ቢዝራካኒዳ ፅንኩት ዝቒው አኹ ችግር ኽይስታማጊያኽ

አለሚቱ የኔት

አዊ ብሄረሰብ ቺፅጝፂ ጉዋንጉዊ ወረዳ ቢዝራካኒ ኬቤሊው ዝኩዋንትካ ፅንኩት ዝቒውሳ አኾ ቴኬምስታንትካ አኽጝስ ካሊⶓ ዙሙና::

አዊ ብሄረሰቡ ቺፅጝፂ ጉዋንጉዊ ወረዳ ቢዝራካኒ ኬቤሊው እምፕልታቕስ ቤዴራ ምንግስት ፅንኩት ዝቒውሳ አኾ ታምብስታንታ ፄውጝስ ካቢትጚስ ፍሮ ግሽጝስ ፅርቶ ፄውኒውላ ሳኪትጛውላስ እምፕልታቕ አኹ ችግርስ ቤዴልስትካማ እጂካ:: ናካ ኩፅኒ ካቢትጚስ ፄውስትኹ እንፅኺስ አኹውሳ ችግሮ ጌጌውጝስ ካሊስትⶓ ዝኩዋንትካ ዙሜካ::

ፅንኩት ዝቒው አኹ ችግር ዝኩጝ ጝናኻዴስ ፌያማ ክንታንትካ ስራስሪ ክንቲስ ሳትስ ታንባቲንታ፣ ፃንኩቶ ማንዴካማ ክንቲ ጝና ካሳቲንታ ፄውጝስኪላ ቻኒስቶ ቺፃው አኽⶓ ብዝራካኒ ኬቤሊዴስ ክንታንታ ባንችአምላክ ወርኩ ዲብስታ:: ትኩት እይስታማ ፅንኩት ዝቒ አኹ ችግር ጌጌውስትጝስኪላ ናካዳ ዴስቴና አኽⶓ ድኹታ::

ቢዝራካኒ ኬቤሊው ዝኩዋንቲ አቶ ካሳሁን ዘውዴ ኑኑውስታጊ ቤዴራ አኾ አግፅጝስ ፍሮ ግሽፅካማ አኾ አግፃኑላስ ይጉዌካ:: ናካ ኩፅኒ ምንግስት አይኹ ትኩትስ አኹስ ያኻውሳ ፍሮ ማሽንስ ግሽጝስ ፅንኩቶ አኾ አግፅጝስ ካሊስትⶓኪላ ዲብስካ:: ቤዴራ አኾ ችግር ምክንያታስ ጌማማ ካሳውሳ አኹስታ ፃንኩት ማንዲሰታያሱሳ አኹ ቑንዚስ ፂኪስትጝስ ቼጌርስታኒስ እሺⶓኪላ አቶ ካሳሁን ዙሜካ::

ዊዛሮ ዳራጐት አሳሳውኪላ ፅንኩት ዝቒው አኹ ችግር ምክንያታስ ጝናኻዳ ምግቦ አቤሴልጝስኪ ያኻ ስራስሪውሳ ፃንኩቶ ማንዲጝስ ማልጜ ቼጌርስታኒስ እሺⶓ ድኹዌካ:: አኹ ችግር ምክንያታስኪላ ፌያማ ካሳውሳስታ ኩሪውሳ አኾ ቴኬምስትጝስ ሚንችካ ስራስሪ ዳንቴንካው ቑንዚስ ፂኪስትጝስ እክምኒስ እሼው ድምክኒ ፍሺስ ታምባኒስ እጂⶓኪላ ዲብስካ:: ምንግስት እምፕልታቑሳ ችግሮ እርዳትስታማ ፄውኽ ፅሬትስ ኩፅኒ አኹ ችግር ኽይስታማ ናካዳ ፅንኩቶ አኾ ዝቕጝስ ዴስቴንካ አኽⶓ ድኹዌካ::

ጉዋንጉዊ ወዳው አኹስታ ኢነርጂ ፅ/ጝናሱ አላፊ አቶ ተሻይነህ አሳየ ጌሌፁኑውስታጊ ወረዳዳ ፅንኩት ዝቒው አኹ ውላጊ ዙራሙሪዳ ዋኽስ ዋኾ ታንብስታንታ ያኻያሱዊያኽ:: ወረዳታ 2017 ም/አሜታስ ኩፅኒ ፅንኩት ዝቒው አኹሳ ችግሮ ኔኬትጝስ ካሊስታታ ሹኻ ክቻክችካ ኻልት ዝኩክሳ ፍርካዋ ግሽፅጝስ ማልጜ ችግር ዝኩክ ዙራሙርካዋ ቴኬምስታንታ ፄውጝስ ካሉንኩ አኽⶓ እርዳትፅካ::

ሊሊትኑስኪ ወረዳዳ አግስታንኩ ጌፄርኩ ኬቴምካዳ ወረዳውስስታ ብሄረሰብ ቺፅጝፂው አክምስ ችግሮ ኽይጝስ ካሊስታቲው አኽጝስ ክልሎ ካሲጝስ ክልል ባጀቶ ፌኬዳማ ችግሮ ኽይጝስ እንፃኽስትካማጊ አኽⶓኪላ አላፊ ቶኬምካ:: ፍንሾስኪላ ውላስጊ ፅንኩት ዝቒውሳ አኾ ቴኬምስታንታ ፄውጝስኪላ ትኩቶ እይካማ እንፃኽስታንኩ አኽⶓ ጌሌፅካ::