ሰላሙ አምኽጚ

ታደለ አጋጄ

ይማሊስታ ፂውሊ ኬቤልካ ሊሊትጙኽ እምኔት፣ ኮንኪስታ ብሄር ዝኩክ እምፕልታቕ እምፕልትስ ኬቤቤርጜካማስታ ቱትጜካማ ዝኩዋኑ ዙራሙሪያኽ:: ያኼስጉ ዲጊ ጊዝዴስ ናቴ ኩፂ እኒ ኬቤልካዳ ጋቻ ፌቴርስታማ ዳዴኹ፣ አቔ ኩጙስታ፣ ብቴ ዜሬፍጙ ዎንጄልካ ኬሴትስትጝስ እምፕልታቕ ቤዴልስትካማ እጂካ::

ፖለቲካው ፊቲስ እምፕልትስ ዝኩዋንኩሳ እምፕልታቖ ጌውስጝፅጝስ ጛርቱሳ ትክሞ አግፅጝስ ዎንጄሎ ፌፄማንኩ አቕ ዝኩና:: እምፕልትስ እሺንኩሳ አቖ ታራታርጛንታ ፄዌካ:: አምንጜ አቲስካ:: ኮንኬ፣ ብሄሮስታ እምኔቶ ሰራ ፄውኽሳ ጋቻ ጉሽፅጝስ ፅሬቶ ፄዌካ:: እንስኪላ እምፕልታቑሳ እምፕልቶ ሺሽራንኩ ችግርካ ኬሴትስትካማ እጂካ:: ይማሊስታ ፂውሊ ኬቤልካዳ አቔ ኩጙ፣ ዳዴኹስታ ብቴ ዎሬርጙ ዎንጄልካ ፌፄምስትካ:: እኒ ችግርካዋ ኽይጝስ ኩፂ ስንብቶ እምፕልታቕ ኩስጝጜ ፄውጝስ ችግርካ አምኽጚስ ኽይስታንታ ፄውስታ::

ሰላሙ አስሚምጚዳ አግስቱንኩ ፂውሊ ኬቤሊው ዝኩዋንቲ ኡማ ካባንጃ ጉሙዝስታ አዊ እምፕልትስ አሰሜምጜካማ ዝኩዋንኩ ያኹኒውላ ፅሊ ችግር ኬሴትስታማ እምፕልታቑሳ እምፕልቶ አቲሳማ እጂⶓ ዙሜካ:: አዊውስታ ጉምዙ እምፕልታቕ እምፕልትስ አስሜምጜካማስታ ቱትጜካማ ዝኩዋንኩ እምፕልታቕያኽ:: ዴስቲዳስታ ችግርዳ አሰቴፍጛና:: ናካውላ ያኹኒ እምፕልትስ ቱትጜካማ ዝኩዋና ኑንኩ አቶ ኡማ እምፕልታቑሳ እምፕልቶ አቲሳንኩስታ ችግሮ ፌቴራንኩሳ ሰላምስ ዝኩዋንታ ፄዌካማጊ አኽⶓ ቶኬምካ::

አምኽጚው አስሚምጚዳ እምፕልታቕ ዎንጄሌንካዋ ፍሽጝስ እግስ ካሲስታንታ ፄውጝስ አስሚምጚዳ ታምብⶓ ዙሜካ::

እሊው ይማሊ ኬቤሊው ዝኩዋንቲ አቶ ጌታነህ ብርሃን ላንጊ ኬቤልካዳ ሊሊትጙንኩሳ ዎንጄልካዋ እንፃኽስታንኩ ጛርት አቕ ዝኩⶓ ቶኬምካ:: “እሊውዴስ ይንታማ ዳዴኻው እላ:: ሊሊትጙንኩ ብሄርካ እምፕልትስ ዝኩዋኑ ኬቤሊ ያኹኒውላ እምፕልታቖ ጋቺትጝፅጝስ ዎንጄሎ እንፃኽስታንኩ ጛርት አቕ ዝኩና:: ዳዴኹ ዎንጄልዳ አሴሜርጙንኩ አቕ እዝቦ ጛስ ጛዋ ጋቺትጝፅጝስ ዳዴኹሳ ዎንጄሎ ፌፄማና” ናኒስ ችግሮ ፌቴራንኩ እምፕልታቕ እዝብሊ ዝኩንኩ አኽⶓ ድኹዌካ::

ሊሊትጙንኩሳ ዎንጄልካዋ እንፃኽስታንኩ፣ እምፕልታቖ ጋቺትጝፃንኩ ጛርት አቕ ሺሽስቴካማጊያኽ ኑንኩ አቶ ጌታነህ እምፕልታቕ ሰላሙሳ አምኽጜ ፄውጝስ ሊሊትጙንኩ ዎንጄልካ እንፃኽስታንኩ አቖ ፍሽጝስ እምፕልታቕ ሰላምስ ዝኩዋንታ ፄውጝስ ሰላሙ አምኽጚ ፌፄምስትⶓ ዲብስካ::

እዝብስታ እዝብ እምፕልትስ ታምትጛማ ኩስጜ ፄዋኒ ዎንጄሎ እንፃኽሰታንኩሳ ድፅጝስ ካሊስታው አኽⶓ ቶኬምካ:: እምፕልታቕዳ ቤፍቴካማ ዎንጀሎ እንፃኽስታንኩሳ ፍሻማ እይጝስ ዎንጄል ካሲስታንታ ፄውጝስ ቱትጚዳ ታምብስትⶓ ዙሜካ::

ጉዋንጉዊስታ ዚጋሚ ወረዳው ቺፅጝፃንትካ ምንግስት ምንግስታታ እዝብ ዴሜካ እዝብታ አኽጝስ ዎንጀሎ ፌፄማንኩሳ ሲፍጜካማ አሚጝስ እርምጂ ካፅስታታ ፄውጝስ ይስጙኽሳ እንፅኼ እንፃኽስታንኩ አኽⶓ ጌሌፅካ:: ፅሌ ምክኒያቴ ፋይጝስ እዝቦስታ እዝቦ ጋቺትጝፃንኩ፣ ዜሬፍⶓ ፋያው፣ እሊውሳ አጀንዴ እሚጝስ ዎንጄሎ ፌፄማንኩሳ እግስ ካሲስታንታ ፄውጝስ እንፃኽስታንኩ አኽⶓ እርዳትፅካ::

እምፕልታቕ ክቻዳ ካስጙኽ ሰላሙ አምኽጚ ችግር ካብስ ፌቴርስታቲታ ካሊፅኹ አኽⶓ ጌሌፅካ::

እምፕልታቕ አስሜምጜካማ ዝኩዋቲንታ ሚንችካ ዲብካ ፄውስታና:: ጋቻ ፌቴርስታኒ ዳዴኽጝስስታ ዜሬፍጝስ ታክሳንኩ ጛርት አቕ ዝኩⶓ ቶኬምካ:: ሰላሞ አቲስጝስ ሊሊትጙንኩሳ ዎንጄልካዋ እንፃኽስታንኩ ጛርት አቖ እዝብ ፍሻማ እግስ ካሲስታንታ ፄውጝ ቱስታው አኽⶓ እርዳትፅካ:: ናካዳ እምፕልታቕ ክቻዳ አምኽጚ ፌፄምስትኹ አኽጝስ ችግርካ ካብስ ፌፄምስታቲንታ እምፕልትስ እንፃኽስታንኩ አኽⶓ ጉሽካ::

ላጝጊጊ ወረዳኩ ቺፅጝፃንትካ ሊሊትጙንኩ እምፕልታቕኩ ቤንካዴስ ፊትጙንኩሳ ኮሚቴዋ ቲሪትጝፅጝስ እንፅኺሾ ቱዋንታ ፄዋንኩ አኽⶓ ጌሌፅካ::

ጌቤሎ አብራ እሼንታ፣ ዳዴኽሰታኒ ዴሜካ እንዴስ ቤዴራ ፄዋሺኑውስታ ዱኪስ ዳዴኾ ፍሻንታ፣ ፄትቲው አይልካ ዴሜካ ዎንጄሌንካዋ እግስ ዲግስጝስ አሬምስታታ ፄውጝ ቱስታው አኽⶓ እርዳትፅካ::

እንታኮው ሰላሙ አስሜምጚ ሲፋታ አመራርካ፣ እዝብ፣ አጌር ሹማጌልካስታ አይማኖትኩ ታብል እምፕልትስ እንፃኽስትጝስ ካሎ ቱዌካማ አግሌልጝⶓ ጌሌፅካ::

እዝቡሳ ታምትጜ ይስጝፅጝስ ድንቤሮ ካያንኩ ዎንጄልካዋ ይጋሪስ ካላካልጝጝስ ኩርፄንትስ እንፃኽስታንኩ አኽⶓ እርዳትፅካ:: አዊ ብሄረሰቡ ቺፅጝፂው ፖሊስ ሜምሪው አላፊ ኮማንደር እሱባለው መኮነን እዝቦስታ እዝቦ ጋቺትጝፅጝስ ጛርቱሳ ትክሞ ሳኪትጝፅጝስ ጊጝትጛንኩ አይልካዳ እጉሳ ካሲስታንቶ ሴፌንፅጝስ ትኩትስ እንፃኽስታንኩ አኽⶓ እርዳትፅካ:: ብሄረሰቡ ቺፅጝፂው ፄትቲው ሜዋክር ዎንጄሎ ፌፄሙንኩሳ አቖ እግስ ካሲስታንታ ፄውጝስ እንፃኽስታንኩ አኽⶓ ዲብስካ::

አዊ ብሄረሰቡ ቺፅጝፂው ፅፌት ጝናሱ አላፊ አቶ ይርጋ ወሌ ላጝጊጊ ወረዳው ኬቤልካዳ ፌቴርስታሺኹሳ ቱትጜ አቲጝ እርክስ አሌድስታታ አጌር ሹማጌልካ፣ አመራርካስታ ፄትቲው አካልካ ኬፍንኹሳ ፍሼ ፊትጝⶓ ጌሌፅካ::

እምፕልታቕ እንፃኽስቴካማ ኪስስታቲንታ ፄዋንኩ ሰላሞ አቲሳንኩ ምክኒያትካዋ ይጋሪስ ካላካልጝጝ ቱስቴ ናኒስ ታክስፅካ::