ኩስጜካማ ፄውኑ

ታደለ አጋጄ

አጌራዊ ኩስጚ ሊሊትጙንኩ እምፕልታቕኩ ቤንካ ክቻዳ አሳቡ ሊሊት ፌቴርስታኒ፣ ኬፍቲኒ ፖለቲካው ችግርስስታ ዎሬምዴስ ፋሌንጋ ኬሴትስታንኩ አኼንካዳ እምፕልታ ኩስጝጝስ ቱትጚዳ ታምብስታታ ፄውስታው ካስቲያኽ:: ሊሊትጙንኩ እምፕልታቕኩ ቤንካዋ ዎኬላንኩ እምፕልታቕ አግስቴካማ እሳኖ ኩስጜ ካስጝፃኑ፣ አጌራዳ ካንትስታንኩ ችግርካዳ ይጋሪስ ኩስጝጝስ ይጋሬ ኽዬ አግጝስ ፄውስታው ሴልያኽ:: ኩስጝጚ ቹዋስ ጋቻዋ ኽይጝስ ፄውስታው ሴል ያኹስ አጌራውሳ ፖለቲካውሳስታ ዲሞክራሲውሳ ካይጝጜ ሌጌፅጝስ ኬፍቲኒ ትክም ዝኩኽያኽ::

አጌራዊ ኩስጝጚው ቹዋ አላሚ አጌራው ጉዳይዳ ዝኩንኩሳ ሊሊትካዋ ፄቤብስጝስ፣ አጌራዌ ቱትጜ አግጝስ፣ ሊሊትጙንኩ እምፕልታቕኩ ቤንካ ምንግስትሊ ዝኩኽሳ ታምትጜ ይስጝፅጝስ፣ አምንጝጜ ሌጌፅጝስ፣ ኩስጝጚዳ ስርትኹሳ ፖለቲካውሳ ባይሎ ፌቴርጝስ አጌራዌ እምፕልቶ አግጝስስታ ዲሞክራሲውሳ ባይሎ ሌጌፃማ ልማቶ አሬኽፅጝስያኽ::

ይቶፒያኪላ አጌራዊ ኩስጚውሳ ኮሚሽኖ ጉሳንኩ 11 ኮሚሽንካዋ ጎሌልጝስ ይካቲት 16/2014 ም/አታዳ ጄሜራማ እንፅኺሾ ቱስታ:: ኮሚሽኑ ቲሪትጝፂ አዋጅዳ ግልፅስ እንኩርስትኹስታ ይቶፒያ ካስጝፃታጊ አግስቴው አጌራዌ ኩስጜ ኔፃስታ ጊሊሊቲኒ ኾትስ ጉስስትጝ ፋይፃው አኽጝስ አጌራዊ ኩስጝጚው ኮሚሽን አዋጅስ ቲሪትጛታ ፄውስታ:: አጌራዊ ኩስጚ ኮሚሽኑ ቲሪትጝፂ አዋጁ ቼፍ 1265/2014 ፄዴካማ እንፅኺሾ ቱዋ:: ኩስጝጚው ኮሚሽን ቲሪትጙኽ ጊዝዴስ ጄሜራማ አጌራኩ ሊሊትጙንኩ ቤንካዳ ሊሊትጙንኩ እንፅኽካ አኮሜችስትካማጊያኽ::

አማኻሪ ክልልዳ ስንብቶ ሊሊትጙንኩ እምፕልታቕኩሳ ቤንካዋ ዎኬሉንኩ እምፕልታቕ አጀንዴ ኩፕፅጙ ካስትዳ አሴቴፍጜካ::

ብሄረሰቡ ቺፅጝፂ ሊሊትጙንኩ ወረድካዴስ ፊትጙንኩ እምፕልታቕ ኩስጝጚው ካስትዳ አሴቴፍጙንኩ ያኹስ እምፕልታቕ ችግርካ እስቱንኩሳ ሊሊትጙንኩ አጀንድካዋ ጉሽካ::

ዋሺኒኪ ችግር ኩስጝጚስ ኽይስትጝስ ካላው አኽⶓ ጉሹንኩ ኩስጝጚው አሴቴፍጛንትካ ሚንችካ ችግርካ ፌቴርስትጝዴስ ቤዴራ ኩስጝጚ ፄውስታስኩኒ ሚንች ጉዳት ታምባቲው እሺⶓ ዲብስካ::

አጌራዊ ኩስጝጚዳ አሴቴፍጙንኩ ጛርት አቕ ክልላኻዳ ዝኩንኩ ችግርካዋ ኽይጝስ እሳኖ ኩስጜ ካስጝፅጝስ ዴሶ ካፅⶓ ቶኬምካማ ሰላም ይንታታ ፄዋንኩ አሳብካዳ ኩስጝጝስ ችግር ኽይስታታ ኩስጝጜካ:: “እኑስ እኖ ቱትጜ አቲናና አብትስታ ንብሬት ዎዴማማጊያኽ” ኑንኩ ኩስጝጚው አሴቴፍጛንትካ ክልሉ ሰላሙ ችግር ምክንያታስ ታምባማጊ ዝኩኽሳ ችግሮ ኽይጝስ ማልጛ ፋይፃንቲ አኽⶓ ድኹዌካ::

ናካሳኺስታ አጌራ እጂቲኹ ኩስጝጚስ አኽⶓ ቶኬሙንኩ አሴቴፍጛንትካ “ኩስጝጚ እላቲው ጝን እምቢታማ ፌሬሴ” ናኒስታጊ አጌራውሳ ሰላሞ ቼሜትጝፅጝስ እምፕልትስ ኩስጝጝስ ችግሮ ኽይጝ ቱስታው አኽⶓ ዙሜካ::

ውላ ዙራሙሪዳ ዝኩንኩ ችግርካዳ እሳንስ ኩስጚ ፄውስትⶓ ቶኬምካማ ቤዴራ ኩስጚ ፄውስታውላስ ይጉጝ አብትስታ ንብሬት ዎዴማታ ፄውⶓ ዙሜካ::

አማኻሪ ክልሉ ዎክታዊ ፄትቲው ችግር ኹንዳስታ ስራስሪዳ ሚንቾ ጉዳቶ ታምፃማጊ ዝኩኽሳ ችግሮ ኽይጝስ ካሊፃው አኽⶓ ጉሽካ::

“ውላስ ዳላው አብት ዝኮ:: ኩሪፃው ባይል ዝኮ:: ታክስጚዴስ ይጉዋማ እኑስ እኖ ድጙትጝኔ:: ድፅናኻ እኖጂ ግቢትናኻ እኖጂ አኽጝስ አይጛ ድፅንኹሳ ናካ ግቢትጝስ ሊሊትቶ ድፅጝ ፋይፄ” ንካ አሴቴፍጛንትካ:: ቻሱ ክምንትስ ኬሽኹሳ አጌሮ አሬኬብፅጝስ ዝኩኽሳ ሊሊትቶ እምፕልትስ ኩስጝጛማ ኽይጝ ቱስታው አኽⶓኪላ ዙሜካ::

ኩስጚዴስ ፋሌንጋ እሺኹ ችግር ኽይስታማ  ቤዴራስኩ ታብል እጂፁንትሳ ይቶፒያዋ ይንታው ክምንትስ አሬኬብፅጝ ፋይፃው አኽⶓ ዲብስካ::

ጊፂኒ ጊፅሳማ፣ ሰላምስ እንፃኽስቴካማ ዝኩዋኑ ውላ ዴስቴንካ ያኼካማ ዝኩዋንታ ፄውጝስ ኩስጝጚ ቹዋ ችግሩ ኽይፂ ኩልፍ አኽⶓ ጉሽካ::

ኩስጚው አሴቴፍጛንትካ ኩስጚ ፄውስታውላስ ይጉጝስ ሚንች አብትስታ ንብሬትዳ ጉዳት ታምብⶓ ቶኬምካ “ኽታዌንካ ታብል ባርኾቼስኩ አጌርካው ውራሪዴስ እጂፁንትሳ አጌራዋ እኖጂ ፌሬስፅጝ ቱስታላ” እኑስ እኖ ክርጝዴስ፣ አብቶስታ ንብሬቶ ድፅጝዴስ ችግርካዳ ኩስጜ ካስጝፅጝስ ችግር ኽይስታታ ፄውጝስ ካሊፃው አኽⶓኪላ ዙሜካ::

ዎሬምስ ሴብትጝጚ ዋሺኔኪ ችግሮ ኽይጝስ ካሊስታቲው አኽⶓ ጉሹንኩ አሴቴፍጛንትካ ምንግስት እምፕልታቑሳ ችግሮ ቹኒታማ ኽዬ እያታስታ ዊዳፊ ሰላሞ ሴፌናታ ኩስጝጚ ፄውስትጝ ቻ ሰላም ይንታታ ቴስፌ እንኩርኹ አኽⶓ ዙሜካ::

ዎታትካ እንፅኺሾ ቱጝዳ ሚንችካ ችግርካ ዝኩⶓ ቶኬሙንኩ አጌራዊ ኩስጚው አሴቴፍጛንትካ ዎታትካ ይኮኖሚስ ፖለቲካስስታ ማይቤራዊ ዜርፍስ ቴኬምስታንታ ያኻንታ ካሊፃው አኽⶓ ዲብስካ::

ችግርካዳስታ ኽይ አሳብዳ እሳንስ ኩስጝጜ ካስጝፅⶓ ዙሙንኩ ኩስጚው አሴቴፍጛንትካ አጌራኻሱሳ ችግሮ ፌቴርጝዴስ ኪቻ ችግርዳ ኩስጝጝስ ሰላሞ ይንታታ ውላጊ እምፕልትስ እንፃኽስትጝ ቱስታው አኽⶓ ዙሜካ::

አማኻሪ ክልሉ ኩስጚው ካስትዳ 263 ወረድካዴስ ፊትጙንኩ አሴቴፍጛንትካ አጀንዴ ኩፕፅጙ ካስትዳ አሴቴፍጜካ:: ሜጋቢት 27/2017 ም/አሜታዴስ ጄሜራማ አማኻሪ ክልልዳ ካስጙኽ አጀንዴ ኩፕፅጙ እንፅኺ አሌድስታ:: አጀንዴ ኩፕፅጙ ካሰትዳ አሴቴፍጙንኩ ዎኬልስታንትካ አጀንድካዋ ኩስጚው ኮሚሽንስ አሬኬብፅካ::