ፌዩንኩ አሜትካዳ ምንግስት ግብርኒው ዜርፍስ እይኹ ኬፍቲኒ ትኩትስ አሬሳቻንቲው አሜሬትጙ አክም ዴሜካማጊያኽ:: አኽጝስኪ ጊዝዴስ ጊዞ ዴሜካማጊ ይንቱኽሳ አሬሳቻንቲው ማዳባሪውሳ ፋዬ ዋኽትጝፅጝስ ባርኾቼዴስ ቱዋው ኬሚካሉ ማዳባሪዴስ ድምክና አሬሳቻንቲ ዙራሙሪዳ አግስታው ፍትሬቱሳ ፄጌ ቴኬምስታማ ማዳባሬ አሜሬታታ እሳን እንፅኺ እንፃኽስስቱስ እጄ::
2017/18 ምርቱ ዝቤንስኪላ ቤዴራ ጌቴማሺኹ ኽብፂ ማዳባሪ ዲግስጚው ችግር ጌቴማቲታ ሜጋቢት 3/2017ኺስታ ባርኾቼዴስ አጌርሾ 724 ሻይ ሜትሪክ ቶንዴስ ጃላ ኽብፂው ማዳባሪ እንዜጝትጝⶓ ኢቢሲ ዜጌባ::
አዊ ብሄረሰቡ ቺፅጝፂኪላ 2017/18 ምርቱ ዝቤንስ 856 ሻይ ኩንታልዴስ ጃላ ኽብፂውሳ ማዳባሬ አሬሳቻንትካስ ታምፅጝስ እንፃኽስስታማጊ አኽⶓ ግብርኒ ሜምሪው ንባር ቶኬማ:: ላንቡሳኺስታኪላ 416 ሻይ 335 ኩንታል ብሄረሰቡ ቺፅጝፂው ማይኬልሾ ቱዋ:: እንዴስኪላ 53 ሻይ 152 ትኩሚ 5 ኩንታልዴስ ጃላ አቓ ግብሪ ማዳባሪ አሬሳቻንትካስ ታምባ:: ማዳባሬ ቴኬምስትጝ ዴሜካ ምርትስታ ምርታምት ዴሜካታ ፄውጝስ ዝኩኽ ፍሺ ልቓ ጋቲዊያኽ:: ሊሊትጙንኩ ምክንያትካስ ቤዴራ ማዳባሪ አሬሳቻንትካስ ታንባውላ ይጉጝስኪላ ሼዎ ኩፕፅካማ አሜሬትጝስ ካላቲንታ ፄውጝስ ሼውፅንታዳ ቻኒስቶ ታምፁስ ሼው እስታ::
ፌዩንኩ አሜትካዳ ጌቴማሺኹ ማዳባሪ እንፂጙ ችግር ናካኪላ ካብስ ፌትርስታቲታ ኩፅኒ ምንግስትኪላ ትኩቶ እያማ ውላጊ ዙራሙሪሾ ቤዴራማ ታንባታ ፄውጙሳ እንፅኼ እንፃኽስታማጊያኽ:: እን ዴሜካ ማዳባሬ ዲግስጙ እንፂጝ ችግር ጌቴማቲታ ፄዌ:: ትኩታኩ ቤንካ ዴሜካ ናካኪላ ማዳባሪ አሬሳቻንትካው ታፍዳ ታምብካያሱ ዙራሙሪ ዝኩኒጊ ዲጊዳ ያኻማ ሲፍጝጝስ ታንባታ ፄውጙሳ እንፅኼ እንፃኽስትጝ ቱስቴ:: ማዳባሬ ሜጋዚንዳ ኬዜንጝስ አሬሳቻንትካስ ታምፅⶓ ባያማ ጌፄንካስ ፌይፃማ እይጝስ አሬሳቻንትካ ቼጌርስታንታ ፄዋንኩ ቤንካ ዝኩኒ ዴሜካ እን ኬርትኹ እንፃኽስትጚዴስ ክብስስትጝ ፋይፄ:: እንዜጝትጝፂው ችግር ምክንያታስ ማዳባሪ ሙሬኺስታ ታንባያሱ ዙራሙሪ ዝኩኒ ዴሜካ እሪ ምክንያታስ ዳድ አቤሌሽስታማ እንዜጝትጝፅጙ ችግር ጌቴማውላስ ቤዴራማ ታምፅጝ ቱስቴ::