ድሚ ወርክ

ታደለ አጋጄ

አዊ ብሄረሰቡ ቺፅጝፂ ሊሊትጙንኩ ዙራሙርካዳ ቤርቤር እሳንስ አሜሬትስቴ:: ኩሉስታ ኩላ ዲሪኺ ዝኩኽ አይር እግልታ ዴሜካ ቤርቤሩ ምርትስ ማልጛ አስሜምጜ:: ቤርቤሮ እሳንስ ዋግፃንኩ ዙራሙርካዴስ ዚጋሚ ወረዳ ቹዋስ ቶኬምስታዊያኽ:: ይቶፒያው ግብርኒው ኢንስቲቲዩቱ ንባር ቶኬማውስታጊ አጌር አቡቑ አችስ አቕስቶ አግፅኹ ዚጋሚው ቤርቤር ሚንችካ አሬሳቻንትካስ አሜሬትስታማጊ ዝኩዊኔ ኪሳንታ ፄዋ::ልቓ ብቲዳ ሚንቾ ምርቶ አግፃና:: ጌቤልስ ዲጉስኪላ ኬሽኹ ዋይሚስ ዋይስታው አኽጝስ አሬሳቻንትካው ሚፂው አግፅፂያኽ:: ቤርቤሮ አሜሬታንኩ አሬሳቻንትካ ቤርቤሩ ምርትስ ጛውሳ ዝኩዊኔ ኬሽጝፅካ:: ኬሽኹስ ትክሞ አግፅጝስ ቴኬምስታንታ ያኼካ:: አውጚው ሬዲዩንሊ እጂጜ ፄውንኩ ዚጋሚ ወረዳኩ አሬሳቻንትካ ቤርቤሩ ምርትስ ቴኬምስታንታ አኽⶓ እንክርፄካ::

አቶ አበበ ጌታሁን ዚጋሚ ወረዳ ግምርና ዋግሳት ኬቤሊው ዝኩዋንትካኽ:: ቤርቤር ጛጂሱ ዙራሙሪዳ ቹዋ ሴብሉ አይኔት አኽጝስ እሳንስ አሜሬታና:: ዎክት ግዲታማ እያኒ እሊው ሴብልኩ አይኔትካዴስ ኪቻ ኬሽኹሳ ሚፄ አግፅፃው ሴብሉ አይኔት አኽⶓ ቶኬምካ:: አሬሳቻንቲ አበበ ኑኑውስታጊ ቤርቤር ዎክትስ ቴኬልስታኒ፣ ጉድጛ አንኬባንኬብጚ ፄውስታማ ሻኪስቱኒ፣ ኩሪ ቱዋቲታ ፄውስቱኒጊ ኬሽኹሳ ምርቶ እያው አኽⶓ ዲብስካ:: ቤርቤሩ ምርት ቱስታው ዳድስ አንኬባኬብጚ ፄውስታቲው ያኹኒጊ ኩፂ አሬሳቻንትካዋ ክሳሪዳ ሚፅፃው አኽⶓ ዙሜካ:: “ቤርቤርዳ እምፕል ችግር ቤሴቓማ ክሬ” ኑንኩ አሬሳቻንቲ አበበ ኬቤሊውሰታ ወረዳኩ ግብርኒኩ ውማይቴንካ ቤርቤር አሜሬትስታው ጊዝዳ እርሺ አሬስስቱስ ጄሜርካማ ኩሪ ቱዋቲታ ካላካልጛንታ ኩስጝፃንኩ አኽⶓ ድኹዌካ::

“ዲፒ ቲሬኒ ጁዋው ፈንገስ እስታው ቑንዚ ዝኮ:: ቤርቤር ቴኬልስትኹዳ አኹ ቼቼቓማ ካሳታ ፄፓን ንጝስ ኩስጝፃና:: ፌልዴስ ጃሜርካማ ኩሪ ቱዋቲታ ፄፓን ንካማ ድኹዋና”:: ንጝስ ግብርኒኩ ውማይቴንካ አሬሳቻንትካስ ፄዋኑሳ እርዳቴ እንክርፄካ:: ግብርኒኩ ውማይቴንካውሳ ኩስጜ ቻቤልናና ቤርቤሮ ሊሚፅናኒ ሚንቾ ትክሞ እዬ  ኑንኩ አሬሳቻንቲ ቱስታው ዳድስ አንኬባንኬብጚ ፄውስታውላስ ይጉኒጊ ኩፂ ቑንዚ ኬሴትስታማ ትክሞ እያቲው አኽⶓ ቶኬምካ::

“ቤርቤርዳ ችኽ ሚንቻኒ ክሬ:: ችኽ ኔኬታማጊ ካሳኒ ኩፅኒ ዙሬ:: ማልጛ ችግር ያኹኽ ቤርቤርዳ ኬሴትስታው ቑንዚያኽ:: ቑንዚ ኬሴትስታቲው ያኹኒጊ ድኽትዴስ ፍሻው ሴብል እሺኾ” ናኒስ ቤርቤር እያውሳ ትክሞ ድኹዌካ::

ቤርቤር ዋጋቲው እስታው ዙራሙሪዳ ቤርቤር ዋጌ:: ብቴ ግዲፅካማ፣ ሚንች ብቲዳ ያኻውላስ ልቓ ብቲዳ ፌልስካማ ቴኬሉኒጊ ቤርቤር ጉድጛ ዋጌ:: ኩሬ ማንዴካማ፣ አቒኪ ያኻ እንሴስካ ቱዋቲንታ ፄውጝስ ትንካኪስ አሜሬትስትጝ ፋይፃው አኽⶓ አሬሳቻንቲ አበበ ድኹዌካ::

ቤርቤሮ ዋግፅⶓ ጄሜሩኑ ጊዝዴስ ጄሜርካማ ትክሞ አግፄካማጊ አኽⶓ ቶኬምካማ ቤርቤሩ ምርትስ ጄርካዋ ክንትፅጝስ፣ ጝኖ ግቢትጝስስታ እሊውስ ፍሺስጊ ቤርቤርዴስ አግፁኑ ሚፂስ ቴኬምስታንታ አኽⶓ እንክርፄካ::

ንጙዊኒ ዎክትዳ ጉድ ያኹኽ ጌቤሉ ታምትጚ ዝኩⶓ ቶኬሙንኩ አሬሳቻንቲ አሜሬቱኑሳ ቤርቤሩሳ ምርቶ ኬሽኹ ዋይሚስ ዋይጝስ ቴኬምሰታንታ አኽⶓ ድኹዌካ::

እሊው አሬሳቻንቲ አሰፈራው የኔአባት ቤርቤሩ ምርት ዋሺኒኪ ሴብልዴስ ኪቻ አሬሳቻንትካዋ ሌጌፃውስታ ኬሽኹ ዋይሚስ ዋይስታው አኽⶓ ዙሜካ:: ዚጋሚ ወረዳታጊ ቤርቤር እሊው ሴብልዴስ ኬሽኹስ አሬሳቻንትካዋ ሌጌፅኹ አኽⶓ ዙሙንኩ አሬሳቻንቲ ንⶓ አሜሬቱኑሳ ቤርቤሩሳ ምርቶ ኬሽኹ ዋይሚስ ዋይጝስ ቴኬምስታንታ ያኼካ::

ቤርቤሮ አሜሬታኑ ዎክትዳ ግብርኒኩ ውማይቴንካ ፄዋኑ እርዳቲስ ቤርቤርዳ ቑንዚ ከሴትሰታቲታ ካላካልጛንኩ አኽⶓ ድኹዌካ:: ቤርቤር እሪኒ ዜርስታኒ ቑንዚ ኬሴትስታቲው አኽⶓ ቶኬሙንኩ አሬሳቻንቲ ቤርቤር ትንካኪስ አሜሬትስቱኒጊ ቑንዚ ኬሴትስታቲው አኽⶓ እንክርፄካ::

“እንዴስ ቤዴራ እምፕል ኪሎ ግራም ቤርቤር 250 ብርዴስ ጃላ ዋይስታላ እሺኾ:: ንⶓ ኩፅኒ እምፕል ኪሎ ግራም ቤርቤር 370 ብሮ ኺስታ ዋይስትⶓ ዲብስካ:: ቤርቤር ዋጋው ዙራሙሪዳ እሳንስ አሜሬትጝሰ እምፕልታቕ ቴኬምስትጝ ቱስታው አኽⶓ ጉሽንኩ አሬሳቻንቲ ቤርቤር ኬቤርኾ እናናጊ እንፃኽስትናው ያኻውላስ እሊኩ ቤርቤር ዋጋቲው ዙራሙሪዳ ዝኩንኩ እምፕልታቕሰ አሜሬትጝስ ታምፅጝ ቱስታው አኽⶓ ዙሜካ::

ዚጋሚ ወረዳ ግብርኒ ፅፌት ጝናዳ ትክልቲውስታ ኩፓኩፒው አኹ ቴኬምስትጝጚ ኬቹ ጉሳንቲ ባይሞት መኩሪያው ወረዳታጊ ቤርቤር ትኩት እይስታማ አሜሬትስታው ሴብል አኽⶓ ጌሌፅካ:: ንጙዊኒ አሜትዳ እሳንስ አሜሬትጝስ አኬድስቱኒውላ አኬድስትኹሳ ላካሳ ምርቶ አግፅጝስ ካሊስታያሱ አኽⶓ እርዳትፅካ:: ምርት ኩፕናው ጊዝዳስታ ቤርቤሮ ዋሽስትኹዳ እሪ እሉዋማ ምርት ኔኬታታ ፄውⶓ ቶኬምካ::

ወረዳታጊ 11 ሻይ 44 ሄክታር ብቲዳ ዜርስትኹ ቤርቤሩ ሴብልዴስ 32 ሄክታር ብቲዳ ቑንዚ ኬሴትስትⶓ ቶኬምካማ 11 ሻይ 12 ሄክታር ብቲዳ ኩፂ ቑንዚ ኬሴትስታያሱ አኽⶓ ጌሌፅካ:: ምርት ሌኬምስታው ጊዝዳ እሪ እሉዊጝስ ቤርቤሩ ምርትዳ ጉዳቶ ታምፅⶓስታ ፃንኩቶ ማንዱኽሳ ቤርቤሮ አሜሬታቲንታ ፅንጋኻ አኽⶓ ጌሌፅካ::

አሬሳቻንትካ ይንታው ምርቱ ዝቤንዳ ቤርቤሮ እሳንስ አሜሬታቲንታ ግባቱ ኬቤርጝ ስጋትዳ ሚፅⶓ ጉሹኑ ካሲስኪላ ግባት ማልጛ ኬቤርጙ ምክንያት ትራንስፖርቱ ድምክኒስታ እሊው ዲብሊ እምትጛማ ግባትዳ ማልጛ ክብርናቲ ዝኩⶓ እርዳትፅካ::

ግባቱ ክብርናቲው ችግርስ አሬሳቻንትካ ኮምፖስቶ ቴኬምስትጝስ ሴብሎ ዜርጝ ቱስታው አኽⶓ ጌሌፅካ:: ቤርቤሩ ምርትዳ ኬሴትስታውሳ ቑንዜ ካላካልጝጝስ እሊኩ ኾትካሊ እንፃኽስትጝስ ቴርትⶓ ዲብስካ:: አሬሳቻንትካ ቤርቤሮ አሜሬታኒስ አኹ ቲሬቲታ ፄውጝ ቱስታው አኽⶓክላ ቶኬምካ::