ዋይሜ ክብሪ ካምፒ

አለሚቱ የኔት

ሰርቢያዳ ድኹዋራው ኹዋሺዴስ አግስታው እምፕል ኪሎግራም ካምፒ 1 ሻይ 200 ዩሮስ ዋይስቴ::

እን ዋይሚ ክቻክቺ ሰርቢያውያንካው አርፊው ደሞዚዴስ ኬፍ ንኹዊያኽ::

ካምፒ ዋይስታውኪላ ዛሳቪቻ እስትኹ ፍትሬት ሀብት ማንዲጙ ግባኻዳኽ:: እን ግባኻኪላ ቹዋ ኬቴማ ቤልግሬድዴስ ምራብሾስ 80 ኪሎ ሜትር እቺትዳ አግስቴ::

እምፕል ኪሎግራም ካምፔ አግፅጝስ 25 ሊትሮ ኾሼ ፋይፄ:: እምፕላ ድኹዋራ እስጜ ላካሳ ኾሼ አሚሪቴው እምፕል አሜትስታ ኪንዲስ አኽⶓኪላ ግባኻሱ አላፊ ቢቢሲስ ጌሌፅካ::

ስፔንዳ አሜሬትስታው ካብራሌስ እስታው ድባና ፂጊሪ ካምፒ /ብሉቺዝ/ ማልጜ ክብሪያኽ:: 2024 2 ትኩሚ 5 ኪሎ ግራም 36 ሻይ ዩሮስ ዋይስታው አኽጝኪላ ታክስስቴ:: እንስኪላ አሌሙ ዲንክፂው ሜዝጌብዳ ሜዜጌብስታታ ፄዋ::

ሰርቢያዳ ድኹዋራው ኹዋሺዴስ አግስታውሳ ካምፔ ጄውጝስ ካላንኩኪላ ሚንች ጌንዜብ ዝኩክ አብታምካ ይቢችካኽ::

36 ስኩዌር ኪሎ ሜትርዳ ፉሩኽ ዛስቪቻ አሊኩ ብትካዳ አግስታቲንኩ ካናኻፅካስታ እንሴስካው ዜርካዋ እንቲታኪ ቻኽካዋ አቩቓማ እሚኹ ግባኻኽ:: ግባኻ አቕስታውኪላ ድኹዋራስያኽ:: 300 ድኹዋር ዝኩኑ ያኹስ ደቡብ ምስራክ አውሮፓስ ኽሳንቲ ድኹዋሩ ማይኬልኪላኽ::

ኹን ድኹዋር ካሜኑኒዴስ ሴስታ ጌርክዴስ ፋሌንጋ ጝርጃሊ ታምትጚስ ቴርታኑ ጊዝኪላኽ:: እንኪ ዴሜካ ኹዋሼ እይጝስ ቴርቱንኩ ያኻንታ ፄዌ:: ያኼስጉ ድኹዋር ኹዋሼ እያኑ ጄርካ ዝኩዋኒስ ይቢቻኽ:: እንስታ ያኻማኪላ እያኑ ኹዋሺው ሜቴን ማልጜ ልቓኽ::

እምፕላ ኹና ድኹዋራ ጌርክስ አሚሪቶው 300 ሚሊ ሊትር ኹዋሼ ይቪቻኽ:: ድኹዋራው ኹዋሺ አቒው ኾሺታጊ ሳሴርስ ታቕታው ጋቲዊያኽ:: እን ንጝኪ ዴሜካ ካምፔ አሜሬትጝስ ሳሴር አኻላኪ ንጝያኽ:: ያኼስጉ ሚንች ሙካሪዴስ ፋሌንጋ ዛሳቪቻው ምግቡ ኢንጂነርካ ካምፔ አሜሬትጙሳ አቕቶ አግፄካ:: “ካምፒው ፄዌንት አግስታው ጋቲውያኽ” “ኑንኩ ሲሚች” ንጝስ ካላው ፄዌንት ክብሪያኽ ይቪቻኽ:: “እን ድኹዋራው ኹዋሺዴስ አግስታው ካምፒ ፋይስታንቲ ያኹኒኪላ እዝብ ዋይስታው አኹኪ ባርኾቼሾ እንፃኽስታው ጋቲዊያኽ:: ጄውጝስ ካሊስታውኪላ ዛሳቪቻዴስ ይቢቻኽ:: ግባኻዳ አግስታው ሬስቶራንትዳ ውላ ዋይስታላኪ:: ካምፔ ጄውጝስ ፋያንኩኪላ እምፕል ፅሊ ሱክሾ ካስጝ ቱስታው አኽⶓኪላ ንባር ቶኬማ::

አሜትስ አሜሬትስታው ካምፒው ሜቴንኪላ 25ዴስ 30 ኪሎግራም ይቢቻ አኽጝስ ሳሴርስ አግስታቲውኪላ እንጚ ምክንያቲስያኽ::

ንባሮ አግፅንኹኪ ቢቢሲዴስያኽ”