ፍትሬቱ ማዳባሪው ፍሺ ኬፍንኹዊያኽ

አለሚቱ የኔት

ዊዳፊስ ምርቶስታ ምርትምቶ ዴሜክጝስስታ ብቲውሳ አሉምቶ ማንዲፅጝስ ፍትሬቱሳ ማዳባሬ አኹኪ ኮምፖስቶ ቴኬምስትካማጊ አኽⶓ ዚጋሚ ወረዳው አሬሳቻንትካ ዙሙና::

ዊዳፊስ ምርታምቶ ዴሜክጝስስታ ብቲውሳ አሉምቶ ዙርፅጝስ ካሊስታታ አቓ ግብሪ ኽብፂው ማዳባሪዴስ ድምክና ፍትሬቱሳ ማዳባሬ ቴኬምስትጝ ኬሻው አኽⶓ ውማይቴንካ ኩስጝፃና::

ፍትሬቱ ማዳባሪዴስ ኮምፖስት ብቲውሳ አሉምቶ ዙርፅጝስ ዝኩኽ ፍሺ ኬፍንኹ አኽጝ ቶኬምስታ:: አውጚው ቴሌብዥንሊ ስልኪስ እጂጜ ፄውንኩ ኮምፖስቶ ቴኬምስታንኩ ዚጋሚ ወረዳ ግምርና ዋግሳት ኬቤሊው ዝኩዋንትካ አሬሳቻንቲ  አበበ ጌታሁን ኮምፖስቶ ቤዴርካማ ቴርስጝስ ናካዳ ማሲዳ አሌቔትጝፅካማጊ አኽⶓ ዙሜካ:: ቴርሳኑሳ ኮምፖስቶኪላ ችኻስታ ሳኑዋ ፋያኑ ወክትስስታ ጊዝስ ቴኬምስትካማጊ አኽⶓ ጉሽካ::

እሊው ኬቤሊው ዝኩዋንቲ አሬሳቻንቲ አብየ ሰለሞንኪላ ኽብፂውሳ ማዳባሬ ጄዋማ ቴኬምስትጝስ ዋኽስዋኾ ሾፌንጝስ ቼጌርስታንኩ አኽጝስ ኮምፖስቶ ቤዴርካማ ቴርስጝስ ቤዴራ ቴርቶ ፄውⶓ ዲብስካ::

ዚጋሚ ወረዳ ግብርኒ ፅ/ጝናሱ አላፊ ዳንኤል ሞላ (/ዶ/ር) ጌሌፁኑውስታጊ አቓ ግብሪ ማዳባሪሊ ቴርቴራ አሬሳቻንትካ ፍትሬቱሳ ማዳባሬ ቴኬምስታንታ ፄውስታማጊያኽ:: ንጙዊኒ አሜትስኪላ ወረዳታጊ  537 ሻይ ሜትር ኪዩብ ያኻው ኮምፖስት ቴርታማ አሬሳቻንቲ ማሲሾ እንዜጝትጝፃማጊ አኽⶓ እርዳትፅካ::

ድምክኒስኪ በርሚ ኮምፖስቶኪላ አሬሳቻንትካ ቴርስካማ ቴኬምስታንታ ፄውስታማጊ አኽⶓ ቶኬምካ:: አቓ ግብሬ ማዳባሬ ቴኬምስትጝዴስ ጃላ ምርታምት ዴሜካው አኽⶓ አሬሳቻንትካ ዙሚⶓኪላ አላፊ ጉሽካ:: ቤዴርንካማ ፍትሬቱሳ ማዳባሬ ቴኬምስትጝሾ ቱንኩ አሬሳቻንትካኪላ ዴስቴንካ አኽⶓስታ ናካዳ አቓ ግብሪ ማዳባሪ ኬቤራኒ ቴርሱኑሳ ኮምፖስቶ ፍሽካማ ዋያንኩ ዝኩⶓኪላ አላፊ ጌሌፅካ::

አዊ ብሄረሰብ ቺፅጝፂ ግብርኒ ሜምሪው ትክትሊ አላፊ አቶ አዲሱ ስማቸው አቓ ግብሪ ኽብፂው ማዳባሪሊ ቴርቴራ ኮምፖስቶ አኹኪ ፍትሬቱሳ ማዳባሬ ቴርስካማጊ አኽⶓ እርዳትፅካ:: ምርታምቶ ኬፍፅጝስኪላ ፍትሬቱሳ ማዳባሬ ቴኬምስትጝ ጉላሊ እላቲው ዲብ አኽⶓ ጉሽካ:: አቓ ግብሪ ማዳባሪ ብቴ ቤዴሉኽ አኽጝስ ፍትሬቱሳ ማዳባሬ ቴርስጝዳ ትኩታ ፄውጝስ እንፃኽስትካማጊ አኽⶓ ትክትሊ አላፊ ጌሌፅካ::

እምስትኹ አሜትስ 5 ትኩሚ 1 ሚሊዬን ሜትሪክ ኪዩብዴስ ጀላ ያኻውሳ ኮምፖስቶ ቴርስጝስ ታክስስታማ ሊኽዴስ 90 ታፋ ያኻው ቴርትኹ አኽⶓ እርዳትፅካ:: ቴርትኹ ኮምፖስትዴስኪላ 60 ታፋ ያኻውሳ አሬሳቻንትካ ማሲዳ አሌቔትጝፅⶓ ቶኬምካ:: ፍንሾስኪላ አሬሳቻንትካ እሪ እሉዊጝዴስ ቤዴርካማ አሬሳቻንትካ ቴርሱኑሳ ፍሽካማ ማሲዳ አሌቔትጝፃንታ አቶ አዲሱ ታክስፅካ::