ትቪቪኒ ሞሀመድ ሳላህ

ታደለ አጋጄ

ልኩ ኩታው አሌምዳ ሜዜጌበፃማጊ ዝኩኽ ሳኪትጚስ ካሜንስትኹሳ አጌሮ ፌያማ አፍሪካዋ እቑፅኹ ትቪቪኒ ልኩ ኩታው እንክራንቲያኽ ሞሃመድ ሳላህ:: ግብፅ አጌርዳ “ናግሪጋ” እስታማ እቑስታው ዙሪሙሪዳ ካሜንስታማ ጚፄ ናስር ሳላህስታ እሊኩ ጝንአቕሊ ካሜንስትኹ ዙራሙሪዳ ሌጌሳ::

ላጚቲ አሜታስ ጚፄሊ ያኻማ ናግሪግዳ ልኩ ኩታዋ እንክርⶓ ጄሜራ:: ጌርካ ጌርካ አፄብካሊ ያኻማ ልኩ ኩታዋ እንክሩስ እሼ:: ኻራ ኻራ ዴሜካ ጚኩ ምሳላ ያኹንኩ ሮናልዶ ናዛሪዮ፣ ዚነዲን ዚዳንስታ ቶቲኖ ቻምፒዮንስ ሊግዳ ካንታማጊ እንፃኺቱሳ ጊዞ ፌይፅⶓ ዙሜ::

ልኩ ኩታው እንካን ሚንችካ ጝን አቑ አባልካው አኽⶓ ጌሌፅኹ ሞሃመድ ሳላህ፣ ጚታላ ሳላህ ጋህሊስታ ላጛ ጚታላስ ጚፂሪ ልኩ ኩታዋ እንካንጝዴስ ፌይኹስ “ናግሪግ” ዎታትካው ኬችዳ እንክሬካ::

ሞሃመድ ሳላህ ጚኩ ጝንአቕታጊ እንፃኺታስ ኤልካሞካውሎንዳ ፕሮፌሽናል ልኩ ኩታውሳ እንክሬ 14 አሜታሳ ጄሜርⶓ ታሪክ እርዳትፄ::

ሮማዳ ካንትፅኹ ጌሬምፃው ካሌቕትስ ፌሬንጅካው 2017 ሞሃመድ ሳላሆ ሊቨርፑል ፌሬምፃማ ጚው ፄውኻ::

ሞሀመድ ሳላህ ሊቨርፑልሾ ይንቱኽ አሜትዳ ሊጉ ኬፍቲኒ ጐሎ ቼፍፃንቲ ያኻማ ሽልማቴ ዊፅኹ ያኹስ እንዴስ ድምክና ፕሪሚየር ሊጉ አሜቱ ጐቤዝ እንክራንቲ እስትጝስ ካላ::

ሊቨርፑል ፌሬምፅኹ አሜትዳ ክሌቡ ጐቤዝ እንክራንቲስታ አፍሪካው ጐቤዝ እንክራንቲ እስትጝስ ሽልማቴ አግፃ::

ጌሬምፃው ሞሀመድ ሳላህ ካሌቕትስ ሊቨርፑል 30 አሜታዴስ ፋሌንጋ ፕሪምየር ሊጉሳ ዋንቼ ጉሽታ ካሊፃ:: እንዴሰ ድምክና አውሮፓ ሻምፒዩንስ ሊጉሳ ዋንቼ ዊፃታ ካሊፅኹ ትቪቪኒ እንክራንቲያኽ::ንባር ፋና ብሮድካስት ኮርፖሬሽኑዊያኽ::