ትብ አጌራዳ ቼኔክፅኹ አርቢኒ

ዘውዴ በካሉ

ይቶፒያዳ ሊሊትጙንኩ ጊዝካስ አጌራውሳ ሉዋላውቶ ማንዲፅጝስስታ አጌራዋ ፅላትስ ዴፌርፃላ ንጝስ ሚንችካ አቑ ብሪ ክቤ፣ ጛፅ ካሳካስስታ ይዎትኪላ ፌያ:: እኒጛ ይቶፒያዋ ወሬርጝስ ጁንኩ ፅላትካ ክቻዴስኪላ ታሊያኑ ወሬም ቶኬምስቴ:: እን ጊዛይ ሚንችካ አቕ አጌርስ ቡንክትጜካ:: 1988 ም/አሜትስ ታሊያን ይቶፒያዋ ክምጝስ አኬድታችኽቱኒውላ አድዋዳ ዊፅስትጝስ ሳኪትጛውላስ ይጉዋ:: እንዴስ ፋሌንጋኪላ 40 አሜትዴስ ፋሌንጋ 1928 ም/አሜትስ ታሊያኑ ወሬም ይቶፒያዋ ወሬራሺኾ:: ያኼስጉ አጌርኩ አርቤንካ ጛው ይዎትስ ሳሲታኑላስ አጌራውሳ ክብሮ ቤዴርፅካማ ናካ ዝኪትፃ ይቶፒያዋ ክምንትስ አሬኬብፅጝስ ሜስዋታ ያኼካ::

ይቶፒያዋ ሊሊትጙንኩ ዝቤንካስ ሰሜንዴስ ደቡቦ፣ ምስራክዴስ ምራቦኺስታ ሴዛስጊ ዳብዚስ አሜት ቺፋ ፅላት ወሬርጝስ ሞኬራ:: ዋሺኒኪ ስፍሪዴስ አርቤንካ አጌራው ክብርስ ጁዌካያሱ ስፍሪ አግስታላ:: እን ሙካሪ ዝኩኒኪላ ይቶፒያ ካይ ክማስ ክምስቲያስቲ አጌራኽ:: አጌራውሳ ክብሮ ማንዲፁንኩ አርቤንካ ሚንቾኪላ ዙሚስታይያስኩ፣ እንፃኽስቱኑ እንፅኺ አሌምስ አቕስታንኩ ዝኩና:: አጌሩ ሉዋላውት ዴፌርስታማ ውራሪ ፌፄምስታኒ ቡንክትጛ፣ ፅላት ኩራሺኹሳ ወሬምኩሳ ሜሳርካዋ ድፃ፣ ጄግንት አጌራዴስ ፌያማ እሊኩ አጌርካስ አቕስታ፣ ሜዜጌብፅኹ ክብርስስታ ጄግንትስ እንቲታኪ አጌር አቕትስ ዳራዳርጛውላስ ይጉጝስ እንፂዊው ፍርድ እይስታ:: ጄግንትስ ኬቤርስታማ አጌሮ ኬቤርፃ፣ አጌራኻዴስ ፌያማ ፅላት አጌራ ካሳማ ፅላቶ እንግልብስፃ:: ወርክታ ፌቴንስታማ ድሎ ሜዜጌብፃ:: ነጆዴስ ታሊያኑሳ ቤሬኼ ኺስታ አጌሩ ሉዋላውትስ ሜስዋታ ያኻ::

ፋና ብሮድ ካስት ኮርፖሬሽንዴስስታ ኢቲቪዴስ አግፅንኹ ንባርታጊ ይቶፒያዊ አርቢኒ ሌተናል ኮሎኔል አብዲሳ አጋኪላ አጌራውሳ ሉዋላውቶ ማንዲፅጝስ ሚንች ቡንካዋ ፄውንኩ አርቤንካ ክቻዴስያኽ:: ሌትናል ኮሎኔል አብዱሳ አጋ ኽታዊኒ ወለጋው ክም ናኪኒ ምስራክ ወለጋ ነጆ ኬቴምዳ 1911 ም/አሜትስ ካሜንስታ:: አርቢኒ አብዲሳ አጋ ድሚ ክንቲስ ታምባኒ ነጆ ሜሲዮን ክንቲ ጝና ቱዋማ ክንቴ ሲፍጝⶓ ጄሜርኾ:: ክንቲስኪላ ዋልታንቴ ቤኖ ኺስታ ክንቱኒዴስ ፋሌንጋ ኬውጝፃ::

እንዴስ ፋሌንጋ 16 አሜት ያኹስ ሆልታዳ አግስታው ገነት እስታው ዎሬሙ ሲሊቲንፂዳ ሴሌቴናማ ማሬጐ ቻቤላ:: ማሬጐ ቻቤሉታኪላ 1928 ም/አሜታስ ታሊያኑ ውራሪ ይቶፒያዳ ዎሬሞ ብሳማ ወራሬ ፌፄማ:: እን 16 አሚቲ ሌጌሳታንቢ አጌሩ አርቢኒ አጌሮ ዴፌርፃላ ናማ አብርታ ሴሌቴኑንኩሳ ወሬምኩሳ አፄብካዋ ጉሽጝፃማ ወለጋሾ ካስጝስ ታሊያንሊ ሴብትⶓ ጄሜሩና:: ታሊያን ይቶፒያዋ ወሬርጛ ይንቱስ ዋልታ ሴብትጛንትካ ሩምብልካዋ ቦኒያ እስቴት ወለጋዳ አግስቴት ኬቴማዳ ፉሪፃሺኾ:: አርቢኒ፣ ሌትናል ኮሎኔል አብዲሳ አጋስ አፄብካው አይል ታሊያንኩሳ አንኩዋ ሴብትጛንትካ ሩምብልካዋ ድርብካ:: አርቢኒ አብዲሳ አጋው ጄግንትስታ ሜዜጌብስትኹ ድል ቦኒያዳ ጄማራ::

እንዴስ ፋሌንጋ ታስስታማ ሲብትጜዴስ ሴጋ ያኹኒዴስ አዲስ አበባዳ ውሻኪ ልቕልቓቲታ እንፂዊዳ እጄታ ፄውስታ:: ታሊያንካ አዲስ አበባሾ ዲግካማጊስታ ቼፍጜካማጊ ይንታኒ አርቤንካ ጋያኪ ኢሊባቡርኩስታ ወላጋኩ ሜሳፍንትካ ኩፕ ንካማ ትኩር አንባሳ ናውሳ አችቶ ቲሪትጝፁና::ቹዋ አላሚኪላ ማይቼውዳ ኬውጙኽሳ  ታሊያኑሳ ውራሬ አጌራኻዴስ ፍሽፅጝስ ሴብትጜ ጄሜርጝስ እሺኾ:: ታሊያኖ አጌርዴስ ፍሽፅጝስ ራስ እምሩስታ ኮሎኔል ሀይለ አቡ ሀይል እምፕልትስ አኽጝስ ታልያንሊ ሴብትጚስ አዲስ አበባሾ እንዝጜ ፄውና:: ያኼስጉ ታሊያኑ ዎሬም አዲስ አበባዋ ቤዴራማ ዎሬራሺኹ አኽጝስ እራስ እምሩስታ ኮሎኔል ሀይለ አቡ አይል አዲስ አበቦሾ ካሳኒስ ጐጂ እስታው ብንዳ ዴዴክ ዱንታማ ሲዚ ጌርካ ዳድዳ ቼካ:: ጐጂ ብንዳ ሹኻ ጌርካ ሴብትጙኒዴስ ፋሌንጋ ራስ እምሩስታ ሃይለ አብ ታሊያንስ እምስቱና:: ዎሬምስ ታፎ እዩንኩ ወታድርካስታ ምሁራንካኪላ ታሊያንሾ ካስካማ እንፄውስቱና:: አብዲሳ አጋኪላ ታሊያንዳ እንፄውስትጝ ግዳ ያኻ:: አርቢኒ ሌትናል ኮሎኔል አብዲሳ አጋ ታሊያኑ እንፂዊ ጝናዳ ያኻማኪላ አጌሩ እንካን ሼውዴስ ድሳያ:: እንፂዊ ጝናዴስ ፊጝስ ዋታ ያኻማ አጌርሾ ዙራው አኽⶓ ታክሱስታ ሚንችካ አሳብካዋ አንኩሊዳ ዙራዙርፁስ እጂኒዴስ ፋሌንጋ እሊው አጌሩ አጌር አቕ ያኹንኩ አቖ ቴቤቤርጝፃማ እንፂዊዴስ ፊጝስ ካላ::

አርቢኒ አብዲሳ አጋ ይጐዝላቢያኩ አፄብካሊ አኽጝስ እንፂዊ ጝናዴስ ፋኑዴስ ፋሌንጋ እሊኩሳ እንፂዊ ጝናዳ ዝኩንኩሳ አፄብካዋ ፍሽፅጝስ ካላ:: ታሊያኑ እንፂዊ ጝናዳ ዝኮኩስኪላ ታሊያኑሳ  ኮንኬ ዴሳ አርቢኒ አብዲሳ:: ታሊያኑ ዎሬም ይቶፒያዴስ ፋማ ዊፅስቱኒዴስ ፋሌንጋ ሮሙ፣ አሜሪካውስታ እንግሊዙ ቼፍጚ ስራዳ እሺኒዴስ  ፋሌንጋኪላ አብዲሳ አጋ ጉሳው ዎሬምኩ አባልካ ባንዲራዋ ታፍዳ እፄዋንታ ፄውስታ::

አብዲሳ አጋው አይልኪላ ሮምሾ ቱኻ:: ፋሽስቱ ሞሶሎኒ ቲሬማ ይቶፒያዋ ወሬርጝስ አዌጅኹዳ አደባባይዳ አብዲሳ አጋ ቲሬማ ይቶፒያው ባንዲራ ኬፍ ናማ አውሌቤሌብስታታ ፄዋ:: ኮሎኔል አብዲሳ አጋ ሊሊትጙንኩ አጌርካዴስ ዲጋውሳ አጌር አቕቶ ኪሳታ ካሲኑሳ ካሴ ቻቤላውላስ ይቶፒያሾ ዙራ::

አጌሩ ሉዋላውትስ ዳራዳርጛቲው አብዲሳ አጋ አጌርሾ ዙሩኒዴስ ፋሌንጋኪላ ውታድሪ ያኻማ አጌላጌላ:: ይጐዝላቢያው ጉሳንቲ ፊልድ ማርሻል ቲቶ አብዲሳ አጋውሳ ታሪኮ ማሌካስኩንኩ አኽጝስ ይቶፒያሾ ቱዋኒስ አባላምቴ ካሲኑ አብዲሳ አጋዋ እሺኾ:: እንሳ እንኩዋኹንኩ አፄ ሀይለ ስላሴ ምንግስት ጝናሾ እቑዊካማ አብዲሳ አጋዋ ሌትናል ኮሎኔሉ ማሬግስ ንጉሱ ክብሩ ማንዳንቲ ፄዌካማ ሹሜካ:: አርቢኒ ሌትናል ኮሎኔል አብዲሳ አጋስ “ደ ምሳሽ” እስታው ክፅሊ ስምኪላ እይስታ:: ሌተናል ኮሎኔል አብዲሳ አጋው ስምስኪላ አዲስ አበባዳ ክንቲ ጝና ጊቢትስታ:: እን አጌራው ክብርስ ቡንክትጙኽ አርቢኒ 1970 ም/አሜትስ አሌምዴስ ክሪስ አግሌልስታ:: ያኼስጉ እንፃኽስቱክ እንፅኽካ ኩፂ ናካኪላ ክምንትስ ክንትፅካ ያኻና:: ሚንችካ አጌራው አርቤንካኪላ ሚንችካ ዙሚስታያስኩ ጀግንካ ዝኩና:: አርቤንካውሳ ጌርኮ ይቶፒያ አሜት ቺፋ ማንዚ 27 ጌርክስ ታክስታታ ኪቢርፄው ጀግንካውሳ እንፅኼስታ ክብሮ ጌሌፅጝስስታ ታክስጝስያኽ::