ሚፂው አሊ

ታደለ አጋጄ

አፕል ይቶፒያዳ ዴሬኹ አየር አግልታ ዝኩክ ዙራሙርካዳ እሳንስ አሜሬትስታውስታ ማልጛ ፋይስታንቲ ያኹኽ ቴክሉ አይኔቲያኽ:: አዊ ብሄረሰብ ቺፅጝፂው ሊሊትጙንኩ ዙራሙርካዳ አሬሳቻንትካ አፕሎ ሊሚፅጝስ  ቴኬምስታንታ ያኼካማጊያኽ:: እንጃቢሪ ኬቴሙ ቺፅጝፂ ቢዲ ጁጊሊ ኬቤሊው አሬሳቻንትካ አፕሎ እሳንስ ሊሚፅካማጊ ያኹኒኪላ ጌቤሉ ታምትጚው ችግር ኬሽኹሳ ትክሞ አግፃቲንታ ፄውⶓ አሬሳቻንትካ ዲብሳና::

አሬሳቻንቲ ደሳለኝ አደመ ቢዲ ጁጊሊ ኬቤሊው ዝኩዋንትካኽ:: ጛ ቴጋንዳ አፕሉሳ ቴክሎ ሊሚፃና:: ፅክራ ሹኻ አሜታዴስ ቤዴራ አፕሎ ቴኬልⶓ ጄሜርⶓ ዙሙንኩ አሬሳቻንቲ ግብርኒው ውማይቴንካው ኩስጚ ስሬታስ አፕሎ ቴኬልⶓ ጄሜርⶓ ድኹዌካ::

አፕሎ ቴኬልⶓ ጄሜሩኒዴስ ፋሌንጋ ዝኩዊኒዳ ኪሴ ካንትፅⶓ ዙሙንኩ አቶ ደሳለኝ አፕሎ ሊሚፅጝስ አግፃኑ ሚፂስ ጄርካዋ ክንትፃና፣ እሌትስ ምግብስ እሽፃና:: እንዴስ ፌይኹስኪላ ዝኩፄ ጝኖ ግቢትⶓ ዙሜካ::

አፕል አሜትዴስ እምፕላኒ ኩፔ እሜው አኽⶓ ዙሙንኩ አሬሳቻንቲ ደሳለኝ አፕሉ እጂጙ አኺኒታ ሹኻ ዙራስ ሌኬማና:: ሌኬሙኑሳ አፕሉሳ ኩፔ ጌቤልስ ካፅካማ ዋያና:: እምፕል ኪሎ ግራም አፕል 80ዴስ 100 ብሮ ኺስታ ዋይስታው አኽⶓ ድኹዌካ::

አፕሉ አይኔትታ ክብሪስ ዋይስታውኪ ያኻ ቕፂስ ዋይስታው አፕል ዝኩⶓ ጉሹንኩ አሬሳቻንቲ ሊሚፁኑሳ አፕሎ ፋይስታውሳ ላካ ዋይሚስ ዋያቲንታ ጌፄን ቕፂስ አሬኬብስትካማ ክብሪስ ዋያንኩ አኽⶓ ዙሜካ:: አፕሎ አሜሬታንኩዴስ ኪቻ ጊፂኒ ኬሽኹሳ ትክሞ አግፃማጊ አኽⶓ ቶኬምካማ አሬሳቻንትካ አሜሬቱኒ አፕል ኬሽጙኽ ዋይሚስ ዋይስታማ ቴኬምስታንታ ያኻንታ ካሲካ::

አሬሳቻንቲ ደሳለኝ አፕሉሳ ኩፔ አሜሬትጝ ይቪቺ ያኻውላስ አፕሉሳ ፌሎ ዴኬልፅጝስ ዋያንኩ አኽⶓ ዙሜካ::

እሊው እንጃቢሪ ኬቴሙ ቺፅጝፂ ቢዲ ጁጊሊ ኬቤሊው አሬሳቻንቲ አይናለም ደሴ ጛ ዝኩዋኑ ዙራሙሪ አፕሉ ቴክልሰ ማልጛ አስሜምጛው አየር እግልታ ዝኩኽ አኽጝስ ግብርኒ ውማይቴንካው እርዳቲስ አፕሎ ሊሚፅጝሾ ቱⶓ ድኹዌካ:: አፕሎ ሊሚፅጝስ ጛጛርትጛስ ምግብስ ቴኬምስታና:: እሊኩ አሬሳቻንትካስኪላ አፕሉሳ ፌሎ ያኻ አፕሉሳ ኩፔ ቤንጝፃና:: አሬሳቻንቲ አይናለም አፕል ሚፂው አግፅፂ አኽⶓ ቶኬምካማ እሊኩ እንፅኺ እላቲኩ ዎታትካስጊ እንፅኺውሳ ድሎ ፌቴርⶓ ድኹዌካ::

ግብርኒው እንፅኺዴስ ኪምፕስ ኬምፖ አፕሎ ሊማፅጝስ ኬሽኹሳ ትክሞ አግፄካማጊ አኽⶓ ዙሜካ:: አሬሳቻንቲ ደሳለኝ እን ዜርፍሾ ቱዋንታ ዴሜካ ግብርኒው ውማይቴኑ ፍሺ ኬፍቲኒ አኽⶓ ቶኬምካ:: ግብርኒው ውማይቴንካ አፕሎ ዋትጛ አንኬባኬባንኩስታ ዋኒ አኾ ዝቕፃንኩ አኽⶓ ውማዩሳ ስልታኔ እዩኒዴሰ ፋሌንጋ ኬሽኹሳ እንፃኽስትጝስ ቴኬምስታንታ አኽⶓ ዙሜካ::

አፕሎ ሜጌብስትጝ ሚንች ቲኑ ትክም ዝኩኽ አኽⶓ ቶኬምካማ እሊኩስ ዋይጝስስታ ጛጛርትጛሱ ምግብስ ቴኬምስታንኩ አኽⶓ ድኹዌካ:: እምፕል ኪሎ ግራም አፕል 120 ብሮ ኺስታ ዋይስታው አኽⶓ ዙሙንኩ አሬሳቻንቲ ደሳለኝ ጌቤሉ ታምትጚዳ ዝኩኽ ችግር አሬሳቻንትካ ኬሽኹሳ ትክሞ አግፃቲንታ ፄዋማጊ አኽⶓ ቶኬምካ::

አፕሎ አሜሬታንቲስታ ሾሜታንትካ ኩቲስ ኩታ ጌቤልዳ ታምትጛኑ አኺኒ ፌቴርስታያታ ካሲካ::

እሊት ቢዲ ጁጊሊ ኬቤሊው አሬሳቻንታ ዊዛሩ አስማረች ወልዴ አፕሎ ሊሚፅⶓ ጄሜርጝዴሰ ቤዴራ ጌርኩ እንፅኺዳ እንፃኽስትጝስ ይዝኩዌ ዝኩዊኔ ጉሳሺⶓ ዙሜካ:: ያኼስጉ አፕሎ ሊሚፅⶓ ጄሜሩኒዴሰ ፋሌንጋ ኩፅኒ ኬሽኹሳ ዝኩዊኔ ጉሴካማጊ አኽⶓ ዲብስካ:: ዊዛሩ አስማረች ላጛ ውጋቢ ብቲዳ አፕሎ ቴኬልካ:: አሜሬቱኑሳ አፕሎ ኬሽኹ ዋይሚስ ዋያቲንታ ኩፅኒ ጌቤሉ ታምትጚው ችግር ዝኩⶓ እርዳትፅካ::

ጊፂኒ ልቓ ጌንዜብስ ጄዋ ካፃማ ክብሪስ ዋያው አኽⶓ ቶኬሙንኩ ዊዛሩ አስማረች አሜሬታንትካዴስ ኪቻ ጊፂኒ ኬሽኹሳ ትክሞ አግፃማጊ አኽⶓ ቶኬምካ::

አሬሳቻንትካ አሜሬቱኑ አፕል ጉድ ዋይሚስ አሬኬብስታማ ዋይስታታ ፄውስትጝ ቱስታው አኽⶓ ጉሽካ::

አፕሉሳ ቴክሎ እሊው ማሲዳ እሳንጝፅጝስ ኬሽኹሳ ሚፄ አግፅጝስ እንፃኽስታንኩ አኽⶓ ቶኬምካ:: አፕል ማልጛ አንኬባኬብⶓ ፋያው አኽጝስ ፃንኩቶ ማንዱኽሳ አፕሉሳ ኩፔ አሜሬታንኩ አኽⶓ ዲብስካ::

እንጃቢሪ ኬቴሙ ቺፅጝፂዳ ሴብል ልማቱ ውማይቲኒ በላቸው ልጅአለም ቢዲ ጁጊሊ ኬቤሊዳ 7 ትኩሚ 7 ሄክታር ብቲ አፕሉ ቴክልስ ሾፌንስትኹ አኽⶓ ጌሌፅካ:: አሜትስ 98 ኩንታል አፕሉ ምርት አግስታው አኽⶓኪላ እርዳትፅካ:: አሬሳቻንትካ አፕሎ ዋትጛ ሊሚፃንኩ አኽⶓ ውማዩ ስልታኒ እይስታው አኽⶓ ዙሙንኩ ግብርኒው ውማይቲኒ ጌቤልስ ማልጛ ፋይስታንቲ ያኹኽሳስታ ፃንኩቶ ማንዱኽሳ አፕሎ አሜሬትካማ ቴኬምስታንታ  ፄውⶓ ጉሽካ::

ጋቻው ምክንያቲስ ጌቤሉ ታምትጚው ችግር ዝኩⶓ ቶኬሙንኩ ግብርኒው ውማይቲኒ አሬሳቻንትካ አፕልስ ኬሽኹሳ ዝኩዊኔ ጉሳንታ ፄውጝስ ይስካማ እንፃኽስታንኩ አኽⶓ ጌሌፅካ::

እምፕል አቒዳ ጛርትስ 32 ሻይ 200 አፕሉሳ ችግኞ ፌልሳው አሬሳቻንቲ ዝኩⶓ ቶኬምካማ አፕልዳ ኬሴትስታውሳ ቑንዜ ካላካልጝጝስ ቱስታው ዳድስ አንኬባንኬብጜ ፋይፃው አኽⶓ እርዳትፅካ::

አዊ ብሄረሰቡ ቺፅጝፂው ትክትሊ ግብርኒ ሜምሪው አላፊ አቶ አዲሱ ስማቸው ብሄረሰቡ ቺፅጝፂዳ 97ዴሰ ጃላ ኬቤልካዳ አፕል እሳንስ አሜሬትስታንኩ ዙራሙርካ አኽⶓ ቶኬምካ:: አምሉ አሻሪው ሜርሃ ግብር ጄሜርጝዴስ ቤዴራ እን ዙራሙሪ አፕሎ ቴኬልጝስ አቕስታው አኽⶓ ቶኬምካማ አሬሳቻንትካ ኬሽኹሳ ኢኮኖሚውሳ ትክሞ አግፃንታ አፕሎ ይስጝፄካማ እንፃኽስታንታ ፄዌካማጊ አኽⶓ ጌሌፅካ:: አሬሳቻንትካ ካሴኑ ሞተር ፓምፑ እርዳቲስታ ጌቤሉ ታምትጚዳ ዝኩኽሳ ችግሮ ኽይጝስ ትኩትስ እንፃኽስታንኩ አኽⶓ እርዳትፅካ::

አሬሳቻንትካ አፕሉሳ ችግኞ እሳንስ ቴርስካማ ዋይጝስ ኬሽኹሳ ትክሞ አግፄማጊ አኽⶓ ጉሽካ::

አፕሉ ቴክልስ አሬሳቻንትካ ኬሽኹ ዳድስ ዋይሚስታ ያኻንታ ትኩቶ እይካማ እንፃኽስታንኩ አኽⶓ ጌሌፅካ::