አሜት ባልሰታ ክብርናቲ

አለሚቱ የኔት

ይቶፒያዳ እስካዊ አሜት ኬቤርስቱኑዴስ ፋሌንጋ ኦርቶዶክሱ አምናንትካውላስ ሜስኬል፣ ጊኒስታ ፋዝጋ ጊዞ ማንዴካማ ኬቤርስታና:: እኒ አሜት ባልካ ክቻዴስ ፋዝጋው ባል ማንዚ 12/2017 ም/አሜታስ ኬቤርስታ:: ፋዝጋ /ትንሳኢ/ ናው ግዙ ካል አግስቲ ተንሰአ፣ ጁኻ ናው ግስ ያኹስ ኽይኪላ ጁጝ፣ እስካዌ ይወቶ አግፅጝንጝታ አኽⶓ ይቶፒያው ማበረ ቅዱሳኑ ድረገፅ ቶኬሜ::

ፋዝጋው /ትንሳኢው/ ባል ሊጊሲሚ አይማኖታዊ ቴርት ዝኩኽ፣ ኦርቶዶክሱ እምኔቱ ሲፋንትካውላስ ፂኑኽ ፁምስ፣ ስግዴትስ፣ ምህሊስስታ ይምጝስ ፈታሪሊላጛ አርፍካሳላካ ካስጝፃኒስ እጂኑሳ አሌድካማ እየሱስ ክርስቶሱሳ ክርጝዴስ ጁⶓ ታክስጝስ ካሊስትኹስጊ ዴስቲስ ፌይፅጝስ እንጉስ ማንዳኑ ጌርክኪላኽ:: ባልኪላ ሜንፊሳዊ ቴርትዴስ ፌይኹስ  እርዳትጝጚ፣ ታክስጚስስታ ካሲትጝጚስ ጝናኻዳ ኬቤርስታዊያኽ:: ፋዝጋው ባል ዲጊዳስስታ እቺዳ ዝኩዋንኩ ጝናቕ፣ አፄብካስታ እሊኩጊ ታምትጝጚስ ዴስቲስ ፌይፅጝስ እንጉስ ማንዳኑዊያኽ::

አዊ ብሄረሰቡ ቺፅጝፂዳኪላ ፋዝጋው ባል እሊኩ ዙራሙርካታጊ ብሩኽ ቴርትስ ኬቤርስታዊያኽ:: ፋዝጋውሳ ባሎ ኬቤርፅጝስ ዴሬካቱሺ ጌርክዴስ ጉሽፃማ አጐላጐሌውሳ ባሎ ናማኪ ክዳማሹሮኺስታኪላ ፄውስታንኩ ባሎ ኬቤርፅጝስ ካሊፃንኩ ቴርትካዋ ቤዴራማ ካስጝፅጝዴስ ጄሜራማኪላ እሳን ልቕልቕቲ ፄውስታማ ፋዘጋው ባል ኬቤርስቴ:: ስልኪስ እጂጜ ፄውንኩ ብሄረሰብ ቺፅጝፂ ባንጂ ወረዳ አስቑኒ አቡኪ ኬቤሊው ዝኩዋንቲ አቶ ተፈራ አባየ ዙሙኑውስታጊ ቤዴራ ፋዝጋውሳ ባሎ ኬቤርፅጝስ እቺ ዙራሙሪዴስ ዛኽ ዝሜድ ጝናቕሾ አንትጝዴስ ጄሜራማ ሶኼትዴስ ቤዴራማ እሺኹ ሌንጌዱ እንዝጚ ናካዳ ሰላሙ ዳንጉዊኒዴስ ድምክና ዝኩዊኒው ክብርናቲ ምክንያታስ ኔኬታማጊ ይንታ:: ፋዝጋውሳ ባሎ ኬቤርፃኒስኪላ ቤዴራስታ ጝንቺፋ ታዬ ጄውጝ ይጉዋማ ይጋሪስ አችትጜካማጊ ቢሬ ጄውጝስ ሳኹሩሳ እሼ ቤንጜካማ እሺⶓ እንክርፄካ:: ምሳኼ ኹፅጝሾዳኪላ ቤዴራሱውስታጊ አቖ ሚንችስⶓ ባይካማ ሴንካዋ፣ ቹዋ ታብሎስታ ዲጊኩ ዋሌኖ  ይቢቻ እቑዊጝስ ሚንችሳ ኑውላስ እሺንኩ አኽⶓ ዲብስካ:: ኹንኪላ ያኹኒ ቤዴራ እሳንስ ቴርሳኑሳ ስልኺዴስ ጄሜራማ ቴርታውሳ ምግቡሳ ቤዴራ ቴርቶጊ ኔኬትጝስ ጝንታስታ አክምታ ፄዌካማ ቴርስጝስ አክምዴስ ጀላ ባይጝስ ባሎ ኬቤርፅⶓስታ ቱትጚስ ጊዝታ እሺⶓኪላ አቶ ተፈራ ቶኬምካ::

ፋዝጋውሳ ባሎ ኬቤርፅጝስታ እርባቱስታ ምሳኺውሳ ቴርቶ አክምታጊ ፄዋማ ኬቤርፅጝስ ውላጊ አቒ ጊዙሳ አኺኔ ማላማ እርዳትስትⶓ ኪላ ጉሽካ:: ቤዴራ እስታው ዙሚታ ሳኪትጝስ ያኻውላ ጊዙ ክብርናቲው አኺኒ ያጉኽ አኽⶓኪላ ውላጊ እርዳትስትⶓኪላ አቶ ተፈራ ዲብስካ::

ዊዛሮ አስናከች ዘላለም ቤካፍቲ ኬቤሊው ዝኩዋንታኪላ ፋዝጋውሳ ባሎ ኬቤርፅጝስ ኹን ስልኺስ ያኻውሳ አሬስታ ቱሺስ ያኻውሳጊ ቴርስጝሾዳ እሺኹ ቤዴራ ቴርት ቤዴራሱውስታ እሳንስ ዲግኹ ያኻውላ ሜቴንስታማጊ አኽⶓ እንክርፄካ:: “እን ያኹኽ ምክንያቲ ዴሜካ ዝኩዊኒው ክብርናቲ ምክንያታስስታ አሬሳቻንትካ ባንክዳ እንኩሩኑሳ ጌንዜቦ ውላ ሼውታ ፍሽጝስ ካሊስታቲው አኽሴኽ” ንካ::

እርዲውሳ ቤዴራ ቴርቶ ካንትኹስኪላ አክም ዝኩኽኪ ታዬ ጄውጝስ ካላቲውኪ ሳኹሮ ቤንጝጝ አንዴስ ጃላ ያኹኽኪ ጝንታ ቺዌስታ አንኬ እንኩዊኔ እንጂፃማ ቡኖ ጌፌርፅጝስ እሺⶓኪላ ዊዛሮ አስናከች ዲብስካ:: አክማ ጋንኩሳ እቑዊካማ ጝን አፌሩኽሳጊ ኬሜስጚስ ባሎ ኬቤርፅⶓኪላ እንክርፄካ::

ምሳኺውሳ ቴርቶ ካንትኹስኪላ በዴራ እቺ ዙራሙሪዴስጊ እቑትጚስ ይጋሪስ ኹዋንኩ አኽⶓ ቶኬምካማ ዲጊዴስ ናቴ ኩፅኒ ዝኩዊኒው ክብርናቲ ምክንያታስ ካሊⶓ አቲጝስ ይጉዋቲንኩስታ ዲጊኩ እስታንኩሳ ይቪችካዋ እቑዊጝስ ምሳኺው ቴርት ካስጝⶓኪላ ዊዛሮ አስናከች ድኹዌካ:: ዝኩኽ ሰላሞ አቲጝስታ ዝኩዊኒው ክብርናቲ ፋይታስታ ሼውታ ኬቤርፅጝሰ ካሊፃቲው አኽⶓ ናካዳ ውላጊ እርዳትስታማ ጝንታጊ ባሎ ኬቤርፅⶓኪላ ጉሽካ::

እኖጂኪላ ታዜብናውስታጊ ፋዝጋውሳ ባሎ ኬቤርፅጝስ ቤዴራ ላጛሶኼታዴስ ጄሜራማ ጌቤሉ ዳድውላ ፌይፃቲው እሺⶓኽ ካንትኑስ ሴጝኑኺ:: ዲጊዴስናቴ ኩፅኒ ባል ይንቱስ ቤዴራማ ካንትስታው እሺኹ ድባብጊ ኔኬታማጊ አንትⶓስታ ኮቴ አሜት ባሎ ፄጌራቲው አኺኒዳጊ ታምብⶓ ሼው ንጝስ ካሊና:: ጌቤላኻ ቱኑስ እሺኹ ሺንኪትጚጊ ናክዳ ካንትስታኒ አሳላካ ያኻ:: እን አኽጝስ ካሉኽ ዴሜካ ምንግስቱ እንፃኽስታንቲኪ ያኻ ግርብስ እንፃኽስታማ ቻንቲ ቤዴራስታ ፋይታ ጄዋማጊ አሜት ባሎ ኬቤርፅጝስ ካላው አክምዳ ጋቲው አኽጝስያኽ:: አሬሳቻንቲኪላ ያኹኒ አሜሬትኹሳ ያጋማ ዋዩኒኪላ ፋብሪኪው ምርት ክብሪ አኽጝስ ጚስ ጜዋ ጄውጝስ ሾፌንጝስ ቼጌርስቱንኩ አኽⶓኪላ ዙማኒስ ቹኒትስታና:: ቤዴራ አሜትባል ይንቱስ እንጉስ ጌርክ ታንብምባ ማንዲስታውስታጊ ናካዳ ኩፅኒ እንዳሪ ታንባውላስ ይጉኒ ናውሳኺስታጊ ታምብስታ::