ለንደን ማራቶኑ ዊፃንታ

ታደለ አጋጄ

ኹኑ ማራቶኑ ልኺትጚዳ ኬፍቲኒ ያኹኽ ሳቱሳ ኬሽጝጜ አግጝስ ፌይኹ አሜትዳ ክብረ ዎሰኖ ዱንፂት ትግስት አሰፋ ኦሎምፒኩ ሜድሬኽዳ ሳኪትጛያውላስ ይጉኒውላ ኽሳንቲ ለንደኑ ማራቶንዳ ዊፃንታ አኽጝስ ክብረ ዎሰኖ ሚዚጊብፄ::

ይቶፒያት አትሌታ ትግስት አሰፋ ለንደኑ ማራቶንዳ ዊፃንታ አኽጝስ ካሊኹ ኹን ይቪችካ አሴቴፍጛኑ ማራቶኑ ልኺትጚዳ ክብረዎሰኖ ኪንዲ ደኪካስ ኬሽጝፅጝስያኽ::

ፌይኹ አሜትዳ ካስጙኽ ፓሪሱ ኦሎምፒክዳ ኔዘርላንድቲ ሲፋን ሀሰንሊ አሊዴኺስታ ልኺትጝታታ ላጛንታ አኽጝስ ብሩሳ ሜዳሊያ ዊፅጝስ ካሌ::

ትግስት አሰፋ ስንብቶ ካስጙኽ ለንደኑ ማራቶንዳ ዊፅጝስ ካሊኹ ልኺትጜ ሲዚ አሜታዴስ ፍና ዊፂት ኬንያት አትሌታ ጃይስሊን ጄፕኮስጌይናዋ ፅካ ኪሎ ሜትራ ይጉስ እቺቴታ ካስጝስያኽ:: ልኺትጚ አሌድስታኒ ላጛ ሳታ 15 ደኪካ 50 ሴኮንድስ ያኹኽ ጊዝስ ቱጝስ ዊፄ::

ኬንያት አትሌታ ጄፕኮስይንስታ ኔዛርላንድስ ጊጝታት ይቶፒያት ካሜንስታንታ ሲፋን ሀሰን 2ንቴስታ 3ንቴ አቾ ቤዴራ ሲፊስ ቱጝስ ልኺትጜ አሌድካ::

ናካዳ ትግሰት ሚዚጊብፂኹ ሳት ፌይኹ አሜትዳ ካስጙኽ ለንደኑ ማራቶንዳ ኬንያት ፔሬዝ ዳፕቺርቺርስ እምስታማ እጂኹ ልኺትጚው ክብረዎሰኖን 26 ሴኮንድስ ኬሽጝፅጝስ ካሌ::

ትግስት አሰፋ ፌይኹ አሜትዳ ሜስኬሩም 13/2016 ም/አታዳ ጀርመን በርሊንዳ ካስጙኽ 48ንቲ በርሊን ማራቶኑ ልኺትጚዳ አሌሙሳ ክብረ ዎሰኖ ላጛ ደኪካዴስ ጃላ ኬሽጝፅጝስ 2ሳት 11 ደኪካ 53 ሴኮንድስ ቱጝስ ዊፅጝ ታክስስታዊያኽ::

በርሊን ማራቶን ልኺትጚዳ ኹኑ ማራቶኑሳ ክብረ ዎስኖ ኬፍቲኒ ሊሊትትስ ኬሽጝፅጝስ አሌሞ ጊሪምፂት ትግስት ፓሪሱ ኦሎምፒክዳ ሲፋን ሀሰን ቢዲርስቴታ ኦሎፒኩሳ ወርኩሳ ሜዳሊያዋ አቲኒውላ ለንደኑ ማራቶኖ ዊፅጝስ ክብረ ዎስኖ ኬሽጝፅጝ ካሌ::

ንባር ቢቢሲዊያኽ