታና::  ቴቤክካ ኔፃ እጉሳ አግልግሎቴ ዎታኮው ዳድስ እይካማጊ አኽⶓ ምንግስት ቼፍጝጛማ ካንታላ ቱስቲስ ሲፍጝጝ ፋይፄ::

ዞንዳስታ ወረዳዳ ዝኩንኩ ፍትኩ ኾትካኪላ ኔፃስ ፍቱሳ አግልግሎቴ እይካማጊ ጋቲዊያኽ:: ቴቤክካ፣ ፍትኩ ኾትካ፣ ዩንቨርስቲዳ ቲሪትጙኽ እጉ አግልግሎቲ፣ ኹኑ እጉ ውማይቴንካዉ ማቢሪ፣ እጉ ውማይቴንካው ማቢሪ፣ ፕሮጄክቶ ኬሬፅካማ እንፃኽስታንኩ፣ ምንግስቱ ያኼካያስኩ ኾትካስታ እሊኩጊ ኔፃ እጉሳ አግልግሎቴ እያንኩ ዝኩና:: እኒጛ ኾትካ ኔፃ ፍቱሳ አግልግሎቴ እያንኩ አኽⶓ ሚንቺትስ ያቔካያስኩ ዝኩና:: እጐ አቕትጝፅጝስ ውላጊ እንፃኽስትጝ ዝኮ:: ጌፄሩ እምፕልታቕ ቤዴሎ እሜኻሳማ እንጀኩዌጉ ይንቱስ ካንትስታላ:: እንሳ ኩፅኒ ሼውቴ ፌቴርጝ ቱስቴ::

ኔፃ ፍቱ አግልግሎቲስ ውሳኔ አግፁንኩ እምፕልታቕዳ ዎታኮው እንኮኽስት ዝኩዌ?

እኖጂሱ እምፕልታቕ ጌንዜብዴስ ሞራሎ ኽስፅካማ ካንታና:: ውሳኔ አግፃኒ ፍርድ ጝናዳ ዴስቴ ጌሌፃኒስ ካንትኔ ::አግላግሎቴ እይጙ እኖጂሱ ግዴቲ ያኻስኩስ:: ልቓ አግልግሎቲስ ሚንቾ ዴስቴ ጌሌፃና::

ፌያፌይጝፄኑ እንፅኼንት ዝኩኒ?

ኔፃ አጉሳ አግልግሎቴ እያንታ ሚንችካ ቴቤክካ ዝኩንኩ አኽጝስ ኬቴምዳኪ ያኻ ጌፄርዳ ዝኩንኩ ስራስሪ፣ አክማጋንኩ አቕ፣ ሚንቾ ቤዳሎ እሚካማ ጝንዳ እንጅኩንኩ፣ እንታኮው አግልግሎቲ ዝኩኽ አኽⶓ እርዳትስትጝስ ሜብቶ ኬቤርፃንታ ዋሺኒኪ ቲቢኪ እንጋ ናቲው አኽጝስ እጉሳ አግልግሎቴ አግፅጝስ ካላና::

ማልጛ አሜሴጌኔ::

አንኪላ ማልጛ አሜሴጌኔ::