አቕቱ ዳድካ ብስስትካማጊያኽ

አለሚቱ የኔት

አማኻሪ ክልልዳ ፌቴርስትኹ ሰላሙ ዳንጉዊኒ ዳሉንኩስታ ልኺትጛንትካ አጌር አቖ አፌርጝስ ካሊፃው ክንቲው ቴርትዳ ኬፍቲኔ ቻኒስቶ ፌቴራ:: ጋቻኪላ ኽዮ አግፃውላ እጂጝ ክንቲው ታምብስታንትስታ ፃንኩትዳ ኬፍንኹሳ ቻኒስቶ ቺፃ:: ክንታንትካ ፋያኑሳስታ እንካናኑሳ ክንቴ ሼውታ ክንታቲንታ ፅንጋኻ ያኻማ እጂኒዴስ ላጛንቴ አሜቶ ቼፍፅጝስ ልቓ አርፍካ ይጉዌካ:: እንኪላ ክንታንትካዋ ክንቲዴስ እቺትጝፃ:: አሜትካስ ዴሬቱንኩስታ ዴሬትስታዩክ ስራስሪው ቴስፊዳኪላ ጋሬፃ ያኻ:: ቹዋ ታብልዳ ኪላ ድርትኒ አላባሊዳ ይጉኻ ናው ስጋት ፌቴርስታ:: 2017 ም/አሜታዳ ጄሜርስትኹ ክንትጝ ክንትፅጙ ቴርት ውላጊ ዙራሙርካዳ ሼውታ እይስትጝስ ካሊስታያላኪ:: ናካኪላ ዶንጌትካማ ካዌናኻ ቱንኩ ቤንካዙራሙሪዳ ዝኩንኩ ክንቲ ጝንካ ስጋትዴስ ኔፃ ያኼካማ ክንቴ ክንትፅጝስ ካሌካያኪ:: አዊ ብሄረሰቡ ቺፅጝፂዳ አግስታንኩ ወረድካዴስኪላ 2016 ም/አሜታስ ልምትካማ እሺንኩ ክንቲ ጝንካ ክቻዴስ 2017 ም/አ ብስስትካማ ክንቴ ጄሜርፁንኩ ዝኩና:: ፌያፌያማ ብስስቱንኩ ዙርካማ ልምታንታ ፄውስታው ድፂው ቴግባርኪላ ካንትስቴ::

አዮ ጉዋጉሲ ወረዳ ክንቲ ፅ/ጝናሱ አላፊ አቶ አሳየ ተረፈ አውጚ ቴሌቪንሊ ፄውኑ እጂጚዳ ኪላ ክልልታ ፌቴርስትኹ ጋቻ ወረዳዳ አግስታንኩ 63 ክንቲ ጝንካዴስ ሰላሙ ችግር ምክንያታስ 23 ክንቲ ጝንካ ይቢቻ ክንትፃኒስ እሺንኩ አኽⶓ ጌሌፅካ::  2016 ም/አ ልምትካማ እጂንኩዴስ 19 ክንቲ ጝንካዋ ናካዳ ብስፅካማ ወረዳዳ ትክላሊስ 42 ክንቲ ጝንካ ቴግባርሾ ቱዌካማ ክንትፅካማጊ አኽⶓኪላ ጉሽካ::

ወረዳዳ ክንቴ ክንታና እስትካማ ታክስስቱንኩኪላ 36 ሻይዴስ ጃላ አኽⶓ አቶ አሳየ ቶኬምካማ ጝሺሳኺስታ ሜዜጌብስትካማ ክንታንኩ ዴሜካ 15 ሻይዴስ ኽሳቲንኩ አኽⶓ እርዳትፅካ::

ሰላም ዙሩክ ዙራሙርካዳ ልምቴካሺንኩ ክንቲ ጝንካዋ ብስፅጝስ ካሊስትኹኪላ ክንቲ ሚንችካውሳ ትኩቶ ፋያው አኽጝስ እምኔትኩ ታብሎ፣ አጌር ሹማጌሎስታ እምፕልታቖ ኩችፅጝስ ችግሮ ማላንታ ፄውጝስ ቱትጚዳ ታምብጝስ ክንትፅⶓ ቲሪፅካሺንኩ ክንቲ ጝንካዋ ጄሜርፅⶓ ጌሌፅካ::

ልምትካሺንኩ ክንቲ ጝንካዋ ብስፅጝስ ሚንች ግርብ ድኹኽ አኽⶓኪላ አቶ አሳየ ጉሽካ:: ክንቴ ጄሜርፅጝ ይቪቻ ያኻውላ ክንታንትካው ዋይሚስኪላ ትኩት እይስታው አኽጝስ 6ንቴ፣ 8ንቴስታ 12ንቴ ቤኖ ፌቴንስታንኩ ክንታንትካ ዋይሜ ያጋንታ ትኩት እይስታማ እንፃኽስትጝስታ ክንቲ ጝንካ ክንታንትካስ አሜቻንኩ ያኻንታ ፄውጝስ እንፃኽስትካማጊ አኽⶓኪላ ቶኬምካ:: ፄትቲው ችግር ዝኩክስታ ምንግስቱ ስርዳ ያኼካያስኩ ዙራሙርካዳ ዴሜካ 24 ክንቲ ጝንካ ዝኩንኩ አኽጝስ 2018 ም/አ ክንቲው ዝቤንስ ቤዴርካማ ቴርታንታ ትኩታኩ ቤንካዋ ኩስጝፅጝስ ቤዴርጝስ ምዝጋቤ ካስጝፅጝስ ቴርስጝስ እንፃኽስትካማጊ አኽⶓኪላ አቶ አሳየ ጌሌፅካ::

ብሄረሰብ ቺፅጝፂ ክንቲ ሜምሪው አላፊ አቶ ደስታው አለሙ ኑኑውስታጊ 2016 ም/አሜታስ ክልልታ ጄሜርኹ ሰላሞ አቲጝ ኪሲ ዝኩዋችኹኒኪላ ናካኪላ ሰላም አቲጝ ክንቲዳ ኬፍንኹሳ ችግሮ ታምፃማጊያኽ:: ክንቲው ፍልስፍኒ ፖለቲካስታ ክንቲ ታምትጛቲው አኽⶓ ጌሌፃችኼስጉ ካዌናኻ ቱንኩ ውላጊ ክንቴ ኬውጝፅⶓ ሜሳሪታ ቴኬምስትካማ ሚንችካ ክንቲ ጝንካዋ ልምፅⶓ ቶኬምካ:: እንሳኪላ ክችሳማ ሰላም ዙራታስታ ክንቲ ጝንካኪላ ሰላም ያኹኽ ዙራሙሪዳ ክንቴ ክንትፃንታ ፄውስታማጊያኽ:: 2017 ም/አ ክንቲው ዝቤንዳኪላ ልምትካማ እጂንኩ 104ዴስ ጃላ ክንቲ ጝንካዋ ብስፅጝስ ካሊስትⶓ አቶ ደስታው ጌሌፅካ:: ናካኪላ ያኹኒ ሚንችካ ክንቲ ጝንካዋ ብስፅጝስ ፅሬቶ ፄዌካማጊ አኽⶓኪላ ጉሽካ:: ብስስቱንኩ ክንቲ ጝንካዋ ካብስ ልምፅጝስ ድፂው አይል ፅሬቶ ፄውኒኪላ ክንትጝ ክንትፅⶓ ኬውጝፃቲንታ ቡንካዋ ፄውⶓ ኬውጝፃቲንኩ አኽⶓ አቶ ደስታው እርዳትፅካ:: ሰላሙ ዳንጉዊኒ ምክንያታስ ክንቲ ጝና ልምቱስ ክንቲ ጝና ልምትጝ ይቪቺ ያኻውላ ጝንዳ እንጅኩዋንኩ ስራስሪው ሼውፅንታዳ ታምፃው ቻኒስት፣ አጌሮ ባይፅካማ ግርብ እንፅኻሳ ፋያ ሴዴድትጝስታ ክንቴ ኬውጝፅካማ ኽይስታንኩ ኹኑ ይወትኪላ ታክስፃው አኽⶓ ጉሽካ::

ኬሴትሰትኹ ሰላሙ ዳንጉዊኒስ ሚንች ክንቲጝና ድሳታ ፄውስትⶓስታ እንሳ ዙርፃማ ጊቢትጝስስታ ቲሪትጝፅጝስኪላ ሚንቾ አሜቶ ቼፍፃው አኽⶓ አቶ ደስታው ቶኬምካ:: ክንቲ ጝንካው ግብሪስ እሼውሳኪላ ክልል አንቢሊስታ አህቲ ክንቲ ጝናሳ ግቢትጝስ ካሊፃውሳ ልቓ ያኹኒኪላ እርዳቴ ፄውⶓ ቶኬምካ::

ሰላሞ አዌካንትካ ቤንካ ክንቲ ጝናሳ ልምⶓስታ ክንቲ ጝናሳ ድፅⶓ አላሚታ እሚንኩሳ ውላጊ ትኩቶ እያማ ፉራን ንጝ ቱስታው አኽⶓስታ ስራስሪ ክንቴ ሼውታ ክንታንታ ክንትፃንትካ ፋይታ እንዜጛንታ ፄውጙሳ እንፅኼኪላ እንፃኽስትጝ ቱስታው አኽⶓኪላ አቶ ደስታው ታክስፅካ::