ዶርካዋ ኔፃስ

አለሚቱ የኔት

ፈረንሳይስታ ቤልጂየም ኬቴምካ ፌዩንኩ አሜትካስ ዱሬ ኔፃስ እያኒስ እጂካ:: አውሮፓውያንካው 2015ስ ፋዝጋው ባል ጊዛይ ሰሞን ኮልማር እስቲት ፈረንሳይቲ ሙራ ዝኩዋንትካስ ዱሬ ኔፃስ እይⶓ ጄሜርትኾ::

ኮልማርዳ ይቪቻ ያኻውላስ እሊኩኪላ ሰሜን ፈረንሳይ እንፃንታ ሙራዳ ዱሬ ኔፃስ እይቴ:: እን ፄውስታውኪላ ምግቡሳ ብክኔቶ ካላካልጚስያኽ::

ወክቱ ኮልማሩ ከንቲባ እሺንኩ ጀልበርት ሜየር “እምፕልዱሪ እምፕልጝናቕስ” እስቱኽ ጉላሊው ልቕልቕቲስ አቕስቴ:: እንሳ ፄውኑኪላ ሙሪው ዝኩዋንትካ ዶርካዋ እሩብፃንታ ይስጝፅጝሲያኽ::

ስልታኖ እሜኒስኪላ ላጛ ዱርካዋ እሩብፃንኩ አችትካሊ ቲቢቢርጚስ ዝኩዋንትካስ ዶርካዋ እይⶓ ጄሜሩና:: ሙሪኩ አቕ ሴሌፍስትካማ ዱሬ ቻቤልⶓ ጄሜሩና::

200ዴስ ጃላ ጝንካ ጛራጛራ ላጛ ዶርካዋ ኻስካማ ጝናቱና:: ያኻማኪላ ውላጊ አቒ ዶርካዋ አንኬባኬብጝስ ካሎ ቱና:: ኬቴሙ ቺፅጝፂው እንፃኽስታንትካ ታክሲሎ ይንቴካማ ንባሮ ፃንኩፅጙሳ እንፅኼ እንፃኽስቱና:: ዶርካ ጃጊ ዶርካስ ያኻው ጝን እይስታያኪ:: ዝኩዋንትካኪላ ጄውጝ አኹኪ ግቢትጝ ቱስቴ:: እን ከንቲባው እክድኪላ ሳኪትጙኻ:: ናካኪላ አኮሜችስታማጊያኽ::

“ፌዩንኩ አሜትካዳ እሊኩኪላ ሙርካ እስጜ ፄውⶓ ጄሜርካ:: እንጚ ዙራሙሪዳ ዝኩንኩ 20 ሙርካ አሴቴፍጛንትካ ያኼካ ናና ጝሽሱ ኮልማሩ ከንቲባ ኤሪክ ስትራውማን:: ላንቡሳኺስታ ሙሪው ዝኩዋንትካስ 5 ሻይ 282 ዶርካ እይስትካ:: ኬፄላው ዙሪ ዶርካዋ እይጙ ቴርትኪላ ሴኒ 2025ስ ጄሜርስቴ::

ኮልማር ዝኩዋንትካስ ዶርካዋ ኔፃስ እይጝስ ጄሜራ ኬቴማ ጋቲትያኽ:: አውሮፓውያንካው 2012 ሰሜን ምእራብ ፈረንሳይዳ አግስቴት ፒንች ኬቴማ ዝኩዋንትካስ ጛራጛራ ላጛ ዶርካዋ እይⶓ ጄሜርስታሺቲኹዋ::

ቤልጄየም ሙስክሮንስታ አንት ዌርና እስቱንኩ ኬቴምካዳ ዝኩዋንትካስ ኔፃስ ዶርካ እይስታና:: ያኼስጉ ዝኩዋንትካ ላጛ አሜታኻዳ ዶርካዋ አሬድካማ ኹጝስ ካላቲንኩ አኽⶓ ፊርሚስ ካሎ ቱዋና::

እምፕል አሜትስ ይቪቻ ሊምቡርግ እስቱኽ ሙሪዳ 2ሻይ 500ዴስ ጃላ ዝኩዋንትካ ዶርካዋ አሬኬብስትካማ እሩብፅⶓ ጄሜሩና:: ልቡስ ልቦ ሚንችካ ዝኩዋንትካ ዶርካዋ ኔፃስ ቻቤልⶓ ጄሜሩና::

ዶርካዋ ኔፃስ እይጝ አሳቡ አችስ ክርፂ ጄሚርጚያኽ:: ሊሊትኑስኪ ዴሜካ እንኩላል ክብሪ ያኹክ ዙራሙርካዳ እን አሳብ ሚንቾ ኪሴ ያጌ ንካ:: ምሳሊስ አሜሪካው ካሊፎርኒያስታ ኒውዮርኩ ክምካ እምፕሎ ደርዘኖ እንኩላሎ 9 ዶላርስ አኹኪ 1 ሻይ 150 ብሮ ኺስታዋ ይስቴ::

ኮልማሩ ዝኩዋንትካ ውላዳ ናካ ዶርካስታ እንኩላል ፊታማ ዋኻ፤ ባኬናው ምግብኪላ እላኪ ፊቴ ዶርካስ ሜጌባንኩ አኽጝስ::