አጌራቡቑ ኩስጝጚ ችግሮ ኽይጙሳ ቴስፌ ፃያ

ታደለ አጋጄ

ኩስጝጚ ችግርካውጊ ኽይፂ ዳድ አኽⶓ አማኻሪ ክልልዳ ካስጙኽ አጀንዴ ኩፕፅጙ ካስትዳ አሴቴፍጙንኩ ዎኬልስታንትካ ዙሙና

አጌራዊ ኩስጚው ኮሚሽን አጌራኩ ሊሊትጙንኩ ቤንካዳ ኩስጜ ካስጝፃማጊ ያኹስ አማኻሪ ክልልዳኪላ ሜጋቢት 27/2017 ዴስ ጄማራማ ማንዚ 4/2017 ም/አታስ ኺስታ ላጛ ዙራስ አጀንዴ ኩፕፅጙሳ ካስቶ ካስጝፃ::

ሊሊትጙንኩ እምፕልታቕኩ ቤንካዋ ዎኬሉንኩ ጛርት አቕ አጀንዴ ኩፕፅጙ ካስትዳ አሴቴፍጙንኩ ዎኬልስታንትካ ኩስጝጚ ችግርካውጊ ኽይፂ ዳድ አኽⶓ ቶኬምካ::

ኪስ አዳነ ሃይማኖት አዊ ብሄረሰቡ ቺፅጝፂዴስ ዎኬልስትካማ ኩስጚዳ አሴቴፍጜካ:: ናካዳ ዝኩኽሳ ችግሮ ኽይጝስ ኩስጚ ፋይፃንቲ አኽⶓ ቶኬምካማ እምፕልታቕኩ ችግርካ ያኹንኩ ጉዳይካዋ አጀንዲስ እምስታንታ ፄውⶓ ዙሜካ::

እሊው ሲቢክ ማቤርካዋ ዎኬልጝስ አጀንዴ ኩፕፅጙ ካስትዳ አሴቴፍጙኽ አገው ምሁራንካው ማቢሪው ፕሬዝዳንት ካህሊ አንተነህ እምፕልታቕ ጛጛርትጛሳ ጛጛርትጛስ ቺፅጝፃንታ፣  ጛውሳ ኮንኬስታ ባይሎ ሌጌፃንታ ዝኩንኩ ችግርካዋ ዙሚትጚስ ኩስጛማ ኽይጝ ፋይፃው አኽⶓ ጌሌፅካ::

እንዴስ ቤዴራ እንፃኽስስትኹ ኬርትኹ ታሪክ ክቼማ፣ እገ ምንግስት ኬሽጝጛማ ውላጊ አምንጜካማስታ እምፕልትስ ኩስጜካማ ችግርካዋ ኽይጝስ ካሊስታው አኽⶓ እርዳትፅካ:: ናካዳ አጌራዳ ሊሊትጙንኩ ችግርካ ጌቴምካማጊ አኽⶓ ጉሹንኩ አቶ ካህሊ እምፕልታቖ ዎኬልካማ ኩስጚዳ አሴቴፍጙንኩ ዎኬልስታንትካ ሊሊትጙንኩሳ አጀንድካዋ ኩስጚው ኮሚሽንስ እምፅⶓ ጉሽካ::

አጌራዳ ኬሴትስቱንኩ ችግርካዋ ኽይጝስ ኩስጚ ማልጛ ፋይፃንቲ አኽⶓ ቶኬሙንኩ አቶ ካህሊ አጌራዳ እግ ኬቤርስታታ፣ ጛስጛው ክርጚ ድሳታስታ ዲሞከራሲው ባይል ሌጌሳታ ኩስጚ ማልጛ ፋይፃንቲ አኽⶓኪላ ቶኬምካ::

“አጌራዊ ኩስጚው ኮሚሽን አላፍትዴስ ፌይኹስ ስልታን ዝኩጝ ቱስቴ” ኑንኩ አቶ ካህሊ እምፕልታቕ ጉሹንኩ አጀንድካ ቱስታው ዳድስ ኽይ እይስታታ ምንግስቶ ጌዴድፃማ ፌፄምስታንታ ፄውጙ አክም ዝኩጝ ፋይፃው አኽⶓ ጌሌፅካ:: “ኩስጚው ኮሚሽን ኔፃ ጊሊሊቲኒስታ ፍታዊ ያኹኽ ዳድስ ችግርካ ኽይስትጝ ቱስቴኪላ” ንካ::

ዶንጌትካማ ካዌና ቱዋንኩ፣ እንፂዊዳ ዝኩንኩ ፋይስታው ዳድስ ኩስጝጝስ ችግርካዋ ጉሽጝስ ካላንታ ፄውጝ ፋይፃንቲ አኽⶓኪላ ቶኬምካ::

እሊው አጀንዴ ኩፕፅጙ ካስትዳ አሴቴፍጙንኩ ፖለቲካው ፓርትካዴስ አገው ፍትህስታ ዲሞክራሲው እምፕልቱ ኩፕፃንቲ አዲሱ መኮንን ዶ/ር አጌራዊ ኩስጚው ኮሚሽን ችግርካዋ ኽይጝስ ማልጛ ፋይፃንቲ አኽⶓ ጌሌፅካ:: አጌራዊ ኩስጚው ኮሚሽንዳ ሚንችካ ችግርካ አጀንዲስ እምስታንታ ፄውጝስ ድሎ ፌቴርኹ አኽⶓ ቶኬምካ::

ኩስጚ ኔፃስታ ፍታዊ ያኹኽ ዳድስ አጀንዴ እምስታታ ፄውⶓ እርዳትፅካ:: “ሜሳሬ ዶንጌትጝስ ቡንክትጝጝ ዊፅስትጙ ጊሊፂያኽ” ኑንኩ አዲሱ ዶ/ር ሴብትጚስ እምስታው ስልታን ዲሞከራሴ ሌጌፃቲውስታ ዋሺኔኬ ችግሮ ኽይጝስ ካሊፃቲው አኽⶓ ጌሌፅካ::

ችግርካዋ ኽይጝስ ቹዋ ዳድ ኩስጚ አኽⶓ ቶኬምካማ ዋሺኒኪ ችግር ኽይስታታ ኩስጚስ ቴርትጝ ፋይፃው አኽⶓ ቶኬምካ::